再見2008

08年真係過得好快，轉眼又到年尾。更加唔覺自己做左d咩大事，想回顧都無野好寫。其實一路都明，好多時係自己收埋自己，多過人地唔去理你。← 只不過真係唔知點解，自己全年都想冬眠咁。

新一年就到，年年都會寫下來年展望，有幾多做唔到，又幾多無諗到。舊既野無謂再寫咁多，過去既就等佢自動慢慢從記憶消失。← 我成日都話自己係RAM，轉數快，但一熄機就咩都無晒!!!

09年應該會係辛苦既一年，好多紅假都係星期六，結果好似個個月都無咩假放。← 唔好話我懶，打工仔係咁。

年年都話想搵野學下，返學既日子係好似好充實，但交完學費，上完晒堂，其實又唔係好知學過d乜。← 我諗最大問題係，自己一直都唔知自己想學乜。

轉左新居所，比預期中快適應，可能自己一向都自我中心，一個人既日子，其實生活都係咁過。最慘係電話渣起手，連一個可以打出既號碼都無，咁你話灰唔灰!!!← 放心我未有自殺傾向，亦都唔鼓勵自殘身體。

成日都講同一番說話安慰人地、安慰自己:-

『生活上有太多唔開心既事情，亦正正係有咁多唔開心既事發生，先讓人學懂珍惜開心既日子。如果日日都開心，根本唔知咩叫開心。』

公司走左太多朋友，現在真係為左返工而返工。好羨慕別人可以有一大班同事開開心心，組織下公司足球隊，節日出來蒲蒲。雖則自己曾經都試做過一間開心既公司，但前途有限，為左有野學，人生總要取捨。

聖誕過後

話說終於都過左呢四日假期，快樂不知時日過，但唔快樂，日子都係咁過。全年咁多個節日，其實最唔鐘意首選聖誕。

話咁快又除夕，不過一日半日訓醒已經又一日。

呢個假期，最大變化係想學飲紅酒。經過超市，望見幾十款酒，真係唔多識揀。鬼唔知越貴越好，不過作為新手，無理由買支幾百蚊咁晒。結果上網查左一查，見有人介紹d超市平價貨，都即刻入番支。

昨晚試開左，個木塞鬼咁實，攪左五分鐘先開到個樽。最閉係一個人又飲唔晒，成日下下擺幾日，想唔變味都難。

衰經濟，照消費，香港人，無閉翳。如果有經過商場，根本唔覺市道差，人人都一袋二袋。不過咁都好，寧可自己買唔到，總好過個個收埋等運到。

"敢於愛與被愛" by 巴林 (聖誕交叉blog)

倪生同周小姐由分手到決定結婚真係好睇過電影，

劇情發展真係估佢唔到，

同期加映某電視台高層極速分手再復合(雖然貌合神離)，

倪周兩人感情發展係大部分人餸飯必選，

但係去到7記見到所有雜誌都用佢地做封面真係飽到嘔。

倪生結婚復合宣言都幾情深，

但係周小姐受玉女掌門人之名所害而被認為犯濺，

現實中既愛情好多時都係互相諒解，

既然周小姐因為愛而同倪生走在一起，

我傾向祝福多於批評佢地。

錯真的不可原諒嗎?

其實原諒一個人可以好簡單但又可以好困難，

既然當事人願意去原諒佢愛既人，

就讓他們去愛吧！

聖誕佳節，Merry Christmas !

學習愛與被愛，

忘卻海嘨慶祝聖誕 !

by 巴林

----------------------------------------------------------------------


補貼番自己篇爛文


我叫阿『鞋』，個名其實幾老土，一向唔走時款路，無一tick，無三間。滿身泥濘與傷疤，腳配狗牙既行山一族。

記得早年『非典』，大家都忽然熱愛郊遊。以為郊區空氣好，遠離閙市無人到，無需扮醫生，口罩不離身。

人云亦云好，唔跟就老土。一時間郊區旺過市區，人人放假仆到去。時勢做英雄，小鞋在那刻與主人相遇‧還有死黨『襪仔』。平日足不出戶，但為左健康，都希望練好身體。

時移世易，縱然走過五百公里，今日落得默守家門。生活轉變，股市日日升，唔好話出門，『踢拖』都要望住個市。連最佳拍擋『襪仔』，呢幾年都索性轉型，一身紅衣打扮，由昔日辛勤勞碌，保護雙足。到今日掛在窗邊，盼望聖誕老人拋下黃金，從此享受餘生。

結果又係自欺欺人!

物極必反，金融海嘯。有錢唔敢洗，有病敢睇。唔怕自己抄濃，最怕老闆抄輸。

踏破鐵鞋無覓處，要解危解困，從歷史中學習，從經驗中成長。曾經陪主人大步上山，緩步下山，今時仍可走出谷底。

正所謂『家有一老，如有一寶。家中重有一對陪你走過荊棘滿途既鞋仔』。

祝願各位:-

『聖誕快樂，同步過冬，明年一同上山鬆一鬆』。

聖誕前倒數

已經收到鎚兄送來既交叉文，再去番原作者既網誌望過兩眼。完全覺得係一個專業股評人既網站。咁都好既，籍著呢次交流，讓自己又認識多一個好網站。

明天會依時登出作品......唔知自己篇爛文又會登左去邊呢?



------------------------------------------------------------------------------------


後記:-

晚上約左班中學同學食飯，大家都差唔多有一年多無見。平日唔見既原因，可能係因為自己唔敢見佢地吧。相比起以前，自己其實一路都比下去。幾十歲人一事無成既感覺，每次見面都會提番起。

不過最估唔到係，今次連一眾男人老狗，出來飯局既話題都係講結婚同點搵錢擺酒。唔通真係，人到左某個年紀，唔結婚唔得?

酒入愁腸

可能年紀大，但思想同行為，完全唔成正比。

細過打死都話唔會著恤衫西褲出街，結果現在一星期著足五日。

細過成日覺得食煙好型，現在後悔自己做咩浪費左咁多生命資源。

細過話飲啤酒要大大箱咁先勁，現在覺得要開始學識嘆紅酒。

--------------------------------------------------------------------------

話說公司抽獎，今年又抽中支紅酒。呢幾年時不時都有抽中，但一次都未正式飲過。今日放工，都即刻走去買番幾個紅酒杯。期待放假既日子，要飲番兩杯先。

相識於微時

今朝早出席左個朋友個就職慶典，朋友仔經過多年努力，終於榮升專業人士。其實個儀式只係廿分鐘，莊嚴又不乏笑位。同朋友仔算係相識於微時，唔覺唔覺又多左個十年朋友。

最攪鬼係，自己到會場準備上前同朋友仔打招呼之際，竟然有吧女人聲叫停我。回頭一望，原來係阿嫂，不過就點都記唔起佢叫咩名，甚至活動完左回程歸家，都係諗唔起。唔知係我善忘，定係阿嫂變化太大。由昔日既掃雷車，今日都變成 Lady。

----------------------------------------------------------------------------

其實唔只一次失憶，之前日記都有提及過，自己成日出席D同學活動，大家傾開既昔日往事，自己都好似一片空白咁。(唔通我真係曾經被外星人洗腦 /0..0\ !!!!)

可能係自己唔敢面對舊日既自己，所以腦神經自我產生刪除功能，否則無理由廿幾歲仔，咁快喪失記憶能力。

所以我咁多年都 keep 住寫日記係岩既!!

-----------------------------------------------------------------------------



其實想買呢個『車軚鐘』好耐，一路都唔捨得。咁岩呢期屋企又有需要，終於都用左廿蚊帶佢回家。不過年尾流流先買鐘，好似唔係幾好咁。

----------------------------------------------------------------------------

咁唔知聖誕鐘、買匯豐，又會唔會好d呢?

百三蚊都夠胆入市，反而星期五收市報 HK$77，自己會考慮咁耐。不過自從雷曼事件，硬係覺得唔應該將所有雞蛋放晒係同一個籃。幾穩陣既公司，都會有貪心既員工，都會有失策既時候。結果一直都係十五、十六，唔買唔舒服，買左又怕輸獲熟。

十一月初，明明計劃好年尾買番兩手 2800盈富基金比自己當聖誕禮物，唔知下星期有無入市機會呢?

殺價超人倒下來

亞視都算攪鬼，個頭搵兩個高層回來改變，轉頭又四分五裂。無人知個實際情況係點，更唔知個結果係點。好有可能係某d人相變，某d人唔肯變，結果變成泰國兵變。

其實黃生比我感覺唔差，話晒我都幫過佢打工，當年都用過CTI 56k modem dial up上網。記得CTI總部係荃灣附近既工業大廈。咁岩重要同黃生同層工作，佢間房話大唔大，但全落地玻璃開放式既設計，確實感覺良好。起碼唔似d老闆，好鐘意間房幾十樣野遮住，方死比員工知你係入面做緊咩咁。

對自己既工作室都有咁既安排，就會明白點解佢話要改革，要將冷冰冰既寫字樓重新裝置。

其實作為打工仔，一生人大部份時間都係公司過。如果返工唔開心，其實都幾影響情緒同工作。自己算係一個識自我調節既人，真係比一部電腦同互聯網就夠我過活。差d試過全日都唔講一句野。

無他既，同d同事有代溝，自己又硬頸。成日覺得值得識既朋友先去傾下計，其他人無咩必要去打交道。

加上近年搬左個好位，平日可以話自成一角，山高皇帝遠。

-----------------------------------------------------------------------------------

消費模式

基本生活開支
衝動性購買
日常娛樂雜費
大時大節洗費
突如其來破費

個人覺得大致可以分為呢五種，好多都無可避免。尤其係過時過節，幾唔願意都好，都會有好多洗費。見到報紙雜誌日日宣傳，處處商場都減價爭客，d人好自然有錢就身痕。

自己呢?

成日都話跟住我，都幾淒慘。一定食唔好，住唔好，連買少少野都托手爭既人。已經好耐無買過貴野比自己，可能生活無咩特別不足，有其它消費可以算係bonus。

聖誕又就到，呢期最煩惱係好唔好隻身參加party。其實自己都唔只一次參加新節目，so far結果都唔差，重要成功識到一班好朋友。唔明今次做咩要考慮咁耐。

聖誕交叉blog 2008

其實上年已經知有呢個活動。不過自知自己文筆差，又成日寫白字，又無咩創作技巧。怕會出醜在人前，結果都係決定做旁觀者。

不過睇番個活動，真係好得意。唔少高手既文筆同故事性都一流。尤其係d出名網誌，可以用精采來形容。

今年活動仍是繼續，自己都諗左好耐，計劃會寫乜，連稿都準備好晒，先夠胆報名。其實大家都唔識大家，又未見個真人，何必咁愁。

如果一個好彩，自己篇爛文，可以係d大哥輩網誌登出，就更加可以話開心死人。唔係話會多人欣賞，而係好似帶壞一個學生咁，好好一個網站，從未如此爛文過，諗起都過癮。

詳情可見 聖誕交叉blog

睇下個lists 咁長就知正!

* 窮媽媽富媽媽
* bacakara
* 許港生
* 魔少
* doodoodoochang
* 學霖
* Karen
* 小小CPA
* 簡單田
* 湯記
* ClubEddy
* 尹思哲
* 悟樂
* 巴林
* 大口仔
* 卡臣
* Desertfox
* the8
* 小石頭
* Enigma
* 五師兄
* Justin
* C.M.
* 孖瑩
* 黛
* skyx
* Zoe 豬
* 火鶴
* 李小龍
* Hana
* 億利
* Miss D
* 市場維京人
* Genius Leung
* 南區肥龍
* 石先生
* 數奇門
* CK
* 馬沙
* 野蠻郡主
* 渣估
* BabyMonster
* Marshmallow
* 小鎚

有強姦無侷賭

近日有藝員於澳門欠下80萬元賭債，連累電視城外牆、家人寓所外及經營的咖啡店被人淋紅油警告。

----------------------------------------------------------------------------

欠債還錢，天經地義。年青人誤入騙局，輸掉血汗錢，錢可以賺番，但影響家人同朋友先係最大問題。

記得細過識得一個人同藝員咁岩又係同名同姓，唔知係唔係同一人。從來都話『輸錢皆因贏錢起』，咁大個人有時真係要學識『say no』，三思而後行。

記得自己未夠18歲已經試過賭馬仔，初頭實有少少甜頭，結果都係輸番晒。從此明白自己無咩賭運，穩穩陣陣先係生存之道。

經一事，長一智。

年尾小結

踏入12月，又係一個總結。咁又一年，轉眼又過左廿幾年，都咪話唔灰。

記唔晒呢年定左咩目標，只係知有好多都唔達標。

話詳要儲錢買多幾手大笨象。呢刻HK$8X都唔敢亂買。唔係唔知大笨象出名穩陣，但幾穩陣都會有風險，無理由將所有蛋放晒係一個籃。最慘係呢期，有錢都唔敢亂投籃。

今年無詳學過新野，只係叫學識左玩 3 X 3扭計骰，完全係零成長，又話者開始明白，學埋咁多無謂野，但又唔係有專業資格，結果等同晒錢。

工作上叫做穩穩陣陣，餓我唔死，發我唔起。工作量同外界相比，已經係超級舒服，嘆慣世界，自然令自己懼怕轉變，轉得好就好，轉差左都唔知可以點。公司走左好多朋友，好多入職時相識既都走得七七八八。現在返工真係望住個Mon過活。

家庭既最大轉變，就係估唔到會上左車。由年中開始攪，年尾由裝修到入伙，只一舜間既事。不過放工回家一片漆黑，再望住四面牆，都咪話唔悶。開支又係另一個問題。昔日食住屋企，今日咩都要靠自己。一個金融危機，令到自己都充滿危機，畢左業咁耐，除左叫做有少少工作經驗，其實都無咩渣係手。一個唔好彩被裁，出到勞動市場，真係無乜競爭力。

朋友圈開始停滯不前，舊有既開始少見左，新相識既又硬係好似唔係幾投契。今年重要特別多朋友結婚，或者宣報準備結婚，個個都開始進入搶閘既日子。不過出席某某既婚禮，就係最好既聚舊飯局。平日無咩點見，去飲就大家都有得見。

呢幾年唯一無改變既，係跑步既日子，仍然努力維持。記得初期，跑步係為左訓練體能，為左參加毅行者。現在開始慢慢變為生活習慣，開始享受每次跑步既機會。不過人總係懶散，總係會比籍口自己。

-----------------------------------------------------------------------------------



深水埗電腦節繼續逆市刷新銷售紀錄，隨着周日再有12萬人入場掃貨，豪花5800萬元，銷售額累計3天已達1.7億元，「肯定大破去年4日1.8億紀錄」。

-----------------------------------------------------------------------------------

電腦節勁賺，証明左香港人其實大把錢，只係你引唔引到佢洗錢。講真有用開科技產品既人，正常屋企都已經有Mon、有電視。返到屋企無得上網，重慘過叫佢去死。根本唔會等到電腦節先來入貨。

幾十蚊有一隻USB手指，幾百蚊有相片打印機，幾千蚊已經乜都買到。呢一種富豪走入名店掃貨既感覺，呢幾日係深水步就可以享受到。

不過話分兩頭，能夠係大時大節，買少少野乙水下自己，都不失為逆景中，少少既自我鼓勵。

小狗的執著

搬家後，小狗出奇地硬頸。雖然飯照食，水照飲，但就係一直唔肯安定下來。時不時隔離左右有咩風吹草動，開門開閘，都一定要去門口視察下。昔日都未試過咁勤力，估唔到家下先來個資源增值。

其實小狗同人一樣都係怕被遺棄，但又無力反抗。日日唔係食同訓，其實就係等家庭成員出現。

搬家第二階段

搬遷工程進入第二期，今次主角係老狗。記得小狗細細過已經跟住老爸，真係老爸咳一聲都會仆過去望下。現在老狗要搬家，家人當然唔會怕，因為明知距離不遠，成日都可以再見。

最煩係老狗根本唔會明，明明好好地住大屋，有人照顧、有人畏飯。現在要開始轉換環境，都唔知慣唔慣。有D似狗到中年先來折墮，又無力反抗，又無得爭取，只有默默承受。不過換左新環境，可能生活圈子會好左，又可能有機會識到其它狗女，焉知非福呢!

