渣打第七年

先報過時，半馬時間 2:07:23，算是沒有退步，也沒有進步。

今年較往年寒冷，但天氣正正適合長跑。能夠年年跑渣打，已經是一種福氣。65,000名跑手，會唔會跑爛香港既馬路?

大會今年實施行李分區取回，疏道人流，值得一讚。

渣打跑手歸位!!!!

咁多位師兄...龍兄、on 兄，渣打又開始報名啦。

記得上年自己網上報名，結果比人lock 左個A/C，差D 出事。今年都係穩陣D，寧願唔要個限量贈品，郵寄算。

繼續向半馬出發。

三個月

唔經唔覺又成功捱過左個試用期，三個月唔比放假，其實對我影響唔算太大，反正自己都唔多鐘意平日放假，無所事事重辛苦。不過公司成日傳年尾會再抄人，自己新來新豬肉，其實好高危。

呢刻都係見步行步算。其實有野做住都唔怕時間難過，最慘係有時做晒野，但又唔敢準時放工個下先難捱。其實真係唔明D 阿姐，早D 放工落街行下唔好，生活只有工作同訓覺，會唔會 dry 左D 呀。日做十幾廿個鐘，有錢都無命享啦。

新工作

未轉工前，日夜憂心，怕選擇錯誤。現在身處新環境，同事及工作都比預期理想，已經心足。

有時做人就係咁，害怕轉變，但窮則要變，變則通。工作壓力係大左，責係係重左，但總算無選擇錯。假如我仍在舊地，每天只會只怨，生活那會有快樂。

四年

由90年世界盃開始，轉眼又多個年頭。每四年一次，四年前在舊公司工作，再四年前剛剛開始出社會工作。再四年前可以捱夜由分組賽看到決賽。早多四年只記得在中學打轉。

下一個四年，又會在何方?

再見老闆

手執白信封，走入老闆房，門未關，大家也知所謂何事。自己未做過人上司，但估計感覺都不好受。剛剛先食完早餐，杯奶茶都重暖，就有個死佬走入來請我食抄魷魚......唉!

照舊大家吹下水，問下原因，照舊答d客氣說話，多謝完老闆一句，又感謝老闆一句，然後就開門走人。那一刻全部門都明白咩事，始終大多數公司人，都特別留意別人的私事。

相熟既朋友已預早通知，唔熟既大家繼續扮唔知。新工作照做，始終時間流流長，淨坐會悶死，但當然只維持有限服務。

反而有點擔心身邊既同事，因為自己辭去，同事間既工作壓力只會有增無減。無咩人鐘意做埋人地個份，但又無法子唔硬食多份。

大公司養懶人，因為慣性你推我，我推你。曾經見人地走得開心，到自己決定了，反而有點心亂如麻。既然打得封信，都唔會選擇留下，新環境如何，唯有望天打卦吧。

又一年了

今年是第六年參加渣打，天氣悶熱。仍未能在兩小時內完成半馬。

無他既，平日少練習，成績點會好。

2hrs6mins27sec 完成

屆屆都有唔少跑手出事，希望各位健健康康，繼續長跑長有。

一年一度的渣打

今年沒有點練習，六點起步，只求盡力完成。

大局已定

終於裁員潮完結，要走的終須要走。

雖則未必全部在工作上有接觸，但總令人傷感。同事一場，期望多多保重。

當然人縱然離去，工作卻不會流走。屬你的始於屬你，不是你的也變成是你。

虎年定苦年，一線之間...........

祝大家新年進步，虎虎生威。

2010

2010第一篇網文，竟然係...........

公司終於開刀了，估唔到會咁傷亡慘重。要走的固然可惜，留下來的亦未見幸運。

已經拖左好多年，係時候再次逼自己面對現實，走出社會看看，但我確實看不見彼岸。

今天事今天做

細過讀書都有教，今天事今天做。之前闊佬懶理，以為報渣打無難度。臨近人數爆燈之際，漏夜上網登記。年年如事，年年都如常。誰不知登記期間，渣打網絡出現問題，結果要打上CS求助。如是者足足擔心左半個月，日日覆查進度。CS哥哥回覆總是跟進中，成功登記不會另行通知，請自行網上查閱。

你話係咪吹脹呀.....!

