朋友就是治病良方

病向淺中醫

昨日喉嚨痛到連吞口水都痛，根本無晒食慾，訓又訓唔到。結果今朝都係偷偷地係辦公時間鼠去睇醫生。連醫生都奇怪點解會發炎到咁紅，以為我有咩暗病。

就係咁醫生比左兩日藥同一樽咳水。唔食又只何，一食即時『睡魔』上身，差d失去知覺。最慘係今晚重有野要做，呢刻都唔敢再食d藥住，怕真係暈左係馬路中心都唔奇。

-------------------------------------------------------------------------

話說晚上係朋友仔既大日子，幾唔舒服都要比面。為左做好準備，到場前已經走左去『海皇粥店』食碗白粥、食碟齊腸填下肚(無法子啦，病到咁，唔戒口掂得)。不過一路食就一路呻救命，個喉嚨好似就快爆咁。

差唔多夠鐘，點都要頂硬上。去到見到好多舊朋友，明明唔飲得，都要飲番少少紅酒過下癮。出奇地身體放鬆左，病都好似好左D。

睇見身邊既朋友，一個二個都過得幸福，有時都幾羨幕。

祝 朋友仔身體健康，白頭到老。

大吉利使

都係自己胃食，昨日忍唔到口，一個人食左十幾粒牛肉乾。食完飯都未落格，又嘆左份百福凍豆花，之後重要食埋個凍雪梨作宵夜。

結果訓訓下覺已經知出事，個喉龍鬼咁乾，吞口水都痛。結果成晚就係咁過，第二朝起身好彩未見有傷風同肚痛。如果唔係真係有排煩。

唔知係呢排操得太行，跑步凍親加埋食生冷野問題。定係新屋問題，搬左入去都唔夠一個星期已經作病。不過呢，凡事應該要向好既方面諗，係自己唔戒口，無得怨天尤人，話鬼閙神。

聖誕同新年呢d大日子，就算點唔玩，都避唔到會食下自助餐，打下邊爐仔。希望腸胃生生性性，唔好成日扭計。

拖著紙皮的日子

為左執屋請左假無返工，呢個市勢請假都要抱好大決心，真係唔知遲下重有無工開。

呢一輪，尤其係放工時段，睇住男士西裝骨骨，女士短裙飄飄。自己就差唔多日日都係拖著紙皮同膠箱往來。唔知情既人，可能真係會估，加下後生世仔都要同阿婆爭飯食。

最弊係，市道幾唔好，紅色炸彈一樣日日有驚喜。數數手指，兩個月都唔夠，已經要飲三餐。就算係公價五舊，都唔左大大隻金牛，都咪話唔赤!

柴米油盬醬醋茶

終於都正式搬家，一架貨車，廿箱雜物，一陣風咁就又街口搬到另一個街口。

老媽子教路，食過燒肉，拜過四方，新屋入伙，但求身體健康，事事順利，大吉大利。

自己都有自己個方法，就係即係走落街，跑番課步，但願日日好腳頭，一路順風。

---------------------------------------------------------------------------

不過搬開左，都有煩惱架。間屋鬼咁靜，唔開電腦既話，真係靜個自修室。空間多左，但開支都大左。所有家居用品，上至食物，下至潔手液，都要自己一手包晒。小數怕長計，看來我都要化身『C 9』，周圍格下價，做個無錢既消費者。

---------------------------------------------------------------------------

不過所謂大屋搬細屋，唔見一籮穀。一日都未過，就發現唔見左，平日用來跑步既計時錶。話晒隻錶都跟左我超過十年，今次已經係第二失蹤，希望可以搵得番啦!


半小時後................

真係唔到你唔信邪，明明搵過幾次都唔見係個袋入面。但過多一陣，佢又會自然出現，呢d咪叫『百厭』law。

讓我們認識更多朋友

日本漫畫足球少將出左幾十年，真係由細睇到大。

記得由中學開，已經唔鐘意打籃球。可能自己生得矮，無謂自暴其短。踢波就唔怕，你睇老馬同美斯咪一樣咁威。

結果細細過已經落維園踢波，最遺憾係唔可以有一班由細踢到大既波友。年紀大左，更加珍惜有波既既日子。無天份，無技術，呢刻都可以用體力搭夠。他朝老左，唔通要好似d維園阿怕咁，圍圈搓波咩!