--------------------------------------------------------------------------------

不過呢期可能頻頻樸樸太多，昨晚跑完步沖過涼又要仆回老家吃晚飯。初期都無乜野，但坐多陣開始覺得唔係幾妥，開始有d作嘔作悶，差d以為自己有左! 結果返到屋企，即時做好準備，擺定杯水係書枱，放定個盤係床頭，有咩唔對路，都唔會嘔到周屋都係。十點已經爬上床，一路聽收音機，一路wing wing 地。不過好彩今朝起身，又回復狀態^^。

---------------------------------------------------------------------------------

呢期好似唔係幾順咁，又收到個壞消息，有同事家中有大吉利使野。自己也即時反思下，如果有朝一日輪到自己，有無能力去面對。平日家人幫自己就好似老逢，自己幫屋企少少就話唔好。

朋友就是治病良方

病向淺中醫

昨日喉嚨痛到連吞口水都痛，根本無晒食慾，訓又訓唔到。結果今朝都係偷偷地係辦公時間鼠去睇醫生。連醫生都奇怪點解會發炎到咁紅，以為我有咩暗病。

就係咁醫生比左兩日藥同一樽咳水。唔食又只何，一食即時『睡魔』上身，差d失去知覺。最慘係今晚重有野要做，呢刻都唔敢再食d藥住，怕真係暈左係馬路中心都唔奇。

-------------------------------------------------------------------------

話說晚上係朋友仔既大日子，幾唔舒服都要比面。為左做好準備，到場前已經走左去『海皇粥店』食碗白粥、食碟齊腸填下肚(無法子啦，病到咁，唔戒口掂得)。不過一路食就一路呻救命，個喉嚨好似就快爆咁。

差唔多夠鐘，點都要頂硬上。去到見到好多舊朋友，明明唔飲得，都要飲番少少紅酒過下癮。出奇地身體放鬆左，病都好似好左D。

睇見身邊既朋友，一個二個都過得幸福，有時都幾羨幕。

祝 朋友仔身體健康，白頭到老。

大吉利使

都係自己胃食，昨日忍唔到口，一個人食左十幾粒牛肉乾。食完飯都未落格，又嘆左份百福凍豆花，之後重要食埋個凍雪梨作宵夜。

結果訓訓下覺已經知出事，個喉龍鬼咁乾，吞口水都痛。結果成晚就係咁過，第二朝起身好彩未見有傷風同肚痛。如果唔係真係有排煩。

唔知係呢排操得太行，跑步凍親加埋食生冷野問題。定係新屋問題，搬左入去都唔夠一個星期已經作病。不過呢，凡事應該要向好既方面諗，係自己唔戒口，無得怨天尤人，話鬼閙神。

聖誕同新年呢d大日子，就算點唔玩，都避唔到會食下自助餐，打下邊爐仔。希望腸胃生生性性，唔好成日扭計。

拖著紙皮的日子

為左執屋請左假無返工，呢個市勢請假都要抱好大決心，真係唔知遲下重有無工開。

呢一輪，尤其係放工時段，睇住男士西裝骨骨，女士短裙飄飄。自己就差唔多日日都係拖著紙皮同膠箱往來。唔知情既人，可能真係會估，加下後生世仔都要同阿婆爭飯食。

最弊係，市道幾唔好，紅色炸彈一樣日日有驚喜。數數手指，兩個月都唔夠，已經要飲三餐。就算係公價五舊，都唔左大大隻金牛，都咪話唔赤!

柴米油盬醬醋茶

終於都正式搬家，一架貨車，廿箱雜物，一陣風咁就又街口搬到另一個街口。

老媽子教路，食過燒肉，拜過四方，新屋入伙，但求身體健康，事事順利，大吉大利。

自己都有自己個方法，就係即係走落街，跑番課步，但願日日好腳頭，一路順風。

---------------------------------------------------------------------------

不過搬開左，都有煩惱架。間屋鬼咁靜，唔開電腦既話，真係靜個自修室。空間多左，但開支都大左。所有家居用品，上至食物，下至潔手液，都要自己一手包晒。小數怕長計，看來我都要化身『C 9』，周圍格下價，做個無錢既消費者。

---------------------------------------------------------------------------

不過所謂大屋搬細屋，唔見一籮穀。一日都未過，就發現唔見左，平日用來跑步既計時錶。話晒隻錶都跟左我超過十年，今次已經係第二失蹤，希望可以搵得番啦!


半小時後................

真係唔到你唔信邪，明明搵過幾次都唔見係個袋入面。但過多一陣，佢又會自然出現，呢d咪叫『百厭』law。

讓我們認識更多朋友

日本漫畫足球少將出左幾十年，真係由細睇到大。

記得由中學開，已經唔鐘意打籃球。可能自己生得矮，無謂自暴其短。踢波就唔怕，你睇老馬同美斯咪一樣咁威。

結果細細過已經落維園踢波，最遺憾係唔可以有一班由細踢到大既波友。年紀大左，更加珍惜有波既既日子。無天份，無技術，呢刻都可以用體力搭夠。他朝老左，唔通要好似d維園阿怕咁，圍圈搓波咩!

呢大半年，好彩又識番個波友，間中都可以有波鬥。雖然場場唔同隊友，無咩默契可言，但有得鬥重好過坐係屋企打Winning啦。

坦白講一向都相信男仔普遍都係好勝動物。乜都鐘意鬥，單打獨鬥，團體群鬥。讀書時代比d朋友當係垃圾球員，踢垃圾時間。今時今日都好想可踢番場爭氣波。通常倒弋相向既，都會有好表現架。

唔知幾時有呢個機會?

其實除左希望踢場好波外，踢完波可以一大班朋友，坐埋食杯汽水吹下水，食餐便飯串下嘴，比你去一田瘋狂購物更開心啦。

『傻客』刺激經濟

如果真係相信，明年經濟會更差，失業率上升，大公司日日裁員。呢兩日放完假，明天返工可能連個位都無埋‧咁係咪應該要減少消費呢?

呢兩日游完水都經過SOGO，照舊上去打個白鴿轉。層層都減價，但無樣野係想買，同真係要買。淨睇唔買既叫『遊客』，攪攪陣唔幫襯叫『衰客』，真金白銀出手先係『顧客』。唔少重係一袋二袋，係唔係真係咁抵?

記得SARS年期，周街都平貨，越遲買越抵。如果照咁推論，明年都未到，就洗晒明年既quota，咁係咪叫『傻客』呢?

人肉搬運公司

成日口口聲聲話，唔好太辛苦啦，等正日先搵師傳搬啦。

結果呢?

差唔多個個星期都人肉送貨機。好多怕打爛，但又一d都唔值錢既，都係人手搬運。最衰自己無車，同埋唔識裝櫃。如果唔係真係可係call架雞記，一箱箱紙盒車走咪得。

除左新屋，舊屋呢邊都要大翻新。好多家俱都要移位。一家人假日既節目，就係執野同搬野。最犀利係連兩張床同兩個大櫃都係靠自己。

要走既野都執得七七八八，欠既都係電腦。不過電腦一向都係最後防線，臨走前一晚先入盒都唔遲啦，如果唔係呢幾日點過，哈哈。

尚有十一天

唔經唔覺六月開始到十一月，好似轉眼就過左。中間發生左一件可能改變一生既大事。有邊個估到年初明明歌舞昇平，年尾會爆全球股災。一個唔覺意，如果市道再差，小弟隨時由上車客變負資產。真係未搵到第一桶金，已經比市場打你一獲甘。

年初一直埋怨工作不如意，大不了轉個份工，今日慶幸每朝仍然要返工。細過一直想過私人生活，呢刻反而陪多左家人。

所謂迫上樑山，做唔做英雄好閒，保住收支平衡先至煩。

------------------------------------------------------------------------------------------

執執下野，先知自己一個人都執左廿個紙皮箱(重未計衫褲鞋襪)。唔知男仔來講，算唔算有點兒過份?

搬走左，生活上好多細節都會有所改變，不過懶散既性格不變。可能好快新居都變戰亂區。哈哈。

-------------------------------------------------------------------------------------

前日聽完架勢堂，講開享樂主義。森美話60年代、70年代、80年代同90年代出生既人都好唔同。

60年代未出世唔知生活點。自己算係70、80年代既中年人，算係未捱過最辛苦既日子，又未試過90年代普遍豐衣足食，要乜有乜既歲月。

成日有人話90年代既年青一輩，過份貪求享樂。日日追名牌，季季換新裝，年年去旅行。學老爸成日嬲:-『飯來張口，錢來伸手』。

其實現實係唔係咁，自己真係唔知(皆因我唔係90年代既人)。不過眼見好多年青人，真係好鬼有米。記得細細過自己好想有架搖控車，真係恨左好耐都無。誰不知某年表哥生日，老爸竟然買左架車送比表哥。個刻真係好唔開心，唔明點解，自己個仔想要就唔買，送比人地個仔就貴一貴都唔怕。結果成為左一個童年遺憾。

不過人生總需要一點遺憾，先會讓你記得。講真好多細過既野，我真係唔記得。唔知係咪失左憶，有時感覺真係一片空白，可能好似MIB咁，自己比人洗左腦都奇。

反而呢，好多唔開心既事，反而會令人回味。昔日既失落，今日睇番，其實好閒事。唔好話搖控車，衰衰地真既都可以租架來玩下。只係感覺唔同左，呢D就係點點童真。

森美又提到，年青一輩完全無儲蓄習慣。出糧唔係個個月清，都見得有錢帶落袋。其實有D似美國式生活。一味鼓勵消費，有咩事政付會出手。同樣地自己既老爸老媽捱過艱苦既歲月，將心比已，無咩邊個會想自己既兒女同樣受苦。自自然小朋友一出世，爸媽唔食都盡量滿足佢地。咁又算唔算係一個社會問題?

當然唔係話人人要過『苦行憎』既生活，但間中一個反思，未常唔係一件好事。

加操!

昨晚查到朋友再一次成功完成100公里，自己都要比心機。今日見天氣咁好，又小小涼意，即時加緊操練。

大約跑左15公里，時間同體能有待提升，但鬥志明顯係比友人既毅力感染。

『不退縮，因為有信念』

「100km毅行100%扶貧」

今日又係2008樂施毅行者既大日子，自己雖然退左役，但都會繼續支持同鼓勵所有上山既毅行者。

自己同自己比

兜兜轉轉，呢幾年都學過唔少課程，有d 係貪得意，有d係見有政府比錢，所以唔志在。不過望翻轉頭，其實好多都無詳專業資格。唔只係晒錢晒時間，甚至乎可以講係可有可無。十幾歲就望早d畢業，廿幾歲就望搵份好工，快到三十歲，反而唔覺有咩大成就。養妻活兒未有本事，考順父母都係得過且過。尊重朋友等於見到唔見，行街唔買野，假日唔想出街。遲下搬埋屋，可以宣怖正式歸隱山森都似。

不同生活背景，有不同生活壓力，擔心源自比較。人同人既比較，朋友同朋友既比較，甚至家人之間既比較。到外國旅遊既日子，曾經好羨慕農村既生活。十幾日旅行既日子，無得上網，無得打機，唔會日日追劇集。日日都係自給自足，生活簡單到無得再簡單，因為根本手停口停，但反而無咩比較。因為當人人都窮，打開晒大門都無野比人偷時，重點洗比。

反而返到香港，忽然覺得生活好緊迫。好似自己唔學埋人地咁急，就係浪費左時間，浪費左青春。有機會早放工，靜靜地一個人係屋企上下網，聽下收音機，其實都唔係咩問題姐? 做乜攪到好似要自已怪自己，呢d咪叫『心魔』。

正所謂各有前因莫羨人，食幾多著幾多，除左整定外，自己都勉強有得揀吧?