好彩最後都成功註冊，否則今年無得跑就灰爆。

年尾流流

臨近年尾，大多是公司評估員工既日子。一年流流長，年頭有咩大事發生，邊會有人記得。但年尾做錯野，就一定比人認為全年都有過失。碰巧自己總是年尾出現問題。

越近年尾，轉工既念頭就越消沉。始終年尾流流一動不如一靜。過左年先再算，過完年，又話年中再諗，到年中又想年尾才作決定。結果年年如此，一動變成不動，一靜仿如百世。

公司既環境越來越自閉，返工除了對住電腦，都無咩好做。後生既朋友都走得七七八八，剩下的大多如小弟般懶情之輩。置工作於娛樂，從來都是知易行難。

渣打馬拉松2010

又收到SMS通知，新一屆渣打又開始接受報名。

近來腳患纏身，尚未決定今年報 半馬 定 全馬 好。

Go or not go?

與舊同事重遇，閒談間已看出同事們不論待遇與工作都有明顯外善。

突然間，自己有所反思。

此刻雖未算窮到乞米，只是近年看見朋友四處闖盪。相比下，自己只是一直原地死守，仿似失去了年青人應有的拼摶心。

是否應該盡力出外試試?

港女日記

再次証明，寧得罪親朋，莫得罪高登。小小一單港女大鬧元朗聯興行，可以由罵戰到榮登報紙頭版。真係唔知好嬲定好笑。

有人話當事人可憐，比人起晒底，都唔知點見人。好彩香港人善忘，早期既巴士阿叔，美心港女，已經過眼雲煙。

現在出街真係唔好亂咁同人嘈，因為時代已變，『笨人出口鬧，叻人手機拍』，下一位男/女主角，隨時可能係自己。

打左半個風

一早起身，打開電視機，出奇地8號風仍在。可惜天文台預早張揚，十點會落波，唯有較好閙鐘，繼續返床碌過。

打半天風，最擔心唔係趕唔切返工，而係午餐點算好。穩陣起建，都係食個飽飽既老麥，買定多個包填肚，就一定無死錯。

其實返半天工，個人都未入狀態，就更想快d放工，結果生產力基乎係零。

又係打風

上次既熱帶氣旋叫『彩虹』，一聽個名都知一定打唔成風，無法子，要遇見彩虹，總是雨過天晴時。今天又輪到熱帶風暴『巨爵』，又係九成晚間經過，看來明天要繼續返工。

其實香港人日日期望打大風，可能生活實在太幸福，攪到個個身在福中不知福(包括自己)。

百忍成金

今早差點與同事嘈交，明明只是少事一則。

無可否認，人與人相處，都是偏向親近易話為的一眾，多過麻煩之輩。所謂麻煩人，可能並不事事麻煩，但一早已被標籤，較難客觀對待。

控制情緒是一門學問，強制忍受又是另一回事。經濟唔好，打工仔唯有百忍成金。那久而久之，會否有日被人餵屎都要照食?

移軸效果

一直都好鐘意移軸鏡既玩具效果，要我花一萬幾千買根本無可能，雖然一路都知PS可以後制，但都係一個字懶。難得看見On兄有好介紹(移軸效果)，即刻一試，真係好好玩，哈哈!

港鐵

唔覺唔覺原來我地條鐵路已經變得咁複雜。記得小時候跟家人去拜年，當年未有藍田站，要到觀塘要兜一個大彎。最慘係為了禮面，送禮一定係大曲奇，大蛋卷，一家幾口同日要由港島東到荃灣，再到觀塘後，先有得折返。

現在交通方便了，但已經多年沒有再去拜年了.......!

炸板

只是一時不小心選擇了任人留言，結果就被『炸版』。重要全部用日文，賣廣告都唔知你想賣乜，你到底想點?

有無方法可以一口氣刪除晒佢地.........!