呢大半年，好彩又識番個波友，間中都可以有波鬥。雖然場場唔同隊友，無咩默契可言，但有得鬥重好過坐係屋企打Winning啦。

坦白講一向都相信男仔普遍都係好勝動物。乜都鐘意鬥，單打獨鬥，團體群鬥。讀書時代比d朋友當係垃圾球員，踢垃圾時間。今時今日都好想可踢番場爭氣波。通常倒弋相向既，都會有好表現架。

唔知幾時有呢個機會?

其實除左希望踢場好波外，踢完波可以一大班朋友，坐埋食杯汽水吹下水，食餐便飯串下嘴，比你去一田瘋狂購物更開心啦。

『傻客』刺激經濟

如果真係相信，明年經濟會更差，失業率上升，大公司日日裁員。呢兩日放完假，明天返工可能連個位都無埋‧咁係咪應該要減少消費呢?

呢兩日游完水都經過SOGO，照舊上去打個白鴿轉。層層都減價，但無樣野係想買，同真係要買。淨睇唔買既叫『遊客』，攪攪陣唔幫襯叫『衰客』，真金白銀出手先係『顧客』。唔少重係一袋二袋，係唔係真係咁抵?

記得SARS年期，周街都平貨，越遲買越抵。如果照咁推論，明年都未到，就洗晒明年既quota，咁係咪叫『傻客』呢?

人肉搬運公司

成日口口聲聲話，唔好太辛苦啦，等正日先搵師傳搬啦。

結果呢?

差唔多個個星期都人肉送貨機。好多怕打爛，但又一d都唔值錢既，都係人手搬運。最衰自己無車，同埋唔識裝櫃。如果唔係真係可係call架雞記，一箱箱紙盒車走咪得。

除左新屋，舊屋呢邊都要大翻新。好多家俱都要移位。一家人假日既節目，就係執野同搬野。最犀利係連兩張床同兩個大櫃都係靠自己。

要走既野都執得七七八八，欠既都係電腦。不過電腦一向都係最後防線，臨走前一晚先入盒都唔遲啦，如果唔係呢幾日點過，哈哈。

尚有十一天

唔經唔覺六月開始到十一月，好似轉眼就過左。中間發生左一件可能改變一生既大事。有邊個估到年初明明歌舞昇平，年尾會爆全球股災。一個唔覺意，如果市道再差，小弟隨時由上車客變負資產。真係未搵到第一桶金，已經比市場打你一獲甘。

年初一直埋怨工作不如意，大不了轉個份工，今日慶幸每朝仍然要返工。細過一直想過私人生活，呢刻反而陪多左家人。

所謂迫上樑山，做唔做英雄好閒，保住收支平衡先至煩。

------------------------------------------------------------------------------------------

執執下野，先知自己一個人都執左廿個紙皮箱(重未計衫褲鞋襪)。唔知男仔來講，算唔算有點兒過份?

搬走左，生活上好多細節都會有所改變，不過懶散既性格不變。可能好快新居都變戰亂區。哈哈。

-------------------------------------------------------------------------------------

前日聽完架勢堂，講開享樂主義。森美話60年代、70年代、80年代同90年代出生既人都好唔同。

60年代未出世唔知生活點。自己算係70、80年代既中年人，算係未捱過最辛苦既日子，又未試過90年代普遍豐衣足食，要乜有乜既歲月。

成日有人話90年代既年青一輩，過份貪求享樂。日日追名牌，季季換新裝，年年去旅行。學老爸成日嬲:-『飯來張口，錢來伸手』。

其實現實係唔係咁，自己真係唔知(皆因我唔係90年代既人)。不過眼見好多年青人，真係好鬼有米。記得細細過自己好想有架搖控車，真係恨左好耐都無。誰不知某年表哥生日，老爸竟然買左架車送比表哥。個刻真係好唔開心，唔明點解，自己個仔想要就唔買，送比人地個仔就貴一貴都唔怕。結果成為左一個童年遺憾。

不過人生總需要一點遺憾，先會讓你記得。講真好多細過既野，我真係唔記得。唔知係咪失左憶，有時感覺真係一片空白，可能好似MIB咁，自己比人洗左腦都奇。

反而呢，好多唔開心既事，反而會令人回味。昔日既失落，今日睇番，其實好閒事。唔好話搖控車，衰衰地真既都可以租架來玩下。只係感覺唔同左，呢D就係點點童真。

森美又提到，年青一輩完全無儲蓄習慣。出糧唔係個個月清，都見得有錢帶落袋。其實有D似美國式生活。一味鼓勵消費，有咩事政付會出手。同樣地自己既老爸老媽捱過艱苦既歲月，將心比已，無咩邊個會想自己既兒女同樣受苦。自自然小朋友一出世，爸媽唔食都盡量滿足佢地。咁又算唔算係一個社會問題?