生日會

今日晚上食左餐生日飯，不過唔係同朋友慶祝生日，今次係老鎷子60大壽。估唔到日子真係過得咁快。祝願家人同自己都身體健康，幸福快樂。

手機、上網月費

由中學離開用『call機』既日子開始，手機上台由和記→Sunday→新世界→數碼通。電話款式都轉過幾次，唯獨電話號碼算係與我常在。

一路都以為交唔足一舊水月費已經算好抵。誰不知一問之下，身邊有唔少朋友、同事都係交緊幾十蚊一個月，有D誇到$38乜叉都包晒。自己交一個月等月佢交三個月，重要自己D分鐘長期係用唔晒，你話死唔死。

經濟不景，節省開支既其中一個方法，除左減少不必要既娛樂，即時都那那淋周圍格下價，盡量減少埋基本生活開支，俗稱fixed costs。不過自己都係怕事同怕煩，最後都係打番上台自己cut 分鐘同爭取每月減多廿蚊就收貨。簽多15個月，每月$60，但無左好多分鐘。雖則我都唔會點用，但感覺好似比人厄左咁。

------------------------------------------------------------------------

攪完電話費，又到上網月費。返到屋企無得上網，真係等同叫我去死。最好既計劃，當然係一搬屋個日就有網上。自己都計足時間，今日落街問下sales報下價。唔知係唔係自己口材唔好，定真係唔夠煩，硬係覺得攞唔到D咩好offer。重要比個sales坤左我簽足30個月，兩年半後都唔知係個咩世界了。

網上爬 6M

寬頻電視 2 個台 (新聞 & 電影台)

一個月試用XX，兩個月室內wifi，6個月室外wifi，

超市 $100現金卷，4G USB手指，2年使用F-XXX防毒軟件

其實諗諗下，佢送既野好多都無咩用，都唔知做乜會比佢厄簽多6個月約。

執玩具先

終於都進入執屋既階段，自己性格一向都唔鐘意臨急臨忙。雖然有排都未搬，但一早已經想快快手執好晒D野先，攪到間屋鬼咁多膠箱同紙皮，行兩步都無位咁就岩晒。

尤其係星期六、日，無咩街去，最好都係慢慢執下野。其實搬屋都有一個好處，可以搵番好多年都無拎過出來既野，再掉左佢。平日見佢唔到，咪比佢繼續安穩渡日，今時唔同往日，一唔順眼就預左無得留底。

不過咁多野唔執，我竟然都係先執左D玩具先。可能對我來講，呢D先係最重要既財產。

雖然D玩具無一樣係值錢，無一樣係特別版，但就係記錄左自己咁多年既回憶。當年一件件咁帶回家，拆開包裝，就代表左一個生命的開始。

練跑過程

睇左肥龍兄話

At least he never walked

我自己補多句

At least I never stop

-------------------------------------------------------------------

自己都寫底自己個練跑經過，等第日老左都可以回味下。

其實自己個方法都幾蠢:-

方法

1. 首先唔好理幾長，重之每星期keep住跑 45mins，幾慢都keep 住跑...。

2. 當 45mins 唔再係問題後，就開始比target自己，例如45mins要跑兩個公園...etc....。

3. 忽然間有一日，你會發現每次跑45mins都唔係幾夠喉。咁就加到上1hr。

4. 如事者又重複 1至3。

5. 當1hr重有貨賣時，又加多15mins，每15mins咁加上去。

唔好睇少個15mins，我自己可能天份所限，足足用左大半年，先由1hr加到上1hr15mins。

PS 重點係一加左時間，就點都唔可以減。幾辛苦，都要跑埋佢....。

每15mins加上去，就可以等自己個身体漫漫適應同練出耐力。

----------------------------------------------------------------------

痛左一個星期既腳患，今日踢下波，跑番鬆D筋。呢家又出奇地舒服。人體有時真係好奇妙，自己越係擔心越係難康復。心理療比藥物治療重要，可能就係咁解。

----------------------------------------------------------------------

腳患纏身!

唔知由幾時開始，雙腳間中都會赤赤痛。有時係擦損既痛，有時係扭傷既痛，最難攪係雙膝軟組織既痛。

其實自己知自己事，好多都係舊患。唔知第日老左行動唔方便時，可能痛到叫救命都似。最高峰期，自己真係準過天文台，未落雨前雙膝已經有預知能力。咁後生就『風濕』，幾時先捱到老呀?

不過做人有事就係咁，明知不何為以為之。鬼唔知唔郁唔成，日日坐定定咪會少D傷囉。但就係腳痕，早幾年唔係去跑步，就係去行山。重要唔係行一陣，加加埋埋成四、五百公里。呢幾年收歛左(最主要係懶左)，無再咁摶。間中都係踢下波，結果雙腳都好左。

運動員生涯好短暫，能夠係有心有力既時候，應自己既興趣去好好做下運動，比買多多野更有意義(當然我係無錢買名牌先咁講)。

自己好佩服尹約基先生同佢個領跑員。可能一時間你唔知佢係邊過，但一講到『看不見的跑手』，你就點都會知。

三十幾歲人，咩運動員黃金時間都過晒。不過尹生都講過，知自己既行動，可以鼓勵同幫助更多有需要既人，咁已經係佢繼續跑既動力。

跑完步出番身汗，再慢慢行番屋企，嘆杯冰水，其實真係爽過"隊"『孖啡』。

黃毅力 CEO實戰手記：十大重要技能

一向都好鐘意睇CEO黃毅力實戰手記，難得有一個有錢但思想正面既商人。發財立品係人都識，不過如果唔係真係發自內心，其實好難厄到人。每星期簡簡單單四、五百字話易唔易，但要寫得好真係幾蝦人。

--------------------------------------------------------------------------------

今日都市篇文，十大重要的技能，自己又做到幾多呢?

完文節錄:-

---------------------------------------------------------------------------------

(一) 關愛的心，我們需要極盡自己之所能，不計較地去幫助別人。

阿里路也! 阿里路也! 要成為正義既朋友真係唔易，尤其是對隱閉青年來說。

(二) 常懷感恩心，不僅憐惜身邊事物，還能平撫欲望和爭鬥

知足常樂，平凡是福。有時唔到你唔知足，又唔到你唔奮鬥。命運總會推動你向前走，不論走岩路，同走錯頭，結果總在未來等候。

(三) 學懂化解兩種苦，得不到的苦，鍾情的苦。

好似買股票咁，越溝越化。

(四) 學會忘記，經過一次挫敗，就長出一次智慧的種子。有些苦痛和煩惱得要默默地承受。

Learn from mistake 係千古不變。但要記住mistake(s)係無(s)，即係唔可以錯得太多。

(五) 學懂放手，當你無力把握命運，就要學會放手，給自己全新的開始。

唔識答

(六) 習慣儲蓄，要培養出儲蓄的習慣，在逆境時置業，在順境時不要過度消費」。

初頭睇有d矛盾，不過諗深一層又幾似自己既處景。

(七) 樂在工作

要在工作中尋快樂，先要唔好『沉』，咁先有機會研究點『尋』!

(八) 愛在學習，讀書和學習都是我們智慧累積的點滴。

每日返工放工搭車睇都市同AM730算唔算，上網睇人寫Blog 又算唔算?

(九) 懂得音樂，從小學懂一種樂器。

連唱K 都唔鐘意既人，真係無咩音樂天份!

(十) 習慣運動，善用時間去運動、從而保持青春，活力及健康。

呢點算係做得最好，起碼暫時都無放棄自己。

球迷奇遇記

細細過踢波，短衫，短褲，白飯魚，加樽水就飛去球場。如果著到成身波衫，但又無技術，實會比人笑扮野。

但唔知由幾時開始，波衫變左唔再係球員先著。甚至乎我覺得球迷著波衫重多過球員著。各大球會都好醒目，年年轉款，年年加D減D，換下色，就可以賣過滿堂紅。

記得細過，間中都會係D運動鋪，執到平野。又唔知由幾時開始，變到清一色公價HK$459或以上。咩球會，咩國家，都有貴無平。如果要印埋號碼，印埋球員名同聯賽章，一件衫可以去到九舊水都大把人買。一年四季，不論好波同唔踢波既波衫都係日日照著。

當然有某D波衫，就算平一平比我，我都誓死不會著。

無他既!

球迷情義結吧!

--------------------------------------------------------------------

自己鐘意左『紅魔鬼』好多年，由細到大都好恨有一件自己球會既波衫。硬係覺得，無番一兩件，好對唔住自己咁。可借四百幾一件，真係買唔落手。買左唔印字，又唔型。印字呢? 又唔知印邊個好，自己鐘意既球員都差唔多退晒休，一係離晒隊。

計計條數印齊晒野，HK$799埋單。踢一場衛生波都要七百蚊，香港人幾時變得咁富有?

看來自己件波衫，都係繼續等，可能到老左，無氣無力無波踢時，先買番件同D波友仔鬧下氣，串下嘴。

----------------------------------------------------------------------

好羨幕人地有一班由細踢到大既波友。由屋村仔街場，踢到有埋仔女，有家庭。

自己中學時代開始踢波，由三五成群，到大學又識到另一班波友。可惜係今時今日重有踢開既，真係二隻手指數得晒。

現在踢衛生波，離唔開都係朋友帶朋友，落場可以好夾，但完左場其實大家無咩交流。

不過次次同唔同人踢，都訓練到自己既適應性。自己唔係技術型球員，簡簡單單一腳波就算，所以都唔算難夾吧。不過都曾經幻想過，如果細過有球朋友，一路夾十幾廿年，真係唔出聲都識走位，其實真係一種福份。

人到中年，希望而家踢開波既一兩個朋友，繼續係好朋友，第日老左，著住不同既球會衫，都可以出來聚一聚。

鰂魚涌公園

嘆完個下午茶，見個天停左雨，第一時間仆番屋企換跑鞋落街操番課。涼風陣陣又唔曬，唔算太熱又唔凍。其實係幾好跑，不過如果可以再涼多少少，咁成績一定會再好D。

自己無咩點去計時或有咩儀器check心跳或跑速，次次都只係一支水上路。同平日差唔多都係跑十公里左右，無飲個水(當然有帶水)。可能真係天公造美，一跑完先落雨。

唔知由幾時開始愛上左跑『鰂魚涌公園』，由消房船搬來到今日，『葛量洪號滅火輪展覽館』，真係唔知跑過幾多個晚上。間中會遇到好多熟口熟面，但又無傾過計既跑手。可能大家目標都唔同，不過感覺就好似一齊練習咁。

熟客仔

新買個部 Notebook，用1G Ram 行 Vista真係有點吃力。不過睇暈晒成本說明書，上網查埋，都唔知自己部機個配置係點! 可能呢樣就係大陸野，被其它牌子比下去既地方。

最後自己都係拆開機底，抄底number上網問人。當然穩陣D，都會去其它門市鋪頭扮下街客，摶個Sales會詳細解釋比我知。

當然點都會靜靜雞走番去買機間鋪望下。不過估唔到個Sales一早已經認得我，連我買左咩型號都講得出。即係一早知我係來攪攪震，無幫襯。好彩佢都算好人，肯幫我問一問，遲下去腦場都唔怕買錯RAM。

渣打馬拉松 2009 開始報名

渣打馬拉松2009，又開始報名啦。10月31日前報名會平D架。

未玩過既朋友，真係要親身試下。跑開既朋友都要快快手決定報咩路程啦。

如無意外今年自己會繼續跑『半馬拉松』，希望做番好個成績。

不過今年，自己都未開始加緊操練，反而踢多左波，一星期三場，呢期狀態真係提升左唔少。希望keep 住個態，同唔好受傷。當然最希望有朋友陪跑啦!

不過我相信:- 『渣打路上，總會遇上』

----------------------------------------------------------------------------

記記下

2005 Feb 27 開始第一次跑 10K 1hrs 15mins

2006 Feb 16 跑半馬 2hrs 13mins 42sec

2007 Mar 04 走左去摶全馬 5hrs 31mins 06sec

2008 Feb 17 跑半馬 2hrs 20mins 17sec

2009 Feb 08 目標係兩小時內完成!


不過唔知有無朋友知，點先可以克服比賽前一晚訓唔好既壞習慣。咁多年都無變過，無論係渣打，無論係毅行者，都係咁。反而細過考會考、高考，又唔見我咁緊張。

----------------------------------------------------------------------------

Blog 上的跑步友:-

On Dog 兄

肥龍 兄

Lenovo

老爸媽又打殘左部電腦，今日去左好多地方格價同睇機。原本明明想買件曼聯波衫比自己，結果反而買左部手提電腦比家人。

講開電腦，屋企咁多年都唔知換左幾多部機，細細過阿爸用成皮野買比我學，估唔到今日到我用四千幾回贈番比佢。其實手提機當家庭機用都係第一次，不過長遠計自己第日回家都可以有機用，咁都ok既。

由 Dos→ window 3.0 → 98 → 2000 → ME→ XP →VISTA。估唔到老爸學用VISTA重快過我。

給你1萬元你會買什麼？

名校刁鑽小一面試題 網上熱傳 「clinic與hospital分別？」 「給你1萬元會買什麼？」
-----------------------------------------------------------------------

唔好話D小學雞，你呢刻問我，我都要再三考慮。

一萬蚊話多唔多，但要買野又唔係可以買到好多，起碼中人壽，中移動，都買唔起。用來買錶、買袋明顯又係有個樣買個樣。

如果真係比我揀，我會考慮(HK$3500)買部手提電腦比阿媽，細細部又慳位。不過我爸媽長期電腦病毒上身，明明都係上下網，check下email，咁簡單。但唔知點解硬係可以成日整壞部機，唔通真係天生同電腦八字唔夾?

餘下既錢，我想用來買個櫃。睇中左一個書櫃(HK$1,580)，如果唔係有免費錢，真係唔多捨得買。

重有四千蚊，離唔開都係同家人食餐甘，同買下小家電。

數數下，自己真係好似變左個阿叔咁，年青玩物，唔好話唔想買，連一個似樣既袋都無個。漸漸開始只係想買D好野回家，整靚自己未來個家。

總結一句，如果面試真係有人咁問我，有一萬蚊你會買什麼?

我會話，買個靚屋企回家啦!

中學波友

由細到大都鐘意踢波，雖然細過係接觸籃球先，不過好快就知自己唔岩打波。

而家好好彩，識到一兩個朋友仔。間中都會有衛生波踢下，一兩個星期有一次，當係做下運動。記得自己細過踢波好屎，而家都唔見得好。不過呢幾年，體力係好左，球路都好左，開始學踢老鬼波。

踢完波，最開心都係一大班波友去茶餐廳飲杯野，吹下水，講下邊球邊腳有幾好、點樣點扭必入波。

今日都係同朋友仔坐底飲杯野，傾下近況，講下家庭同事業既事。有時簡簡單單既一陣，已經比去飲多多次酒好好多。咁當然去飲野，有機會識到女女，去街場來來去去都係識波牛。

三聚氰胺

由『伊利』、『蒙牛』開始，估唔到今日發現『樂天熊仔餅』都有事。尤其係特濃朱古力味，實為本人至愛之一。大吉利使講句，如果連『維他奶』都有事，就真係大檸樂啦!

講開熊仔餅，最記得係六角形包裝，一望就認得。

記得小學時期某年聖誔節，學校有party，包括有交換禮物既環節。唔係好記得當時既人同事，只係知自己買左盒BB戰士。返到學校，老師無話點安排交換，最後都無安排過。

臨差唔多放學，其中一個朋友仔提議用佢手上既野同我交換。一睇個六角外形就知係乜。自己當時第一個反應係，唔換呀，>_<"，點會肯用我盒玩具換你盒朱古力，唔抵呀!