放榜總是下雨天

會考放榜總是下雨，不知上天是否有心讓一眾學子經歷人生第一次巨變。

有人歡喜有人愁。自己一向成績唔好，總是不明白為何別人可以三十分，自己連八分都不夠。也許是自己不努力，也許是別人太瘋癲。

近年認識的小朋友大多經歷會考挫折。有選擇重讀，有選擇就業。現在看來，怎樣也是一門出路。

天狗食日

在九時多，忽然辦公室傳來大叫聲。看見了，看到偏蝕了。結果男男女女十幾人，在一舜間仿似變回小孩，手舞足動，拿著X光片，舉頭觀看天文奇觀。

數分鐘後，各人返回坐位，繼續沉默不語。自從年青一輩選擇另謀高就，部們來年齡層越推越高。既然自己都不再少年，只好無奈接受。

走出去會有另一天空，但太多未知數。正如昔日，看到太陽消失，天狗食日災禍來臨之說，正正反映對現實之不預期。

下雨天

小時候的名牌子

小時候沒有adidas，穿不起nike。yasaki才是我們的大牌子。今天再要求小孩子穿著，相信比死更難受。數百元一對波鞋，都不合潮流。過千元絕版，只是一季貨仔。

還記得第一次脫離yasaki的日子，都不知開心了多少個晚上(証明我也是虛偽的人 >_@")。生活富足，並不讓人學會知足。

跑步先來落雨

以為停左雨，跑唔夠一陣又落狗屎。不過既然開始左，無理由放棄。

炎夏之時，難得下雨消暑，今天在大雨中，完成全程。

盤問

很多朋友都奇怪，可解新居入伙多時，仍不大事宣揚，大攪派對。

坦白說，除了好朋友外，根本沒考慮告訢別人，尤其是公司同事，更是隻字不提，免閒言閒語。當然知道消息的朋友，再四處放風，就無話可說。

人總是八卦，一知道你搬左，又傳你忽然發左，又問樓價幾多，又問你同邊個住。

喂大佬，關你咩事姐…..!

所以我一向耍太極，你問我一句，我回番幾十句無謂野……….!

家家有本難念的經，你睇我好，我睇你好咋……!

病假

同事完病假復工，神神秘秘地休息左十幾廿日。今日返工，照舊大家無點問，相信問都唔會答，免大家難做。

公司今年真係流年不利，輪住有同事入廠。重要下下唔係兩、三日貨仔，一住就幾十日。自己慶幸暫時無穿無爛，不過多人放假，手頭工作自然多到嘔泡。

放鬆心情

放了一個短假期。記得假期前，有太多碎鎖事要兼顧，成日谷住度氣。

假期中，只是帶上相機在街上遊走。今天與同事閒談間，別人說我學攝影，從此走出電車世界。坦白說，自己比電車男更懶。懶得上網同人爭拗，懶得自吹自擂。

放假到書局看看書，隨處影下相(雖然大部份都是劣作)。原來攝影可以讓人放鬆心情。

在大街大坑，要取出相機隨拍，需要勇氣。要接受別人評相，更需要勇氣。


後記:-

今天是六月四，希望天公造美，晚上不要下雨吧…….!

睇波、踢波、講波!!!

歐聯大戰，結果唔洗多講，完全係比人技術性擊倒。

所以話，一念天堂，一念地獄。貪勝不知輸，比賽前，各方睇好，排陣失當，攻守不平衡，結果白白浪廢了一直的努力。


無咩點訓過下，自己都走左去踢波，當然唔方踢得好。

不過踢完波，能夠三、五波友，坐係茶仔，吹下水，飲杯野，食支煙，算係快樂時刻。

水戰 II

真係開口中，前日未出門口已經無停過雨。上次毛毛雨踢波，已經算近年少有。估唔到今次，十幾人決戰大雨天。可能平日谷埋太多怨氣，雨水正好幫大家消消氣。

話是話，自己其實都幾適合踢水戰。本身無技術可言，單靠體力與速度拼摶。落雨天，
反而更利簡單足球。因為香港地，不論你幾好扭點都唔及場地爛。

水戰

人越大，越怕辛苦。熱又話熱，凍又厭凍。好天望打風，落兩就唔想返工。星期六，未開波已經落緊毛毛雨。難得約齊人，無可能就咁走。結果十幾人，踢番場水戰。

間中睇英超，時不時就見比賽途中落狗屎。半場都未過，又出太陽。坐係電視機就好爽，真係落下場，就會知水戰一D都唔簡單。體力要求高，技術要更好。

不過踢完波，出番身臭汗，真係身心舒泰。落雨又有乜好愁呢!