當然唔係話人人要過『苦行憎』既生活，但間中一個反思，未常唔係一件好事。

加操!

昨晚查到朋友再一次成功完成100公里，自己都要比心機。今日見天氣咁好，又小小涼意，即時加緊操練。

大約跑左15公里，時間同體能有待提升，但鬥志明顯係比友人既毅力感染。

『不退縮，因為有信念』

「100km毅行100%扶貧」

今日又係2008樂施毅行者既大日子，自己雖然退左役，但都會繼續支持同鼓勵所有上山既毅行者。

自己同自己比

兜兜轉轉，呢幾年都學過唔少課程，有d 係貪得意，有d係見有政府比錢，所以唔志在。不過望翻轉頭，其實好多都無詳專業資格。唔只係晒錢晒時間，甚至乎可以講係可有可無。十幾歲就望早d畢業，廿幾歲就望搵份好工，快到三十歲，反而唔覺有咩大成就。養妻活兒未有本事，考順父母都係得過且過。尊重朋友等於見到唔見，行街唔買野，假日唔想出街。遲下搬埋屋，可以宣怖正式歸隱山森都似。

不同生活背景，有不同生活壓力，擔心源自比較。人同人既比較，朋友同朋友既比較，甚至家人之間既比較。到外國旅遊既日子，曾經好羨慕農村既生活。十幾日旅行既日子，無得上網，無得打機，唔會日日追劇集。日日都係自給自足，生活簡單到無得再簡單，因為根本手停口停，但反而無咩比較。因為當人人都窮，打開晒大門都無野比人偷時，重點洗比。

反而返到香港，忽然覺得生活好緊迫。好似自己唔學埋人地咁急，就係浪費左時間，浪費左青春。有機會早放工，靜靜地一個人係屋企上下網，聽下收音機，其實都唔係咩問題姐? 做乜攪到好似要自已怪自己，呢d咪叫『心魔』。

正所謂各有前因莫羨人，食幾多著幾多，除左整定外，自己都勉強有得揀吧?

生日會

今日晚上食左餐生日飯，不過唔係同朋友慶祝生日，今次係老鎷子60大壽。估唔到日子真係過得咁快。祝願家人同自己都身體健康，幸福快樂。

手機、上網月費

由中學離開用『call機』既日子開始，手機上台由和記→Sunday→新世界→數碼通。電話款式都轉過幾次，唯獨電話號碼算係與我常在。

一路都以為交唔足一舊水月費已經算好抵。誰不知一問之下，身邊有唔少朋友、同事都係交緊幾十蚊一個月，有D誇到$38乜叉都包晒。自己交一個月等月佢交三個月，重要自己D分鐘長期係用唔晒，你話死唔死。

經濟不景，節省開支既其中一個方法，除左減少不必要既娛樂，即時都那那淋周圍格下價，盡量減少埋基本生活開支，俗稱fixed costs。不過自己都係怕事同怕煩，最後都係打番上台自己cut 分鐘同爭取每月減多廿蚊就收貨。簽多15個月，每月$60，但無左好多分鐘。雖則我都唔會點用，但感覺好似比人厄左咁。

------------------------------------------------------------------------

攪完電話費，又到上網月費。返到屋企無得上網，真係等同叫我去死。最好既計劃，當然係一搬屋個日就有網上。自己都計足時間，今日落街問下sales報下價。唔知係唔係自己口材唔好，定真係唔夠煩，硬係覺得攞唔到D咩好offer。重要比個sales坤左我簽足30個月，兩年半後都唔知係個咩世界了。

網上爬 6M

寬頻電視 2 個台 (新聞 & 電影台)

一個月試用XX，兩個月室內wifi，6個月室外wifi，

超市 $100現金卷，4G USB手指，2年使用F-XXX防毒軟件

其實諗諗下，佢送既野好多都無咩用，都唔知做乜會比佢厄簽多6個月約。