唔知當期時個同學仔有咩感受，只係依希記得佢當場拆包裝紙食左佢。如果換轉番係今時今日，如果同樣事情發生，我又會唔會有同樣反應，同樣唔肯換呢?

-----------------------------------------------------------------------------------

溫總話 - 『企業家要流著道德的血』

記得讀過好多管理課程，尾尾總會有個topic 叫Ethical。點解要放係尾尾，唔係因為重要，感覺只係草草講過就算。攪商業既，有幾多真係講道德唔講收入呀!尤其係大企業，上邊幾咁發財立品，下邊既人都未搵夠，點會同你講道德。

不過估唔到衰到要攪出毒奶粉事件，重要唔只一次，唔通真係唔信舉頭三尺有神靈、善惡到頭終有報?

下一個世紀，可能人類係比自己攪誇。無可信既食物，無可住既環境，無可生存既空間。

『天作蘗，尤可恕。自作蘗，不可活』!

樂極生悲

深圳發生當地15年來死傷最慘重的火警，一間無牌經營的歌舞廳突然起火，現場窗戶密封，逾千人擠在狹窄通道人踩人逃生，至少有43人死亡.....

---------------------------------------------------------------------------------

一向都好怕呢D新聞，好怕有一日會發生係自己同身邊既人身上。其實開開心心慶祝，點解要攪到無命返屋企。

細過都試過玩通宵係咁飲，不過自己多數笠水，盡量可以唔飲都唔飲，不過有時比人局飲真係幾慘。睇住某D朋友飲到嘔，飲到大肚腩，飲到胃出血，飲到唔知自己發癲係街咬人都有。

唔知又由幾時開始，興左返大陸浦，可能宵費平D，女又開放D，最主要係離家遠D吧。自己就無上過去見識過，甚至係香港都無正式落過Disco。

離開左校園，接觸既又係新一批朋友。層面唔同左，局限性同選擇性都大左。唔需要因為怕得失邊個而更硬出現。而家唔想出就唔想出，甚至長期唔浦頭，足不出戶，點約我都唔出，正式成為自閉一族。感覺生活攸閒左，健康左、同家人溝通多左d d。

-------------------------------------------------------------------------------



因為有電影上關係，令我認識左套漫畫叫『20世紀少年』。畫功唔多得，但故事性幾高。兒時一大班人既吹水預言，竟然會係日後毀滅世界既開始。

鐘意既唔只係故事得意，而係故事入面一大班兒時活動既一事一物。細過其實好恨有班住係左右既朋友，可以成日走落街傾下計，踢下波，打下機，簡簡單單‧可惜往事不可追。

雞脾打人牙骹軟

今日中午，靜靜雞走左去茶樓攞位同叫定野食。請左三個同事食番餐。其實一來係為左開心，二來人地都請過我唔只一、兩次，自己點都要做下主。記得細過讀書，有篇課文叫『請客』。大家都係有目的，都係以小摶大?

咁又唔好講到咁衰，大家都係同事仔，間中請下幫過自己手既人食餐飯仔，其實都係答謝之一。

勤力做野無回報，閒時偷懶人工高。

打工仔心態 第二回

1. 頭三個月返工，無野做會搵野做，第一個月比家用屋企，竟然都要閃閃縮縮，其實都唔知驚乜?
2. 過左試用期，好開心咁請家人吃飯，一心諗住可以創一番好事業。
3. 日子耐左，做熟左，明白公司邊D係人，邊D係鬼，自己要學好定位。老闆都開口叫我講多兩句，自己仍選擇做自閉仔。
4. 唔經唔覺就過左四、五年。由金融風暴既影響，到經歷SARS日日擔心返工，起薪點比人底，點加都唔及其他朋友仔係出面三日唔埋五日轉份工。
5. 好多舊同事，都決定走人。有D做左超過十年，可以話有得有失，佢地既離去，又間接造就左我既升調機會。唔係話黑心，只係唔明點解公司高層唔識留人，好既由佢走，衰既日日留。
6. 呢期有美國金融大危機，越大間越大鑊。反而中型公司仔，按份守己，可能可以避過一劫。
7. 其實無人唔想做大公司，不過公司大，自然歷史問題多，根本無得點改變。除非爆一單大鑊野，如果唔係邊有人有能力連根拔起。
8. 加左人工，加幅比預期多，當然無得同轉工比。但總算叫有得加，好過無得加。呢幾日心情係好左，不過希望呢種積極既態度，可以繼續維持。

請人

自己唔係老闆，又唔係HR出身，更加無請人經驗。不過公司請人，係唔係真係千遍一律，永不改變呢?

有D老闆好鐘意請靚女，全公司都係靚女。就好似銅鑼灣時代一間賣女性裝飾用品既鋪頭仔，可以話美女如雲，有時行過都覺醒神。

反觀有D古板老闆呢，尤其係女BOSS (唔好話我偏見)，硬係鐘意請D有幾怪得幾怪，差唔多個個女員工都一個餅印咁，你唔講我重以為係一家人。

其實呢D係咩心態呢? 唔通怕請個靚女回公司，D男同事就會唔專心返工? 就會日日為女死、為女亡? 又話者公司清一式一個系列，員工就會專心工作?

老闆，唔好咁天真啦!

其實男人都係衰，呢樣我認。靚女叫我幫手，我幾忙都會盡力幫下手。公司多番一兩個靚女，員工返工又開心D，工作效率都快D啦。有邊個想係靚女面前認無用架，點死都死掂佢啦。反觀一返工已經死氣沉沉，真係望個Mon都好過望人時，又點會做得好呢!

我認我腐淺! 之旦係我返工除左為左份糧，都想有一個好既工作環境。就算唔係全層都係酒池肉淋，起碼都唔好個個街市賣菜咁款。

好同意一句說話:- 『世上沒有真係好醜的女人，但實在有太多懶既女人』。

我實在太衰，完全唔識欣賞，一個三十歲都未到既女人，可以著到八十歲阿婆咁款返工。返工唔係手執市款公事包，而係一袋二袋百佳、惠康，牛肉、豬肉、生菜、生果。更加可以大模斯樣一份份，咁放晒係枱面，話要吸收新鮮空氣wow。

頂 !頂！頂！

點解我會入左間咁既公司，係唔係我真係咁天煞孤星，唉!　

月餅

越大個越少食傳統月餅，單黃，雙黃，甚至四黃都好，對我都唔多吸引。因為由細到大我都唔多鐘意食黃。咁多年都係食蓮容多個食黃。

呢一兩年，可以話係冰皮既世界。無他既! 今日天文台話有成33度，史上最熱既中秋節，再係咁落去，真係人都溶。

記得中學時代，中秋會同D同學仔出下街‧唔知有幾時開始，都係留在家過日晨。今日同阿爸媽飲完早茶，去左幫阿爸個朋友排隊等籌。雖然唔係等左好耐，不過幫人擺枱飲茶，都算係第一。

期間見到對面有個靚女，好鬼sharp。一望就認得佢係同大廈既，不過咁多年，招呼都無打過。可能佢知我係咁望住佢啦，佢都唔好意思，又睇下報紙，又間中bear番我。

無法子啦，一個人無野做，又唔可以叫野食，連水都無得飲，咁唔周圍望下，想唔望都唔得啦。重要難得係有個靚女，點都會偷望多兩眼。

----------------------------------------------------------------------

中秋節既節目係咩?

見一家大細出街食飯，又見有一雙一對晚步海傍，又有人渣住部相機影日落。

自己呢?

大熱天時都等到黃昏時份，落左街跑步，出番身汗，消化番呢一兩日食過既雪糕月餅、冰皮月飯、蘇皮月餅.....等等。

祝 自己同家人中秋節快樂!

愛屋及烏

自己遲下搬新屋，今日都幫『老比』購入大屋。

形容下架屋先‧其實真係搵左好耐，一路都搵唔岩‧無他既! 鬼叫我家隻肥狗真係好肥，一般狗屋根本唔岩佢。平時我地要用一個裝42吋大LCD電視既紙箱比佢當屋企。

不過咁岩有日經過IKEA，竟然見到一個比小朋友玩既脹幕。都係百二蚊，價錢唔夠，Size又岩，結果真把心一橫買回家試試。

其實狗仔好叻架‧岩岩開脹幕時，佢唔會即刻仆入去，點都會係四圍聞下咬下咁。當你引左佢入去，佢又意識到間屋係送比佢時，佢就會好好咁看守住自己個家園。

記得有一我想收番埋個脹幕，肥狗真係9秒9咁仆入去坐鎮住，唔比我收。

一時一樣

新屋既設計一早已經決定左，但呢期周圍出去睇傢俬時，真係咩都睇唔岩。唔係價錢問題，而係屋企地方細，好多市面傢俱都唔岩Size。更加無理由，下下度身訂做咁重皮架。

再同家人從新考慮，其實有無必要兩間房呢? 日後要改動時又麻煩，空間又細左好多。結果決定取消原有設計，一廳、一房、一廁所、一廚房，簡單又多空間‧

重未開始執野，不過初步估計都有唔少野要搬。尤其係D玩具，唔包好點敢拎出門口，一唔小心整爛左，真係喊都無謂。

不過講開執野，前幾日先發現左自己唔見晒D會考、高考証書。真係唔明，明明放得好好地，竟然消失晒。自己都唔算係一個無手尾既人，呢鋪只可以講句神推鬼擁，唉!

-----------------------------------------------------------------------------------

呢幾日忽然發奮，周圍問人讀書既資料。甚至夠胆死send email 比都市日報 黃先生問佢意見。雖然唔知會唔會有回覆，不過睇左 黃生咁多篇文章，佢都算係一個積極既人。


後記 10-9-08

估唔到 黃生真係有回覆我，雖然都係一兩句字，不過總好過石沉大海。其實佢講得無錯既，做人最重要係能力，無能力有咩學歷都係高分底能，咁又有咩用呢!


-----------------------------------------------------------------------------------



睇左林海峰求其大合唱 Part 2，唱歌加跳舞，講故又講笑都又算有新意。加上阿Jan唱歌算唔錯。雖則首首都係改人歌詞既作品，不過配合埋篤棟笑，都一樣令人開懷大笑。

香港地真係太多負面消息，太多唔開心既事。唔怪得有兩成學生話想死啦! 做人日日死捱爛捱都唔係辦法，間中真係需要點點歡樂，人生才不致太寂莫。

辭職

今日臨放工得知，其中一個同事又唔撈。數數手指，同自己 friend既都差唔多走得七七八八。出邊市道真係咁好咩?

聽同事仔講，出左去人工大幅加 40% 以上，起碼叫做市價。而家留係公司，屈屈埋埋都唔見有職升，有人工加。成日話有得加，年頭講到年尾，都唔知加咩!

可能真係比左一個好好既警號自己，唔好再浪費光陰。但自己知自己事，剛剛先話上左會，欠銀行一大筆錢，如果而家臨時無左份糧，真係申請破產都唔掂。邊似得早幾年，夠雷氣話走就可以走。

不過今日回家都立即update 番個 JobDB A/C，又攪番新份CV。最攪鬼係自己份舊CV，唔記得左個密碼，咩都要從新打過。

就係短短個半小時，好快就寫完。無他既!自己根本無咩好野可以寫落去。咩MBA，CFP，CPA .....可以話百無。真係轉工既籌碼都非常有限。

大人玩具

由細到大都好鐘意行玩具街，玩具鋪。灣仔春園街，旺角兆萬，同反嘔城都係長期至愛。

不過人大左，洗錢孤寒左。現在見到好多心頭好，大大件又平都唔捨得買。更少行左玩具街。換來既，係開始行傢俬鋪。昨日去左 IKEA，足足行左成個鐘，不過完全無悶場，感覺就好似係好多好多不同款式，不同傢俱中，搵出與自己有緣之物。原來行傢俬鋪都可以咁開心。

第二樣既係，真係有好多人都好有心配設屋企。睇下『住好D』有幾旺就知。最羡幕見到一雙一對，無論係情侣定兩公婆，甚至一家大細揀家俬，鬼死咁幸福。如果身個位重要係靚女，咁就真係恨死隔離。

唔知過多幾年，會唔會變左鐘意行街市呢?

黃子華 - 兒童不宜

無法子，真係唔同級數。唔到佢唔囂，因為真係好好笑。有頭有尾，有笑位。

其中男人有三不: -

1. 不主動 ← 其實鬼咁主動
2. 不抗拒 ← 根本係無能力反抗
3. 不負責 ← 唯一做到既野!

真係笑到嘔泡.....!

人工美化

今日睇CK 大介紹 呢個自制面相網，立即手多多玩下。以下係小弟個自制圖，明顯係美化左自己唔少，哈哈!



不過睇番個網，實際選擇真係唔多，可能係免費功能，如果肯比錢，應該有更多選擇吧?

有玩過日本 H-Game既朋友都知，當中你可以自制你個女女，要幾靚有幾靚，不論樣貌、身材、高度、衣著都任君選擇，務求滿足一眾男玩家喜好。

結果呢? 就會出現在好多唔岩比例，胸大廋腰長腿短裙美女周街走。

如果現實真係咁，都幾可怕，當周街都係人工自制美少女，個個都咁靚，個個都完美，結果只會係一個個模型，有軀體無思想，無靈魂。

不過又好鬼誘人........ 罪過!罪過!