漫畫書

上網無意間，搵到本漫晝叫『馬拉松硬漢』，真想dl來看看。

新鏡

今日經過一間相機鋪，見門口擺左盒 50mm f1.8，岩價錢即時入手。

留得青山在

兵工廠隊歐冠盃出局　肯亞球迷用球衣上吊

肯亞警方今天表示，英國足球勁旅兵工廠隊（Arsenal）在歐洲冠軍盃聯賽（Champions League）準決賽以1比4敗給勁敵曼徹斯特聯隊（Manchester United）後，肯亞的一名兵工廠隊球迷上吊自殺。

-------------------------------------------------------------------------------------------------

大佬!!輸波，無謂賠命呀? 如果係因為賭債纒身，都有教前面是未路，出路在轉角呀。反之如果因為對球隊情義結，就更加不值了。留番條命仔，來年再打併，唔係更好咩?

一個水桶的故事

『一個水桶，幾時先會出聲?』

看了龍兄既文章，想起小時候的一個故事。

事源細細過到球場踢波，認識到一班波友。其中有個肥仔，成日都會教踢波。當時年少無知，自然串串拱。一直認為肥仔吹水唔個抺嘴。

自然要搵個好日子，one on one 鬧下球技。結果就如『施路頓』遇上『肥馬』，飛晒身都摸唔到波皮。



比賽完，當然無晒心機。肥仔波友亦講了一個水桶的比喻。

一個水桶，無水同滿水既時候，係唔會出聲。(唔好答我咩科學成因，咩空間撞擊，等等。)

原因?

無料既人，根本唔敢出聲。滿肚才華既人，亦無需要多出聲。

那一個水桶在甚麼時候先會出聲呢?

................................................................。

窮人之選

想買支大光圈玩下，呢支50mm f/1.8 八舊水有交易，絕對係窮人之選。不過呢幾日搵過好多地方都無貨，看來要搵日過旺角巡巡。


PS:- 三日假期，難得好天氣，自然帶住部相機周圍影下花草樹木，自得其樂 ^^。

打書釘

從購入新玩具開始，其實只是隨處亂影一通，亦明白自己對攝影知識的不足。結果星期六、日，最佳娛樂便是到商務打書釘。可能未至七老八十，企足一日都未算太辛苦。過百元一本攝影書，未必本本寫得好，不過唔洗錢當然本本都唔會放過。

當然攪攪震，點都有少少幫襯，誠意推介...呢本真係寫得好，平靚正，適合新手。



上網搵過唔少資料，工聯會攝影初班又開始招生，四百元十課堂，希望學到野啦!!!

加價

Nikon D90 DSLR price to rise 10%

Thursday 16th April 2009
Chris Cheesman
nikon d90

Nikon is set to add another £80 to the price of its flagship consumer digital SLR, the D90, blaming exchange rate fluctuations.

From next month the D90 will cost £849.99, body only.
The 10% rise means that the price of the 12.3MP DX-format DSLR has risen by around £150 since its debut in September last year. That equates to an overall increase of 21%.

A Nikon spokeswoman said: 'As a result of volatile exchange rate conditions the RRP of the D90 will be increased from 1 May 2009.'

She pointed out that the D90 escaped the last round of price rises in March.

The D90 is Nikon's first digital SLR with on-board video.

It replaced the two-year-old D80 model.

----------------------------------------------------------------------------------


一向電子商品，越遲買越平既金科定律，少有地會越賣越貴。逆市上升，到底是市場策略比位D5000走，定係相信錢搵極都有。不過難得出機後，格價唔跌反升，心理上抵左(但實際上已經係sunk costs關咩事呢?)