雌線代言人

無啦啦上網搵到套何河篤棟笑，睇完先知原來佢係達明老婆。雖則成個show笑位唔多，不過間中都有一兩句精景金句。

不過換個角度諗下，如果兩公婆都係熱愛演出，兩個都係演出者，同聲同氣，其實都幾幸福。做人有時就係咁，唔一定要靚爆鏡，但夾岩路既，真係唔係咁易，始終都係人夾人。

烈日當空，拉西入波

酷 熱 下 折 「 鷹 」 復 仇 　 阿 根 廷 封 王

打 鐵 趁 熱 ， 但 踢 波 最 好 不 要 太 熱 ， 惟 昨 日 京 奧 男 足 決 賽 卻 在 攝 氏 42 度 高 溫 下 進 行， 戰 至 30 分 鐘 更 需 中 途 停 頓 ， 讓 球 員 降 溫 。 最 後 頂 頭 大 熱 阿 根 廷 ， 以 1:0 險 勝 「超 霸 鷹 」 尼 日 利 亞 ， 雙 重 「 熱 」 力 成 功 衞 冕 ， 別 具 一 番 滋 味 ！

-----------------------------------------------------------

自己都係，好日唔踢波，今日一出門口原先好好天。

去到球場門口先來落雨，不過等左一陣又出番太陽。

十一點半開波，烈日當空，同阿根廷一樣，曬到變燒賣，。

結果上半場已經輪左三蛋，下半場見大家都無咩氣，自己又休息左一陣。

由左閘邊位湧上去摶一摶，同隊友一個one two，再係籠門出迎前，腳指尾拉西，拉番個波去死角入網，追番一球。

之後再來一個反擊三打二，隊友左腳剃刀射球，又係一個死角。

結果三比二，無咁難睇。

--------------------------------------------------------

又唔知係唔係咁岩，今日行商場執左件$150 阿根廷 & $150 法國 adidas波衫

裝修用料

今日同家人去左灣仔睇裝修用品，真係成條街間間鋪都係，五花百門。

唔覺唔覺，原來小小地一間屋仔都可以咁講究。上至牆身電線，下至地磚床櫃水龍頭都要煩。最難攪係點配色，自己睇色板以為好岩，但實物出場未必咁好。又要預價錢，又要睇質料。藍配橙，米黃鬥木色，各花入各眼，希望日後出來效果唔錯啦!

打9 號風

昨晚訓前都係風平波靜，無咩惡劣環境。今朝都打定輸數，無奈返工。誰不知一起身，已已經8 號風球。『鸚鵡』果然做到野，抵讚!

打大風對打工仔來講，算係一個額外假期。平日各有各忙，打大風好應該一家人留係屋企食下飯，而家又有奧運睇，更加唔會悶啦。

打工仔心聲2008

睇左鐵鎚兄篇打工仔心聲，其實自己都想講，好多人好多時都係處於兩難。

記得自己初初畢業，好好彩搵左一星期就有工開。不過估唔到係做接線生，日日返唔同更，星期六日唔一定有得放。只係叫做有工開，同工作日日清。因為根本唔會有野帶落第二天。D 同事又係唔錯，大家會好開心間中開下party，唱下K，飲下酒。公司重要有幾個靚女，識唔到都可以間中偷望下。

不過自己知，係呢個環境，根本係學唔到野。結果一早把心一橫靜靜雞搵工。又咁岩搵到現在呢份工，當期時真係無咩點考慮就接受左，大家都係沙士年期既搵工仔，人工同待遇有幾好，大家都心裏有數。不過當期時無負擔，又見後生，當然唔怕摶啦。加上份工，表面又真係有野學咁。

一做就好幾年，今日諗番，當年選擇既都無錯。不過到左今日呢刻，又再浮現係唔係要轉下工?唔係話自己對公司唔忠心，無責任心，唔投入...等等。但真係同同期既朋友相比，自己真係明顯落後於人。一個人既際遇，好難過。月薪幾萬銀既畢業生都有，人地叻人地本事，自己唔可以怨天尤人，不過自己都唔係差到年新人都不如吧?

公司立場呢，理鬼你。請左你返來，有本事你咪走，唔走就繼續坐係度，人工就唔會加，就算加都係全公司畫一人人加幾舊。(當然高層同有勢力人士另計啦)

其實係唔係轉工最大因素係咩?

1. 錢 ! ← 唔係話現實，但無錢點交租呀，水電煤都要錢架!
2. 公司規模 ← 唔理大與小，每個月出得份糧比你既都係你老闆。
3. 工作地點 ← 人人要求唔同，不過有d人明明就住係隔離都可以日日遲到.....!
4. 職位← 呢個似係最誤導人………..!
3. 前景? ← 多數人入職前都有有無限幻想，不過現實就……!
4. 有無野學 ← 呢個算係自己繼續留係度捱既最大原因，不過野係無可學晒既一日，咁係咪即係永無轉工既一天，哈哈!
5. 準時收工← 幾點算準時? 6點、7點、8點、定零晨?

以上要求，人人唔同，不過感覺隨年歲增長，點都會漫漫放底自己既要求。

不過最同意係，今時唔同往日，唔可以咩都同公司或同事講? 人都係偏向自私，唔係話要去害人，但有利益自己既，無人唔想要。要供樓，要養妻活兒，要交學費….等等都成為左打工仔爭取更好待遇既大考慮，亦都係人生不能避免。

坐下坐下又大半年，就到年尾又話費事大改變，年頭又話市淡人人等過年。年中又話睇定d先，結果咁就六、七年。

願幸運與大家同在，一起發奮有個好未來，阿們!

信唔信邪

係讀書年代，一直都有掛住個骷髏公仔係門口。到搬返屋企住都一直有帶住。差唔多叫做跟左我六、七年。今日都決定掉左佢，一來想轉下運，二來骷髏又真係唔係幾好意頭咁。

其實有時人就係咁，好運時咩都當係寶。一衰起上來就話要改運睇風水。靈可信其有，不可信其無。唔好怕老土，唔掂就要識睇路數。

加班 2

講番句公道說話，今日返公司加班，老闆們有安排番餐午飯比員工食。好唔好食，貴唔貴，飽唔飽都係其次，重要係有得食。

其實好多公司都係五天工作，星期六返工其實真係好靜，好多平日既煩電話都唔會响，因為無人知你返左工，就自然無人攪你。感覺真係可以專心做d平日想專心做既野。

所謂吊頸都要透氣，呢刻我就係身處公司，做左大半日野，下午靜靜雞透下氣。

鬥氣定係唔反省?

記得初入職工作，日日放左工都唔肯走，唔到D人走得七七八八都唔走。現在未放工都準備急急腳走。早期一星期返五日半工，現在公司叫你加一日OT都嘈晒咁。係唔係應讓檢討下呢?

呢期公司上新系統，好多野將會好亂。平日有平日野做，咁自自然會想D員工假期返公司幫下手。結果呢? 員工們又唔憤氣，又要揀返上午放下午，返一陣唔返一陣咁。

自己認真咁諗左下......

公司有需要，自己返工唔算係大問題。不過係唔係應該計番足錢呢?講真香港地你估真係為公司死、為公司亡咩?公司均均真真，員工自然做得開心。其實都好公道，你返工時間多左，收入多左，呢個係天經地義，唔洗拗。

但你個頭話自願返，轉頭又話強制返，連飯盒都無過，好似唔係咁好囉。唔知D老闆自己識唔識做，請下午荼餐啦!

第二係返工做咩先? 話要測試系統，但個系統三日唔埋兩日就唔郁，攪少少野都要成粒鐘，咁你Call晒成村人返去白坐咩? 又唔合乎經濟原則，又影響員工士氣。

咁做人要公道D，話人之時，自己都要反省下。

呢幾年個人真係懶左，重要呢期運氣麻麻，成日出錯，又成日發白日夢轉左另一份好工，可以係舊公司游游下。

其實如果真係有後路，咁又唔怕串，如果唔係邊串得起? 轉左工都唔一定好，尤其大家心裏有數出面既公司有幾多野做。相比起呢度，算係打緊風流工。

又係時候冷靜下，同調節下自己個思維了......!

投入感

一向都唔睇奧運，未開始播前自己都係咁同自己講。記得細過邊會有心機睇d咩跳水、體操、舉重呀。就算日日播足球，唔係強隊大戰都唔會望多兩眼啦!

但人大左，可能明白左。識得欣賞運動員背後付出既努力。台上一分鐘，台下十年功。金銀牌只差一線，如果大熱出局，真係唔知點面對鄉親父母。

何惜冠軍總係得一個，係自己友上台攞金牌，故然開心，但如果不幸失金，真係唔敢想像，會比多少國民睇唔起。運動生涯好有限，廿幾歲到三字頭，原來轉眼就過，有時真係唔到你話重頭來過。

所謂一將功成萬骨骷，中國每多一金，其實背後就會有無數咁多個失落既運動員。佢地都值得勝得尊重。

Beijing 2008

自己無睇開奧運，昨晚都無現場睇開幕，不過能夠見到中國攪得好，國歌成日係頒獎台播，都係件開心既事。

再見『鞋仔』

打完風既日子，唔再比籍口自己，一放工就仆左落街跑步。不過跑跑下感覺唔對路，做乜隻右腳唔多順咁，原來個鞋底爛左。

話晒『鞋仔』都跟左我兩三年，真係算係風雨不改，一齊完成個全馬拉松，跑超過三四百公里。今日正式退役了...........!

打好風

會考放榜必落大雨既魔咒差唔多年年都係，今年叫做遲左兩日。

不過呢個熱帶氣旋『北冕』對我地呢D返工人士，有多日假真係打得好。但對於未有學校收既會考生，就再多日辛苦。大雨搵學校既折墮真係畢生難忘。

陌生環境

自己怕轉工，一來怕外邊好多野都做唔掂，二來怕又要重新認識新環境。人都會係咁，何況係動物。

今日帶左小狗去新屋，結果一去到小狗好似瘋狂咁亂走亂叫，又怕主人唔要求，行一步跟一步，廁所都唔敢去。乜都未有已經係咁，年底正式入伙時，咁佢點算?

小狗住慣大屋，家陣要搬細屋，活動空間細左，但相信日後落街散步都方便左。

一字記之若 等!

有好多時返工做野，唔一定即時有結果。好事當然唔怕等，但如果明知自己做錯野，而事件有好快比上司知道，係等結果既過程中，係最難受。因為唔知上司會有咩反應，唔知錯事件有幾大影響。係太多太多不知明既因素下，呢D就係所謂無形壓力。

小錯事，自然少壓力。大問題，會令人焦慮不安，試過影響睡眠。咁當然人生總唔可能日日風平浪靜，豪無壓力。但作為打工仔，只求三餐一宿，鬼叫你窮頂硬上。

小改變唔等於大改善

唔知係唔係性格問題，間中個人就成日有D 想改變。不過多數都係腦內改變，行動同現實中係完全無點變，最多都係改少少，真係好少好少。

自從上左會後，成個人既感覺唔同左。一來欠銀行一身債，二來好多家頭細務，裝修設計都要花下精神。不過講真好多都係靠家人諗，自己好似坐係度等入伙咁。

其實都唔係未試過搬出去住，係讀大學既年代就試過寄宿。當年都話有好多宿友，除非係D大時大節，否則點都會有D左鄰右里。但第日既日子就未必會係咁，一來你唔熟識個環境，二來幾何會無啦啦同隔離屋傾計。石屎森林之下，真係各家自掃門前雪。

話說呢期自己最大既改變係，生活再節儉左。應該話洗埋呢一個月，下個月開始已經要還錢比銀行，每個月既開支會大得好可怕。報紙好多專欄分析員都話，經濟通脹，唔能夠開源，唯有好好節流。

自己呢?一向都唔點捨得洗，現在百上加斤，更加降底生活娛樂。雖則自己一向都係宅男，都盡少出街消費，現在更加可以正式同娛樂講bye-bye了。

見家長?

今日同家人去左食自助餐，主要唔係因錢多無地方洗，而家人個親密朋友話想大家見下面。尤其係我呢位長期龜隱既中年人。自不然老媽子落格殺令，迫我一定要出現。

其實之前係街都遇見過，不過無打招呼。大家唔熟，都無咩好傾咁。同枱食飯，大家睇望望加傾一兩句計。短短個兩小時，話咁快又過左。其實唔係食得好飽，或者係唔想食太飽，免得自找辛苦。

假如遲下真係結埋婚，便正式變做家人。過時過節一定會見，閒來無事都可能會日日遇上。唔經唔覺，時間真係過得太快。

一分一豪

唔係講錢，係講屋企地方細細，小小位都要計過量過。之前有好多設計，結果現實中好多都唔可行。呢兩晚都有再上去睇下，初部有個新構思，希望效果會好。跟住開始睇下其它家電，環境問題，好多野都唔岩洗。要物盡其用之餘，又要唔好晒位。室內設計真係一門高深既學問。

前日攪左電費，今日又交左水費，遲下又要攪埋煤氣費。住都未開始住，裝修都未開始攪，已經係咁洗費，你話份糧邊夠洗。

室內設計

昨晚正式收左鎖匙入屋量位，結果攪左一晚，原先既設計全部要取消。屋仔細細自自然唔係你想點就可以點。一邊預到位，另一邊又唔夠位。整得張床，又唔見左個櫃。電視制、電話線、插蘇同燈制，樣樣都要從新預計。

唔知進度會係點，不過好大機會年尾前入伙。到時新屋落地，又係另一個世界。

歷史與故事

歷史故事，歷史與故事，歷史好似每每同故事拉上關係。係因為咁樣能讓世人有所共鳴，讓小孩容易記住，讓古人更神化。

睇左吳宇森大遵套『赤壁之戰』上集。先不討論卡士與特技，只係同其它同類三國戲比較，真係有讚有彈。三國一向都被世人神化，加上有羅貫中既演義，更加將人物推上高峰。劉關張趙，打江山打天下。不過如果細心一想，真係咁易單人長板橋哧走八十萬大軍，真係咁易萬軍中藏阿斗。幾好打都好，始終蟻多咬死象，雙拳難敵四手，何況係八十萬對手。

所以都欣賞吳大導既現實拍攝，但同樣否定兩軍撕剎，邊有可能無啦啦大都督出戰擋箭，更不信一國之君單挑老虎，如果真係有咩閃失，邊個負責得起呀?

故事始終都係故事，除非有朝一日真係回到過去，否則根本沒有定案。

Free Lunch

經濟話世上無『免費午餐』，但對自己來講慳左錢就夠，理你係唔係唔岩邏輯。

話說今日去游水，差唔多夠鐘去到摩理臣山泳池門口已經排晒長龍。舊時都無試過係咁，不過可能係新作風吧。唔理啦，照排下隊好快入閘。

一點夠鐘，已經拿拿臨攞定張八達通等比錢。最奇係去到閘口，見人人都係話過就過，唔洗比錢咁。心諗唔會今日係D咩學校水運會，或小學生游泳比賽吧!如果唔係邊會有咁著數架。不過真係唔洗錢，游左次免費水。

抵佢賺!

今日上律師樓正式交尾數同簽埋最後個D文件。講真D文件份份都幾十頁，又鬼咁多英文，有時間都無心睇啦。不過話晒係老爸朋友介紹既律師，又係間大律師行，點都信得過既。不過真係估唔到樓宇買賣咁鬼多野要攪。現在都只係攪左前期，後期既野都未開始。

作為律師，收得客人錢就要負上專業責任。客人簽隻字，律師講兩三句，咁就收左我差唔多一皮野，呢期D錢好似倒水咁倒。

森美做大show - The show must go wrong

唔知係唔係香港太多愁雲慘事，近年越來越多棟篤笑show。睇左森美個單人show，如其話單人show，其實都有好多人友情客串。不過可能始終係新手吧，感覺好多冷場，唔知現場觀眾有無同感?

同其他較出名既棟篤笑演出者相比，真係有待改善。始終唔同演員有唔同風格。詹sir係傾向藝術家feel、子華政治笑匠、海峰有唱有笑、達明形體動作王......等等。

來到森美，個人覺得重未成形，唔係話個show 唔好笑，只係未感覺到個中心思想係想點?

生仔要早?

今日睇都市CEO黃毅力既文章，提起佢25歲生女，現在個女16歲，自己41歲，已經可以準備嘆世界。遲下個女畢業，自己重係後生，影相都靚D。

諗諗下香港人越來越遲婚，女既都話青春一去不返，要嫁趁早。男既就唔洗講，理應遲遲都唔怕，只要重係有心有力咪得。不過真係好怪，公司內既同事，好多都早早結婚，有D一結婚已經準備生仔。

身邊既朋友都開始一個接一個，年頭年尾硬係一定會有帖收，好似要趕住趕住咁。其實結婚係咪真係令人長大，生仔係咪真係會讓男人定性?成熟長大唔係因為年歲既增長，而係經歷。經歷過不同事，自然會有不同變化吧!

自己呢? 看來都係遲婚既一種人，甚至有無得結都係一個問題。下年好似話個妹都備結婚，唔知到過年會唔會收到佢利使....?

學費無減稅

離開左校園又如何，人生總係要終身學習。不過感覺係無乜正式方向，過去幾年，用左唔少錢去讀不同課程。政府個一萬蚊，根本係過眼雲煙，一陣就無晒。其實個頭要人終身學習，個頭只係比得個一皮野，會唔會少左D 呀。咁都未算衰，試過報稅，話自己讀左咩報左咩，有埋正式收據，又有埋証書，稅局都夠胆死話，『閣下報讀課程與工作無直接關係，未計入扣除範圍』。

大佬呀!你知我平日做咩既咩?點叫做同工作無關?香港地而家有邊份工話你做文員就一身都係打下字印下影咩。如果係要下下好specify咁界定職稱同工作範圍，咁大部份公司都執得啦。

政府已經唔多鼓勵，重要唔接受人自己進修。學下其它範籌既智識，多方向發展唔好咩?如果係咁，D乜乜議員乜乜議員，咪一樣身兼幾十職。『高官掛個名就得，小市民想減下稅都難』。

話分兩頭，下下真金白銀報course真係好鬼赤...........!

山長水遠

今日先有機友問，明明屋企附近咁鬼近，做乜要晒車錢同時過過海呢?

其實無他，一來一大班人感覺開心好多，二來真係有進架。過左一段時間，終於叫做開始融入另丁個社群，不過感覺始終無早期相識個班機友咁熟。始終個班識左2年，個個星期見，日子有功，好難同新相識比。

其實一班朋友係唔係好難keep 住一直都friend既呢? 尤其係網上識既朋友?

結果真係沒完沒了。

放榜

人生總會試唔少次放榜生涯，由小學中學到大學都係不停站咁擔驚受怕。

同事仔個女女升中放榜唔係咁理想，今日回來大家討論左幾耐。諗番起自己，小學到中學時代都唔比心機讀書，臨高中先肯努力，真係有D汗顏。

之前都提過，個天好鐘意比D難忘既經歷你。放榜日子九成都係大雨天，又要搵學校，又要大風大雨，有咁折墮得咁折墮，如果唔係咁點會令你一生都記住。

好記得自己高中放榜個刻，收成績單個陣先識笑，有大學收個陣先叫做似番個學生。

歷史總係令人回味，短短十年，過眼雲煙...!

小數怕長計

小訂，大訂，火險，家居，責任險，裝修，傢俬，電費，水費，管理費，煤氣費，上網費，家用，生活費，車費，雜費.....等等!

人工又唔高，開支又不停咁加，再係咁，真係唔知點算....!

錯別字

由細到大自己中文水平好差，當然英文都唔見得好。會考中文都衰過幾次先合格。身為中國人都有D汗顏。中文同英文唔同，英文有文化最多係唔岩tense或直接串錯字，中文最大個問題係寫白字，同音未必同意。好多事都唔知自己係咪用岩字，有時心血來潮會發現得早，有時真係笑死人都未知。

呢幾年因為工作需要，自己既中文叫做好左D，因為用得多，錯得多，改又多，不過間中都比老闆圈出錯字，有時都幾失禮。

舊片新睇

開始無再日日上來寫blog，一來無咩特別野寫，二來又怕好似上次咁，無啦啦比官方刪除晒d野。所以都唔多敢亂咁寫，亂咁貼圖。

另一個大問題係，人越來越懶，龜縮係自己個世界。尤其係互聯網呢個大發明，真係助長左好多宅男。一個youtube 已經夠你死。呢期睇番好多平日唔會睇既電視劇，同合家歡節目『美女廚房』。

係節目正式播放時，自己又唔會真係去睇，但而家無無謂謂時又追到唔停得手。無它既，一星期一集唔過癮，一口氣睇晒爽好多。只要要求唔高，網上版其實連廣告都有人幫你cut埋，好鬼死方便。想睇下停下又得，想飛左D悶位又得。所以話抵youtube 個兩位創辦人發達既。

早交吉?

今日先知對面賣家肯早D交樓，咁係我地可以早D開始裝修。唔知有無機會係年底前入伙?不過最煩既都係幾時先要開始執野呢?大屋搬細屋唔見一羅谷，咁多玩具同書，又有電腦同衫褲鞋襪，其實都幾煩。不過呢D都係後話，今日唔知聽日事。

皇帝出巡

今日又係一年一次帶肥仔見醫生既日子。晨咁早有D雨，好彩下午開始好好天，但就係好鬼死熱。

攪埋今次，下年應該可以係新屋攪，咁大家都無需再咁辛苦。

大執位

公司間中都會有同事執下位，一攪就會攪左半日。自己而家坐開個位，算係非常好，遠離老闆，又有同事左右保護。再加上沒有小人報串，算係一個自由自在位。亦都因為咁，養成左定時定刻工作之餘都要上網聊天。如果有朝一日又要換位，咁就煩 lu......

結果呢，就開始攪到自己越來越唔想轉變，怕失去現在的自由。其實諗番轉頭，初初入職，咩人乽都唔識。日日返工戰戰競競，反而做人好似積極D。現在返工，如果真係心情同精神唔好，真係夠胆死，全日唔做野，都無人知吧!

不過呢今日唔做，聽日都要做番。除非你夠轉工唔做，但轉左工唔洗做舊野，又有可能有好多好多新野等住你去做。打工仔生涯，沒完沒了，沒有完結的一天吧。

假期

放完個長期，其實唔覺有D咩叉個電咁，朝早返到公司都係預期咁成枱都係未分既文件，同好多未做既工作。

放假期間例排遲少少訓，返工既日當然會有少少唔慣。不過叫做捱得住啦。今晚重要返學，last 一堂，好頭好尾點都會上埋佢。遲下9 月先再返，話晒一早比左錢，想後悔都無用，唯有繼續期望。

同新相識既呢班打機友，開始有多一兩句嘴，不過感覺都係生疏多D。無法子，朋友係要用時間養出來既。

上會

足足一個月，終於搵到間銀行受理我既按揭申請。好多大銀行都唔show，都係銀行仔進取肯做我生意。

1. 離近8月開始供錢，係出糧戶口自動月頭過數，希望唔會無出開飯吧。
2. 新屋要準備買定保險，家居又好，火險又好，點都要準備下。
3. 傢俬裝修呢D有家人攪，自己都係等入伙吧了。
4. 遲下係一屋一狗，相依為命。

好天斬埋落雨柴

日日都落雨，訓訓下都比佢嘈醒。落雨天好煩，出街又煩，所以遲下新屋更加要儲糧，尤其係我呢D懶鬼，如果唔係而家要出街打機，真係可以鼠係屋企避世。

記得讀大學時，真係個個星期去超市，買買埋埋唔少零食同杯麵。無他既，最好味同最平既野係呢兩款。

球員生涯

由細到大，自己都好鐘意踢波。但唔係成日有機會踢波，可能就係因為咁，結果一路都踢得唔好。尤其係比賽，自己適應唔到壓力，每每越踢越無表演。重會成日輸埋D大意波，烏龍波咁。

反而自己打『龍門』既時候，間中會有好表現。唔係話下下飛撲，救單刀咁型，不過都算無點失大意波。不過就係唔鐘意打『龍門』既感覺。硬係覺得好悶，好想出去爭波踢咁。

人大左自然知，自己技術有幾多。唔會再想一個扭幾個，努力踢好一腳波，打好整體戰，有時比死扭更好。

今日又同中學朋友仔去左踢街場。自己可能太耐無踢，真係無咩可以講，反而休息做龍門時又『卡斯拿斯』上身咁，勇救多波。

干急都無用

今晨睇歐國盃，睇睇下半場後全球無訊號。齊齊要聽主持人 9 up。其實做live既主持都好慘，又要搵野講，又要隨機應變。賽事分秒必爭，睇少一秒就係一秒。最大件事係，無論你點解釋，觀眾只會話貴台辦事不力。如果停播期間入波，更加比人問候晒全家。大家咁辛苦捱夜，唔係聽廢話，唔想睇字幕。可惜完場前都係無畫面，唯有乖乖訓覺。一次半次都可以接受，如果晚晚係咁，真係搵你睇都得了。

現在沒有Now，睇咩都靠上網。無權要求D乜野，求其有聲有畫面已經心足。

風神

熱帶氣旋 - 風神』風如其名，今朝清晨已經好似山崩死裂咁，瘋風暴雨，日不見光。

其實對自己無咩影響，皆因一早預左放假。不過感覺好似好唔抵咁!有時做人就係咁，總係會有唔抵既時候，睇你睇唔睇得開。自己煩住自己，自己嬲自己傻，結果咪谷住一身悶氣。要嘗試放開，要學會隨遇而安。

星期六原本又有同學仔約飯局，不過自己一早又推左了，唔知點解，就是不敢出現。人越大越無信心，總總既經歷，令到自己越加自閉。二來都係相減少消費，無能力開源，唯有盡力節流。

見家長

唔係講我，係講我阿妹。話說遲下要同阿妹個未來老公食飯，人地話想見下面打個招呼bo....。講真家長呢D野，我估雙方都見過吧，反而我多數避世，唔多浦頭。

遲下如果真係見到，其實都唔知有咩野傾好? 自己既家庭觀念好差，好多親戚都無見多年，D咩表姐表弟，根本就無傾過計。平時做節多數坐定定食飽就走，根本無咩兩句。現在大家都長大了，感覺大家都比以前懂性。唯一沒變係都係一句起兩句止。

反而相信係外國個幾位表兄弟，佢地既友誼應該比身處香港既我們好。話晒身在異鄉同舟共濟吧。可惜係相信係未來既歲月，大家都係各有各既生活，各有各既忙碌。要我搭十幾個鐘頭飛機過去，實在有點困難。要佢地年年回港，相信都無咩可能吧!

放假前哨戰

返工最想係放假，但又怕有野做唔切，一來煩到同事，二來放完假回來，會做到仆夕。所以放大假前都要上行電，盡做到幾多得幾多。最怕反而係，臨收工先爆出有急件出現。真係明知做唔到，就算自己肯捱OT，老闆都放左工無人簽批文件啦!

第二個問題係，唔知做乜每次放假前執好晒張枱，放完假回來都好似打風咁，D fax又亂放，D file又一坐坐山咁。明明放假前分好晒類，回來後又要重新睇過。

第三係舊既未做，新既又來。無法子，有咁耐風流，有咁耐折墮。一係你唔好放假，一係你放棄自己既員工福利，如果唔係唯有頂硬上。

凡事去得太盡，緣份勢必早盡。

識睇波既都知今屆歐洲國家盃，荷蘭有幾強勢。死亡C組，三戰三勝，平均隊隊派三蛋。當人人以為大熱殺入決賽，又大好形勢，結果昨晚慘敗三比一。

有睇 live既都知俄羅斯攻勢水銀瀉地，差D以為兩隊掉轉左波衫著。

明明成班波後生又有前途，又有老將帶住，加埋名宿教練，但踢出來重衰過港隊，你話死唔死呀。

唯一唔同既係，今年無再好似細過咁喊晒口。比人技術擊倒，無話可說，心服口服。

4 X 4 扭計骰

終於都決定買左個4 X 4 扭計骰比自己做生日禮物。

絕對係一件遲來既禮物，亦都係近呢半年來第一次買現具。現在好多時間都係唔捨得洗錢買野。自己真係衫都唔多件。唔好話新款，年年都係著番D舊衫。

不過物價貴真係唔講得笑，3 X 3扭計骰都係 $50。但去到 4 X 4要成$139.9。足足三倍錢，但唔知有無三倍樂趣。

始終都係剛剛開始學時最好玩。當熟識左D扭法，就只係變左例行公事。

放假放假再放假

呢個六月，因公司要求，放多左好多假。自己平日唔多放假，好彩連病假都少。可能你會話傻仔，員工福利都唔好好利用。自己就係唔鐘意去見醫生厄假紙。感覺好有罪惡感咁。

放假其實真係無咩野做，訓到中午，起身又唔會話約下朋友，又唔會陪下家人。一味都係等夠鐘食tea，同出街行下打下機咁。呢D咁頹既生活真係唔要得。

已經決定左會續續英文，計番一星期$300。如果唔出街玩，都應付到既，咪當自己出左街囉。一來想有所寄託，二來想有少少進步，三當然係想睇下有無機會識下靚女。

哈哈!不過以我多年來返學經驗，靚女係唔會進修架。

四面牆

越來越發覺，自己鐘意一個人做野。返工最好無人煩到我，比部腦同上網功能，再等我自己做自己手頭既工作。當然會長期上住網，但我覺得唔會對工作造成影響。老闆要我做既，次次都做得完，有急野當然會自己即時師父上身咁去死捱完佢。

反而最怕成日有電話响，又有D同事走來騷擾。最辛苦係D C9返工傾埋晒D街市買菜，雞又貴米又貴，百佳唔及惠康貴，等等。唔知係咪佢地返屋企無人同佢傾，係都要返公司搵人陪佢傾。

上得網多真係會影響人與人既溝通能力，好多時上網點吹點friend，見面可以無言以對。好彩天生自己都係肯講野既人，如果唔係隨時變自閉仔.....!