學海無涯

有了新玩具，當然會日日四處拍。但越拍越覺自己基本功不足，無技巧，無構圖，只是胡亂拍。

相機第四回

終於買了 Nikon D 90 啦,正式走入單反攝影世界

要選心水品牌，價錢是重大考慮。平民版『Canon 450D』，是入門好選擇，可惜手感不及『Nikon D90』，當然價錢都高出一倍。



相機與攝影世界博大精深，空有新相機，但缺乏技術等同浪費。

帶大相機出門，不是為了滿足虛榮心，而是希望能多拍多進步。

相機第三回

今日好神心一早過去 Nikon 同 Canon 個 show room。有實物相機摸上手，感覺完全係另一個世界。始於走去門市試平機，只會比人白鴿眼。大廠有展場比人任玩，其實方便好多。尤其 Canon場，平到1000D，勁到上Mark 2都任開任影，Nikon就鎖晒入櫃，有點比下去。

不過今日試完機，1000D 同 D60都可以放棄，450D算係勉強可以接受。相信暫時目標想提升至D90。



對不起 on 兄，相信我做不成 Canon 之友了 (始於 50D實在太貴)。

問過百佬X、豐X、中X..等等，暫時最平都係中X (kit set) HK$8,980.00 + 8G card及普通配件。未知旺角會唔會再平...?

PS 不過無可否認，就算我呢個新手，攞住部 D60影相，出來個效果都明顯靚個 DC仔，可能環境因素都有好多影響吧!

相機第二回

自從放風聲話想買單反機，各方好友都提供意見。其中有朋友更不厭其煩在MSN留下四百字心得，真係感激不盡。可惜小弟完全一竅不通，朋友仔既分析，除左抵買同唔好買，呢類評語外，其餘就好似對牛彈琴。

不過最重要是了解自己需要什麼!

1. 價錢 ← 其實都係五、六千元。(無法子啦，除非大笨象回升到 $150)
2. 重量 ← 用開DC 仔，轉大機實會重，不過相信可以適應。
3. 機身 ← 機身唔一定靚仔，反正二手我都唔介意。
4. 用途 ← 只係無聊使用，主要用來影下玩具同風景 (一向都唔鐘意影人)。
5. 操控 ← 只求易學易用。
6. 器材 ← 短期內不會購入大量器材，盡量一機一鏡走天涯。
7. 借用 ← 相機就好似玩具一樣，大部份人都甚少外借!所以用咩牌子，其實都唔係咁大影響。

暫時進度:-

1.EOS 1000D 被大多數人否決…..
2.EOS 450D 用家卻推介買 Nikon或Olympus E520機……
3.發現相機真係分各大門派。Nikon人總與Canon人意見南轅北轍。但朋友仔一句又說明重點。大牌子機係好，但只限貴價機。所謂限米煮限飯，其實都有好多其它牌子可選擇。

又好似好有道理……..!



待續

PS thx On兄 & 龍兄，日後有唔明一定請教兩位。

二手單反?

用左部傻瓜 DC 五、六年，機身仍保全良好(我一向錫機)，功能簡單易用。不過呢期，好似身痕咁，想買部入門單反機。

除了當玩具之外，心態上既轉變都有影響。如其晒錢供股，不如賣供股權，補少少錢換部相機比自己。買左既實物一定係屬於自己，供左既股票，可能只係益左高層又分花紅。

講到相機，心中只有兩個品牌，Canon與 Nikon。雖然用開 Nikon DC。但前者會易上手吧? 尤其對我呢類連光圈、快門都未攪清楚既人。

暫時方案有:-

1. 好傻咁買全套新機
2. 買二手機身 + 新鏡 (咁咪無得即刻玩?)
3. 買全套二手......




不過大前題係......買咩型號都未諗到，邊度有二手又未知，連點試機都未識，死未，哈哈!

閒事

1. 好多運程專家都話今年我係辛苦年。農歷年一過，已經多了很多新工作。近來更夾雜在兩位上司的鬥爭中。其實作為小職員，最怕兩面不討好。結果兩者相爭，我先被魷。

2. 昨晚聽電台節目，發現仍有不少港人返內地遊玩，卻慘被割下身體器官。其實一路聽一路心寒。經濟發達，都無助內地改善生活嗎? 要麼仍無法無天地傷害別人以換取金錢?

3. 星期日檔案『講女』、『講男』的故事引起網上好大反應。說實話自己都中左九成，可能重差過Peter哥。所以Peter哥哥唔好灰心……!