NBA

今年 NBA 東西岸 總決賽 湖人 vs 波士頓

等左好多年，總於比班老波士頓球星攞到難得一次既總冠軍。

不過運動商業化已經係不改既事實，如果唔係有金執，又點會有人仆心仆命，咁去攪波攪比賽。間中都會爆出有做假波問題。為左谷收視，大牌球星每每比人打高一班，唔只技術好，球証都有D偏幫心態。

小小地無傷大雅，但攪到世人佳知，世人恥笑就無謂啦。正常所謂，個名臭左 ，點都幾難搵人再信啦。

又有好多時，明明都係無咩星味之人，經過一年既努力，終於成就人生高峄。

Paul Pierce # 34 ~ 2008 NBA Final MVP

各有所長?

昨晚同朋友仔吃個晚飯，席間都係吹下水，講下笑，氣氛比我想像的好。

睇番幾位朋友仔，一個已經快成為專業人士，有份好工，人工高前途好，又有樓，相信離結婚都不遠了。事業有成，後生仔有咁既成績，除左講句叻仔同恨唔到咁多外，都無咩野好講。

另一位，樣子平平，事業都好似平平。但身邊女女就換個不停。可能真係識真心待人，個天係唔會離棄你。唔似得我呢D載住面具既假人。

唔經唔覺呢班高中既朋友，都識左五、六年。再過多五、六年唔知又會係點?

不過呢班朋友好奇，好似好鐘意食日本野咁?

緊張大師

無可否認，自己真係好容易自尋煩惱，連最簡單應約去同朋友仔食飯，都會攪到隔晚訓得唔好。工作上就更加煩，一多野做個人就會心急，成日想快快攪掂手頭上既工作，可以輕鬆返工等放工。雖則相比起其他朋友仔，自己既工作量應該算係唔多，只係自己覺得多。

結果有個大問題出現，就係我放工，朋友仔又未放工。白白係街等幾粒鐘，感覺就會好煩，唔知去得邊好。應承左人又唔想放飛機，但其實一路都唔想有咁多應酬 (雖則我都無咩攪作)。只係一心想放工，早早回家休息下。

百份百電車男成形，唔知有無奧馬士小姐呢?

體能問題

唔到自己唔信，年紀越大，體能回復真係差左好多。早幾年個個星期跑十公里得閒事，成日覺得唔夠喉tim 。雖則現在都仍能keep 住個個星期十公里，但個辛苦程度都有分別了。現在如果唔係訓夠，真係可以話一步步咁捱住跑。如果有得時間停頓，你話幾好呢永遠的無苦十公里。

1998 - 2008

細細過開始鐘意荷蘭，初頭係為左啖氣，後期真係好似出於同情心。再到98年後，係真係鐘意。因為踢得好，自然令人信服。十年後既今日，歐洲國家盃，死亡C組。同組有意大利、法國、羅馬利亞，以為好難打，結果今年強勢，遇邊個殺邊個。

十年人事幾翻身!真係要十年咁耐?細過睇波唔係睇TVB就係出街去bar 睇。現在睇波一味孤獨咁留係家上網睇。不過最唔同係，上網有時間差，同時又會一邊睇波一邊同好多唔識既網友吹水。

科技進步，做人退步。再過多十年，可能從始足不出戶，有咩都係上網算。

又一個年頭!

已經係好多個年頭，今年請左假無返工。一來有假多，二來屋企又有野忙。六七八月硬係感覺好多應酬咁。無他既，大家都係慣左年頭見完，年中年尾再見下咁。二來呢三個月實在太多人生日。

應酬多，自然洗費都多。自己其實唔係D派對動物，唔可以好似D人咁日日有節目。其實一個月一兩次已經好辛苦。呢三個月真係會好繁忙?

年頭既願望，估年尾都唔會點成功。今日重要一朝早就落大雨，不過可以舒舒服服避世係屋企，已經係一種福氣。

英文水平

昨晚上堂臨時有個progress test，結果自己全軍覆沒。自畢業後英文真係越來越少用，睇都叫日日有得睇，但寫真係少之又少。唔同考高考年代，閒閒地幾百字落樓，現在渣住支筆要我嘔500字都幾大件事。

唔係唔想讀好英文，但堂堂$300又真係好鬼赤。遲下要供埋樓，生活開支更大，唔好話打機，怕連開飯都係一個大問題。咁重邊有錢交學費?

REVER

細細過玩網上拍賣，可以賣番走好多舊時唔要既野。現在要收錢，已經無左呢支歌仔唱。不過昨日睇雜誌介紹有個以物換物既網站，由令自己興番起想換走好多唔要既舊書。

講真D書睇過一次都唔會再睇，不如換走佢，換番D岩自己既野比自己好過。

其實都幾怪，時代進步，反而交易退化回以物換物。無他既，都市人太多野，買左又唔用，用完又唔要，要完都一樣可能唔岩吧。

保險

屋都未收就開始煩，要唔要先買張保險單。一來唔怕呢段時間有咩大事發生，二來遲下搵人裝修都要有D保障。不過要買咩單，要點攪又真係唔知。搬屋真係人生一件大大事。唉....唔知要煩幾耐先攪得掂。

左鄰右里

發覺越來越多認識既朋友，搬左來屋企附近，但縱使那麼近，大家都係甚少聯絡。一來各有各忙，二來佢地既活動，我都唔多參與。連食餐飯都唔敢，重點話成日見呀。

不過都好既!細過成日想好似人地屋村仔咁，左鄰右里都係自己既朋友，晚上可以一齊落街食支煙，吹下水。現在煙仔都戒左多年，左鄰右里既朋友仍未達成。

不過感覺最大既係，大家都長大了。開始成家立室，開始為自己既家庭併摶。自己呢?仍是一舊飯咁.....!

越買越蝕

經歷過上年大牛市唔識賺錢走貨，只係一味相信買優質股長渣到天光，又加上係泡沬前既高追，現在由原先大賺到今時既蟹貨，都有D灰。

做人太心紅，唔識見好就收，唔識把握機會就無法子。有錢都唔識執，抵我無好日子過。遲下如果真係大跌，真係唔知點算好。

決定左星期二，將手頭上某D無表演既股，見未蝕都放咁D。留D錢安全D，遲下裝修可能都會洗筆大錢。

下雨天 x 2

昨晚真係瘋狂暴雨，差D好似個天要炸落O黎咁。不過訓緊時點落都好，返工放工唔好落就已經好ok 了。講真間中落下雨，個天氣無咁熱之餘，涼涼地其實係最靚。

成日都覺得開冷氣訓覺，無咩新鮮空氣，間接影響睡眠質素。最好既天氣就係開住風扇，又加一張薄氣墊，咁就最好。

不過香港地，好似越來越熱咁......

辦公室狗西

辦公室政治唔係人人都識，亦都唔係人人都會。不過辦公室狗西，就一定周圍都係。

1. 有D會主力做擦鞋皇子，事無大小日出日落都會拜拜皇后娘娘。
2. 有D本身已經係高層個friend，根本坐係度唔洗做，等每月出糧，話唔知花紅重好過人幾十倍。
3. 有D幾十歲人，咩都扮唔識，咩都推比人做。

遇到以上狗西，除左不抽不采，不聞不問不埋堆不比面子外，都無咩可以做。

點解我咁惡，唔係因為我係狗西，係我隨時都有搵過另一份工既覺悟。

電話聆聲

唔係想講手機既不同歌仔，而係公司既電話，總是响個不停。不過又唔係自己個電話，而係某D同事既電話。有時直情覺得某D人返工，似係煲粥多個開工。由朝傾到晚，夠鐘就放工。最奇係佢唔返工個電話又唔會點响，唔通同佢傾開既人都知佢個人唔返工?

女仔都算，男人老狗又唔係溝女，都唔知有咩可以傾咁耐。有時有朋友打來，真係講多兩句我都嫌煩，想早早cut 線。你叫我同人傾兩三個鐘，未攪啦，你估重係小學生咩。

反而上討論區又唔同wow，鐘意幾時覆又得，唔覆又得。

驚弓之鳥

到呢刻都未知舊blog 點解會比Blogger刪除左，係內容有問題? 係從網上抄相片回來不當? 定係我打左篇估下有無人搶聖火而被ban A/C?

結果而家都唔再亂咁日日找來得意帖圖，免又一次一夜消失。

好多時做人都會係咁，衰左一次，就唔敢再去做。驚弓之鳥，點先可以克服?

轉左一次工，唔敢再轉工，怕新環境無舊環境咁好。怕過唔到試用期。怕老闆要求高，而自己做唔到。現在唔係驚弓之鳥，係驚工之人。

放假

公司每年都比好多假我地，相比起其它公司，叫做好唔錯。不過就有一個好怪既條例，要求員工要在年中放夠一半大假，當中又要有四日連續假期。

唔知係咪真係勞工法例 ?但印像中真係得我公司係咁。講真D假係自己，我想點放咪點放!無理由迫我夾硬放假! 又無野做，又要白白坐係度。雖則我都明公司唔想D同事儲埋咁多假，年尾一次過放晒，攪到每個部門都唔夠人。但現實中同事間都叫做有商有量，明知你想放假，我都會就下。總好過而家咁，迫住要放。

最慘係放假前做唔晒既野，放假唔會有人幫你手，放完假返來一定做到仆街。

學子華有講過:-『係你既始終都係你，唔係你既都會係你，問你死未?』

承 諾 -- 群星

原曲：<海闊天空>
曲：黃家駒 詞：劉德華

多少人 多少幸福被搶奪
多少生活在一息間被埋沒
一切變沉默
淚光在眼眶閃爍
塵埃沾滿了失落 的輪廓(情願是我)

不必說 你們背後還有我
未來就是崎嶇也會陪你過
一個你 一個我
扛起不需要脆弱
前面越走一定會 越寬闊(你還有我)

*誰人都會恐懼面對黑暗的角落
為了你我再苦也不躲
我要你重獲 原來的生活
認定了這一輩子的承諾
( repeat * )

** 縱然山搖地破 也要安然渡過 有你有我 **
( repeat * )
我要你重獲 原來的生活
認定了這一輩子的承諾
( repeat* )

---------------------------------------------------

昨晚睇左一陣512關愛行動，各台同播。三色台只播自己既藝員片，一到別台既就借故唔播。作為香港大台，一點大將之風都無。亞洲台連廣告都停埋，唔理三七廿一，足本提供，明顯呢幾年係有進步。

唔再係睇電視睇三色，間中亞洲更出色。

飽肚就算

自己其實幾鐘意食零食，尤其係蝦條，之前都講過，因為平平地但又好鬼多條，感覺抵食好多。

人大左，唔肯花錢食好野既心態，一直都無變過。越係一個人，越食得平。差唔多飽肚就算，記得新入職頭三個月，真係日日lunch都係去同一間茶餐廳，個日有咩午餐就食咩，唔會選擇下去其它地方，一味慣性行使。

同家人食飯，都離唔開屋企步行範圍。從來唔會特登搭一輪車，為左食個少少野。結果呢，係得番同朋友食時，先有機會間中食下好野!

亦都多謝佢地教識我，邊度有咩食。

自己迫自己 = 成功 ?

要進步就要自己迫下自己，唔好怕比人係背後笑。今日練好基本功，它日一定會成功。

唔好以為我講緊打工，其實係好衰仔好無用咁講緊『打機』。

遲下想花多少少時間去睇下家俬，建立一個屬於自己既家點都要花下心思吧。

上級唔撈?

年頭曾經提過懷疑直屬老細係咪想跳糟，否則唔會工作態度一百%轉變，定係真係一人上左位，就會現真身。拖下拖下又差唔多半年，呢幾日又有風聲話老細同人事部高層見面，唔知係咩事呢?

假設老細真係走人，咁都幾大件事。一來轉新老細，新人事新作風。如果一個唔好彩換左個衰既，自己真係要考慮下自己個前途。

今年發生左好多大事咁，好多事都令到自己好煩。心事重重，遲早人都癲。

多口水

自從興左上網，現在上網傾計多個同人面對面吹水。

有時都怕自己會變自閉，當見番朋友唔知有咩共同話題。好彩自己天生都係吹水怪，只要遇埋場合同心情，點都唔會有冷場。不過就係唔多識同女女單獨傾計吧。無他既，熟能生巧，唔多機會，自然唔會進步。

返工更加唔在講，完全係無心同公司D人傾計，直情有D自我中心既問題存在。講真我真係有D歧視，尤其係唔鐘意同D上左年紀既C 9傾埋晒D家頭細務，煮飯湊仔經。街市買菜貴左關我叉事，我都唔去開街市。最煩係D C9 日日已經無咩野做，但人工又比你高，重要日日口黑面黑。

不過網上世界，可能日日傾開既，就係個班扮後生既C9都唔定.....哈哈!

自信心

舊Blog 比Google刪除左後，現在寫野都費事再水蛇春咁長，免得又再一次失落。

下個月又有朋友飯局，但自己一早已經推左，一來怕洗錢，二來出到去又唔知點咁，見大家傾既都係D終身大事，又搭唔到嘴。人地一雙一對，自己一個人出去咬庶咩。久而久之同一眾同學仔會越來越疏遠。可能一年都唔知見唔見到一兩次。下次再見可能又再係唔知邊個結婚既日子。

現在好努力融入另一個社群，希望識到新朋友，可以從新run 多一次自己。自己知自己事，成日怕見舊人，都係因為自己係一個無咩自信既人。

一珏朋友唔維持得好耐，過一陣又要換另一班.....長此下去都唔係辦法。

開支

開始諗緊遲下年尾會有好多開支要比，水費電費上網費，唔再係隨手可得，要慳得就慳。看來遲下會生存在一個黑暗既角度。

1. 一返屋企，除左房燈，就唔開其它燈!
2. 用水唔好再開住水喉係咁噴!
3. 出街要熄機，返工叉手機!
4. 日日去超市格價，唔減價都唔捨得買日用品!
5. 係舊屋企偷運物料回家!
6. 繼續電車男一生!


以上咁多點，到底係唔係全部成效?

隔離飯香?

硬係覺得人地既野好D，自己有既野無咁好? 呢幾日放假，又再追晒『逃』第三季。唔係遍心，但外國既爛劇好似點差都好，都會好過本地。加上睇左三季都仍叫做未完，間中都有D驚喜，不過到底幾时先會大結局，主角兩兄弟，一生打不死，出入監房如戲院。

返工都係，硬係覺得其他人搵多D，份工好D，生活寫意D。但其實可以一路返工一路上網，又唔洗點OT，呢D工又係邊度搵呀?