心慌慌

昨日臨收工，收到老爸電話，通知老媽入院檢查仍未清醒，可能需要留院，要等醫生巡房後再決定。雖則生老病死，人皆會遇之，但針唔吉到肉唔知痛。到自己親身經歷，真係心都慌埋，成個人沉一沉。開始明白，點解好多死傷者家屬，遇到親人有意外後，都會迷失方向。



PS 老媽應該好番了....可以日日大魚大肉

青姐都喊!

大笨象咁跌法，真係聞者驚心，見者流淚!

希望在今天

果然今日是晴天。



休息左兩星期，今日踢波走動下，成個人都精神晒。

下雨天

非正式統計，平日返工既日子，九成會出太陽，但一去到假期天，總是下雨天。約好晒朋友，最終還是要取消活動，有時都幾無癮。

就以踢波為例，小時候真是打風落雨也不怕。學可以唔返，波總是會踢，風雨不改也。現在要約齊人已經好難，還望日日好天，否則一定踢唔成。可能人大左，真係越來越懶。

其實落雨又有咩好怕……………………… ?



會病囉 ! 死未 !

受傷期間

可能真係流年不利，自二月初受傷開始，右腳一路都未痊癒。重要忽然腳指尾起水疱，真係行路都痛。初步估計，右腳肌肉拉傷左，唔知要休息幾耐。

有時做人就係咁，呢六、七年都未試過好似呢期要停跑咁耐。

記得某年某月某日，自己寫左張post-it 係枱頭，大大隻字寫明『一星期一跑，下年玩毅行者』。結果由個日開始跑步生涯。亦於同年第一次走畢『麥徑』全程。印像中無論風吹雨打，都未試過成個星期無運動過。估唔到三十未夠，就已經唔能夠繼續自己個承諾。

到底幾時先會好番?

受傷

渣打過後，一直都覺得右腳隱隱作痛，早前踢波重要發軟蹄。印像中呢幾年參加過唔少活動，今次算係傷得最嚴重。呢刻真係連行路都覺痛，唔知要養傷幾耐先會好。

最失望既係，想跑步都無得跑，日日返工放工坐屋企，好似足球員坐冷板無得落場咁無奈。

期望天氣回暖，可以去游下水，當做下水療吧!

抽獎命

相信只有小部份員工係自願出席公司聚餐，大多數都係應酬性質。全晚流流長，除了摶會抽中獎，其實真係好無謂。自己一向無中獎運，咁多年最叻都係HK$100屈臣氐禮卷。

反而好羨慕部份同事，真係旺到你唔信。咩手提電腦、四十吋電視機、現金獎等等。差唔多抽齊全屋家電。到底係別人前世做得好事多，定有每星期買旗呢? 公司部們多，自然人又多。不過真係相熟既數埋都係得幾過。

『分身』跑手

剛 結 束 的 長 跑 盛 事 渣 打 馬 拉 松 ， 被 揭 發 「 分 身 」 醜 聞 。 全 馬 組 別 出 現 兩 名 4 號 跑 手 ， 一 名 是 賽 會 特 邀 的 香 港 代 表 隊 選 手 劉 廣 文 ， 一 名 則 是 他 的 教 練 吳 輝 揚 。 有 投 訴 人 不 滿 有 人 串 謀 欺 騙 ， 利 用 不 屬 於 自 己 的 號 碼 布 進 入 賽 道 ， 目 的 是 給 另 一 名 女 跑 手 領 跑 。 業 餘 田 徑 總 會 正 跟 進 事 件 ， 吳 輝 揚 則 堅 稱 他 是 合 法 陪 跑 ， 為 香 港 爭 光 。

資 料 顯 示 ， 4 號 真 身 屬 於 香 港 田 徑 代 表 隊 成 員 劉 廣 文 ， 由 於 他 是 特 邀 跑 手 ， 可 獲 兩 塊 號 碼 布 ， 釘 在 衣 服 的 一 前 一 後 ， 方 便 主 要 對 手 識 別 。

吳 輝 揚 續 稱 ， 當 日 本 來 沒 有 打 算 落 場 跑 ， 但 眼 見 女 徒 兒 梁 婉 芬 「 唔 係 好 掂 」 ， 於 是 加 入 陪 跑 ， 希 望 她 能 爭 取 最 佳 名 次 ， 替 香 港 力 保 「 亞 洲 前 三 」 的 位 置 。 他 又 辯 稱 ，教 練 陪 跑 在 外 國 的 馬 拉 松 賽 事 很 常 見 ， 並 非 違 規 。

----------------------------------------------------------------------------------------------

記得早年，如果係渣打員工跑渣打，唔單只免費，重有件特別員工跑衫、風褸，同會展早餐送贈。所以自己都試過借人名比賽。

不過近年，希望有番自己個成績，所以都係真身上陣。今次事件，不論成績同結果如何，作為普通香港人，大家未必會太緊張。但明顯個師父係恨鐵不成綱，眼見徒兒無態，唯有師父陪上陣。

當然一路跑，一路有人打打氣，點辛苦都會支持住，成績一定比預期理想。不過換轉角度睇，為人師表，更加應該明白，作為參加者，狀態好壞難料。雖則運動員生涯係好短暫，不過間中既失敗，可能換來明日多多既成功呢!

講到為香港人爭光，會唔會有點誇!!

馬拉松既原意係為左將喜訊帶給身邊既人，及後才演變成越快越叻，越快越成功既計分賽。計我話能夠自己一步步完成全程，就算成績點差，都已經為自己爭光。

渣打半馬 2009

咩都唔講，報左成績先:-

2hrs 04mins 44sec

成績同目標差左幾分鐘。不過考慮到今年狀態係咁多年中最差，成績反而係呢幾年中最好，但都係一個遺憾，不過人生總有遺憾，咁先有目標下年努力過。

昨晚照舊訓得唔好，年年都係咁，有無高人可以教下小弟如何化解!食過麥記靚早，就出發過尖咀。難得今年有朋友一齊起步，感覺都好好多。

最大件事既係，一開跑唔夠5公里，右腳板已經有針吉既感覺。明顯係熱身唔夠同狀態差既反映。

結果一開波，已經大落後。初期目標只係希望可追番主車群。到10公里左右，望望手錶，時間接近一小時，心諗如果自己跑快少少，或者有機會可以兩小時內完成。加上有左10公里既熱身，體內既能量開始涌出，一步步追番d『戰友』。

不過人數真係實在太多，加上大家步速唔同，間中重會有人停底影相，要左穿右插，快下慢下，其實都幾影響。建議渣打下年不如試下，分埋快慢線，等跑手好追d。

講真對賽道既熟識，對臨場應變有好大幫助。今年成績比往年好，主要都係懂得收放速度。出左西隧後有三條大斜橋，小心保留體力，到左平路先再衝刺。

下年2010希望可以參加『全馬拉松』。

大家成績又如何呢?


PS

1. 今年天氣幾岩自己，唔凍唔熱，路上都有陣陣涼風。
2. 最值得讚係大會運動飲品，改左獨立包裝。跑手可以自己決定飲用時間。
3. 分左幾段時間起步，連攞行李都分埋地方，算放便。
4. 終點有個小小紀念品，都好靚呀，儲底左2個

鞋仔日記

計聖誕交叉文後，我『阿鞋』又再次出場。今次要介紹下我個同事，『三寸高跟』。話說佢成日都笑我攪乜鬼，明明可以行街、睇戲、食飯、買衫，做乜要晨咁早，比埋錢咁去辛苦自己，訓多陣唔好咩?

其實鞋仔既生命好短暫，潮流一過，不論你幾貴，幾型仔，一樣都係擺埋鞋櫃等老死。反而學我做一對臭跑鞋，雖則可能都係兩，三年貨仔，但總算係曾經努力過。

電視機成日賣廣告，五萬五千個跑步既理由，計我話根本無需理由。因為鐘意，所以咪努力跑下去。

不過如果係終點有松隆子等我，咁就幾辛苦都抵啦!!