裝修X2

所謂睇"送"食飯，豆腐潤咁細既地方，要物盡其中，空間有咁慳得咁慳，有咁盡得咁盡，真係唔易。其實有少少想將自己個屋企圖則send 去有線，摶下有無專業設計師可以幫手設計下個家居。

裝修

開始要諗裝修既問題，不過唔係我諗，全權都係家人諗晒，自己只要安然接受。下年年頭可能就係正式搬屋既日子，真係唔知會係咩景況?

一人一屋一狗，獨欠一個女女在身旁.....唉!

律師樓

今日照舊無返工，目的都係一陣上自己律師樓簽正式買賣合約。其實成單交易中，自己可以話零參與，一來唔識，二來根本無諗過。如果唔係有老爸老媽，可能一生都唔知可唔可以上樓。

不過有咁大利益，自己有好大壓力。由呢刻開始真係要節衣縮食。

150 分鐘的壓力

1999年自己係朋友屋企捱夜睇波，足足驚左90分鐘，先開心笑。

2008年由補時到加時到十二碼，真係心血少D都唔得。

事實上車仔係打得好D，紅魔確實有運，但勝左就是勝左，點講都無用。

說真的，真係好開心，不過如果下一次有機會係一大班朋友睇，應該會更開心。

請假!

明晨有歐聯決賽，新屋企既野又一直未明朗。成日心事重重，唔知邊日先要請假。雖則D假係自己，放唔放，幾時放都係自己話事。但呢期公司多人要公出，全部門無晒人，自己重放假，好似唔係咁好。攪到日日都想快d知，到底律師攪成點，成個星期都無回覆，點攪架。

離群!

發覺自己越來越離群，怕一個人，又成日一個人。有活動有應酬，有朋友都唔會約。成日困自己係屋企，又成日恨人地生活多姿多采。

自己又少少餘錢，但又成日唔恓得洗。食又唔好玩又唔好，買野都要諗過計過，唔減價唔買，減緊伵都要摶講價。

一餐晚飯

昨晚同家人去左酒樓食晚飯，有魚有蝦有肉有菜，四人埋單$777。差唔多二百蚊位。其實都算幾貴，如果唔係同家人或朋友食，自己一定唔捨得食。

一向都實行好又一餐唔好又一餐，最緊要係食物乾淨，飽肚便可。呢幾日睇電視，日日都係死傷片段，一大班解放軍，日日都係捱饅頭，飲開水，不過都從不埋怨，香港人真係要知足。

------------------------------------------------------------------

下午 2點28分

全公司員工默哀三分鐘，悼念地震死傷者。

呢三分鐘正正比左自己一個反思既機會。自己捐錢又唔多，重話放工想去娛樂，真係無人性。平日係公司晒都唔只晒三十分鐘，但唔知點解呢三分鐘特別慢長咁。雙腳都好累好沉重。試想像，如果係災場，救護員可能企足三十個鐘，都不退縮，三分鐘算得D乜。

得把口

好多時做人都係得把口，叫人做咩，唔應該做咩。但結果自己呢，咪又係得把口，少少野都唔肯付出。成日話捨得捨得，唔肯先捨，何來會得。

地震發生左一星期，死左無數咁多人。自己身福中不知福，重係吃喝玩樂，打機睇戲，係咪真係無人性架?

天下無不散之良宴席，今日呢班朋友，都唔經唔覺識左一年，開始覺得係時候要轉下。唔通我個成日轉朋友既壞習慣又回來。其實講到尾都係因為自己做人無信心。

按揭!

今日中午同家人去左渣打銀行搵左靚女服務員，全程我都唔知服務員講乜，只係一味望住佢個樣。所以話公司要厄客戶，首要有個靚員工。

傾左唔係好耐，就填表申請按揭。一星期有消息，希望可以申請成功啦。

結婚潮

同期既同學仔，好似個個入晒魔咁，排住隊要結婚。昨日去左食海鮮，席間全部既話題都係講婚禮。有經驗既，就大發偉論。唔理有無講錯，一眾待嫁女女都變晒英國保盛，用心聆聽。年尾同下年年頭可以話係排住隊有帖收。

有準新娘話一年前已經開始準備，又積極戒煙戒酒戒蒲。過多幾年再出來，可能會變晒家庭湊仔團。

自己呢? 真係大唔透，完全無成家立室既意願。如果比阿媽知，可能實會閙我不孝。

其實都幾煩人，當身邊個個都在變，自己情況唔變，好似好唔合群咁。漸漸會更疏遠，因為自覺自己好似追唔上。

我也想哭

四川大地震的死亡人數增至14,800多人，估計還有25,000人被埋。救援隊伍分別在都江堰、北川及綿竹救出多名生還者。截至上午8時，在四川汶川、都江堰、北川、茂縣和甘肅隴南等地抗震救災的武警隴南等地抗震救災的武警官兵，已從廢墟中救出5,500多名傷者，轉移疏散群眾50,000多人。

----------------------------------------------------------------

男人老狗，一朝早睇住份都市日報，都差D眼紅紅。一夜間一個地震死成萬人。無水無糧無人手無器材，重要加埋有餘震，你話點唔令人擔心。雖則係香港地，內地有內地震，工一樣要返，但好好一個城市，一夜間無左，真係心都酸埋。

睇見好多捨身救人既故事，父母肉身救女，老師一救四命，大肚婆從死裏逃生，又有BB在災區出生，取名『震生』。一點一滴，唔再係 你又你地震，香港人照訓吧?

如果一唔好彩香港攪次地震，後果真係唔敢想像!

慳家大計

由呢個月開始，決定慳D洗。起碼要減少D無謂既消費。其實計計下，自己每月最大開支，唔計食飯、搭車、比家用同供保險外，主要開支去左打機。漫畫已經戒左無買多年，戲又唔多會花錢睇。差唔多有網上就咩都有。唯獨要放棄打機，等同放棄現在的一班朋友。

天下無不散之宴席，總要相信日子會好既。睇過四川地震既場景，幸福真係唔係必然。

攪乜鬼?

先有藏獨攪事，又有四川地震。中國奧運年真係多災多難。唔知點解聽到以上兩個地方有事，自己硬係覺得好可惜。話晒都曾經去過，二來兩處真係好地方。

-----------------------------------------------------------------

買賣手續完成左第一部，現在又到銀行同律師要攪了。估計年尾可以攪晒，今年都算係多事之年。

行出新一頁

今日終於都簽左臨時買賣合約，好多細節都唔知係乜，又唔知要做D乜。全部都係靠家人，如果得自己一個，比人厄都唔知。

不過由今日開始，就要認真咁節衣縮食了。上左車，唔係一件咩值得自賣自誇既事。但就有左一份無可避免既責任。一份20年既長約，一個影響一生既日子。

今日咁岩又係老父母既結婚 N 週年，平凡的一天，有不平凡的事件。

母親節

今日真係少有一家人一齊飲茶，雖則唔係食貴野，但都算係近年少有。遲下如果真係搬左，阿妹又嫁左。分隔港九新界，可能會越來越少見吧。

間屋傾唔傾定成，真係好睇天數，希望有好消息啦!

新渡輪!

唔知由咩時候起，自已開始怕搭船搭巴士。今日為左放便，終於都晨早搭船過海。船程唔耐，但感覺就好似大鄉里出城咁。

-------------------------------------------------------

今日同左家人去睇樓，環境比自己預期好，四四方方，間格都唔錯。唔知傾唔傾得成，唔知今年又搬唔搬得成，不過真係要好好儲下錢了。

願珠峰頂的和諧 傳到山腳的西藏

奧運聖火成功登上世界之巔，象徵人類結合智慧、體力和鍥而不捨的精神，合作克服重重自然界和人為的困阻，所達致的高度成就。這是值得人類無分國族感到自豪的。

-------------------------------------------------------

睇新聞登山小隊足足用左7個鐘先上到山頂，重要咩住咁多器材，又要唔好仆親，又要確保聖火一定著，一D都唔容易。

其實自己都好希望上珠峰頂一次，但呢生都唔知有無機會。

用腦諗下

十六歲品學兼優王嘉梅，因家貧輟學，上網交友找兼職疑誤墮圈套，應網友邀約見面，失蹤十多日。警方不排除有人「索K」後將女事主斬頭殺害再肢解，已拘捕兩名青年協助調查...

-----------------------------------------------------------------

攪乜鬼而家D 小朋友真係高分低能架? 雖然人已去，唔想咁唔尊重咁話人，但真係用腦諗下都應該識分，邊D 係好人，邊D係壞人呀?

朋友友仔約出街唔係問題，但一叫你『索K』都唔好采佢啦，斷估都唔只一次半次，好心啦!

學校一味教你要點讀書，點考試高分。從來都唔會有老師教到你點做人，一唔好彩自己行錯路，真係柯里吉媂!

牛耕田、馬食草

昨日上youtube睇番d笑笑短片，其中一句『牛耕田、馬食草，仇人搵錢仔享福』!

其實都幾感觸，養個細佬點只三、四百萬。供書教學，擔驚受怕，望子成龍。呢期都有d灰，香港地好似你搵唔到錢，你就好無用咁。

『小富由儉，大富由天』

今日好似真係一個風風兩兩動盪之年。希望唔會行錯路，投資錯誤。

置業?

昨日收到老爸講，阿妹下年都準備結婚，會搬出去住架啦。自己呢，係唔係要認真儲下錢，供番層樓。不過一睇d預算，就O晒嘴。好彩話首期可以問家人借，但每月供款，裝修同生活開支，已經唔係一個少數目。供樓同申請破產差唔多，一鋪清袋?

結果呢? 呢期都要認真慳下錢，唔好再有咁多無謂開支。

不過好多野都係得個講字，完全未知點實行!要儲第一桶金，真係咁難?

逃亡潮

同事仔一走，留下好多工作，少不免大家要硬食。現實就係咁，走個位開心興憤，仍留下既有會有咩心情呢?

可能有人會開心，因為又少一個人同佢爭。又可能有人會覺得悶，因為又走多位朋友。自己呢? 有d慌失失咁，一來又多左野做，二來好似唔走就無前途咁!

空白期?

如果唔係舊Blog比人block 左，都唔會開個新再寫過。好好地keep 住日日寫下文，結果變左斷開兩份。做人都係咁，成日斷開好多個時段。

記得自己好似係幼稚園攪珠入左間唔錯既小學，可惜自己唔爭氣小六派位極差。又靠家人搵人士再幫我入間唔錯既中學。自己再次唔努力，中五無學校收。又洗左家人好多錢咁重讀多年，結果都係一事無成。用錢繼續買中六中七讀。

做左十幾年人，高中個兩年先係真真正正認真讀下書，終於考到入大學。

現在畢業多年，繼續無無謂謂，人生實在太多空白期，完全唔知自己做過咩!

莫須有?

由於可能違反 Blogger 服務條款，所以此網誌已經鎖定。 網誌進行檢閱並且解除鎖定之前，您無法發佈新文章。

除非您要求檢閱，否則此網誌將於 20 天內刪除。

---------------------------------------

無啦啦話我係垃圾Blog，又無啦啦話我有問題!

大佬呀，blogger你到底想點呀?

有問題係唔係應該要先電郵通知下先刪除呢?問到唔問，就刪除左，『莫須有』?

傳聖火日

今日有成120個跑水傳聖火，6 小時不停站，每日二百米。自己係電視睇左一陣，見到好多名人，不過身邊既護維員都幾專業。唔理你係李生定少雲，舉得唔岩一樣會埋身出手。可能係外國人眼中，中國一向都唔文明，又底水平。自己雖然無機會去北京現場睇下，不過希望呢一重專業既精神會係奧運一直傳下去。

PS:- 自己個舊blog ，看來已經無修復既機會了，咁耐無回音。衰咩都話晒我知呀，頂!

珍惜生命

西貢一輛超載的旅遊巴士在南邊圍迴旋處翻側，導致17人死亡、45人受傷，受傷的司機已被拘捕。

------------------------------------------------

假如放假好好地，一家人參加教會活動去西貢諗住過一個開心既假期，結果一個超速既司機，一架超載既大巴，意外就咁發生左。

唔知係唔係多心，感覺間中都會有好多嚴重交通意外。記得某年某月有巴士係屯門公路發生事故。個頭先係巴士同人傾緊電話，轉個頭人已去。

如果自己都係係西貢巴士內，意外一刻會掛住既係邊個?

自己? 家人? 朋友?

其實一到假期，個個都湧晒去效區，自己都坐過唔少次超載既小巴，在窄窄既小路飛馳。唔係佩服司機既技術，係一上左車，條命就交左比個司機。大哥，我知你要搵食，但都大家都有親人父母，珍惜生命吧!

與馬桶結伴的日子

今日都唔知去左幾多次廁所，唔係正常既小解，係唔受控制既大大大解。可能真係食錯野，全日都係排涉多個吸收。早餐叫做食左個蛋糕，午餐有人請都係食左半份，晚餐索性係飲水。因為相信，唔食野，自然唔會有野疴。

最慘係放工都重要去返學，比著平日一早仆左返屋企啦。不過好彩係上堂終於疴清晒，無左攪攪肚。比得錢返學當然唔想走堂，又唔希望無野學到，但真係快樂不知時日過?3小時其實唔算太耐，學左D咩，連自己都唔知。

昨日之日不可留

個舊網誌沒有修復回音，可能已經消失於互聯網。雖然唔係話寫左好耐，但一下無晒都幾灰。

其實開始估，係因為咩原因，而會被刪除網誌呢?

1. 自己錯手機會好微，無理由咁大個字都會揀錯。
2. 個網有違規野比人投訴，結果官方刪除左。如果真係咁，無理由無email 通知架。
3. 個網誌移除左，更加唔可能，上網查個好耐都搵唔番。
4. 真係黑仔到無人有?
5. 比人偷取A/C?

結果都係無左件事，唉!


PS :- 明天又係開學日，希望一掃黑仔既日子，學到野之餘，再識多D 靚靚女同學，咁就very good 了。

由零開始

明明好好地，唔知點解今日一回家上網，就發現自己個網誌消失左。個心都沉晒，話晒都寫左一段時間，雖然無咩人氣，但都叫做記下自己點點滴滴既日常生活鎖碎事。

自己呢，第一時間電郵報告管理員，希望救得番，不過都有心理準備，會一無所有。本來無一物，何處惹塵埃。

不過個心真係好傷，到底自己做錯左D咩事? 照計無理由會無啦啦唔見晒?