選手包

今年係第五年跑渣打，中午時間已約左個朋友仔去維園攞裝備。少有地人數唔算多，十公里同半馬條龍都係得幾個人。反而全馬就鬼咁長龍，可能大會明知你地都係長氣袋，等下都無仿啦。下年啦，下年我都會做番型仔既全馬人，哈哈。

見肥龍兄講開大會既紀念品好唔掂，無主題又無款，好似是旦比舊野你咁。不過呢五年既記念品同大會衫，自己都重有儲底。早幾年重懶型咁，搵人幫我班左兩件大會風褸著下。

不過今日唔知點解天氣忽然回暖，自己最怕就係咁。一係一直凍落去，又冷又熱好易病。自己重要狀態麻麻，可能又開始緊張，好怕又會失眠，未跑先腳軟。

唯有祝自己同大家都『步步有力』。

派利是

新年流流，小朋友就最開心，因為有假放，有利是收。不過唔知派利是既人又會有咩感受呢? 自己未結婚，但過年都諗左好耐，係唔係要比封利是樓下個幾位看更呢?

記得大年初一出門口，個個都鬼咁好口。不過見我無表示，年初二、三都無再理我。其實都幾矛盾，明明應該係我收利是，現在掉轉頭要我派。最弊係年初一唔派，要等到初三先派? 不過學阿媽講，鬼理你幾時派，有錢收，咩日子派都肯收。

另一個問題係，要派幾多呢? 十蚊、廿蚊? 結果都係十蚊封算，不過見到個看更收左我封利是後，要鬼鬼鼠鼠咁等我入電梯，明顯係等我一走就拆利使睇啦。唔知佢地收左有咩反應，可能厭我比得少都唔定，其實當係意外收獲咪重好!!

煨番薯母女遭檢控 200人圍觀求情

農曆新年是小販擺賣掙錢的良機，一對賣煨番薯的母女趁年卅晚，在西環卑路乍街後巷叫賣，遭食環署小販管理隊票控及拘捕。途人見狀代為求情稱「個個都想回家團年」、「家境好都不用擺賣啦」，有人更願代交罰款。惟販管隊人員充耳不聞惹起公憤，引來近200市民圍觀及直斥不近人情，事件擾攘個半小時，母女終被帶走，一名熱心市民奉上100元給她們送暖。

被販管隊票控的女事主姓陳（53歲），與20餘歲的女兒一併被帶走，兩籮番薯及手推車遭充公。街坊表示，陳婦非全職小販，僅每年年卅晚至初三才到西 環卑路乍街33號一後巷叫賣煨番薯。該處屬旁邊的堅城中心，但職員指沒向食環署投訴，附近西餅店負責人亦指母女沒阻礙店舖做生意。

被販管隊帶走 市民追贈100元

昨午12時許，陳母與女兒抵達上址開檔，至下午2時許小販管理隊巡經，指她們非法擺賣要發出傳票及拘捕她們，途人見狀紛紛代為求情說：「今日年卅 晚，個個都想回家團年，唔好拉人返去啦！」、「口頭警告算啦！」有人更願代交罰款，但販管隊決定秉公辦理，引來大批市民口諸圍攻。

由於群情洶湧，兩部警車在15分鐘後到場協助調解，有市民不滿說：「現在又不是打劫，又不用捉賊，拉小販都咁大陣仗，簡直浪費警力。」又指摘販管隊選擇性執法，因附近北街當時正有多間花檔及菜檔將貨物放於路上嚴重阻街，但他們視而不見。

擾攘近個半小時，販管隊將母女帶上食環署車輛，一名市民突從人群中撲出，將100元塞向陳婦手中，陳婦報以微笑，寒冷氣溫下感受一絲溫暖。

------------------------------------------------------------------------------

大時大節，大家都係搵餐飯食姐，洗唔洗拉人咁大件事。可能你會話犯法就係犯法，邊有分節日。香港地越來越多法規，但就越缺乏人情。

$100唔算多，又有幾多人會走出人群比出個小小支持。其實都幾佩服個位熱心市民。

大年初一

記得好多好多年前，大年初一要陪住家人周圍去拜年。當年都未有咩東涌線、坑口線。要去荃灣、去觀塘，真係要兜大大段路。而一天既行程就好似周遊列國咁過。當年其實好唔願意，重要明知所收既利使，大部份都係被家人收回。

不過唔知由幾時開始，無再去拜年，基本上大年初幾，對我都差唔多。可能過多幾年，唔再記得過年都唔定。

岩岩睇左套『老港正傳』，香港真係經歷左太多大起大落。諗心一層，自己一直都好幸福。

窄身老牛

臨近過年，周圍都大減價，諗住買番條新褲比自己。

無留意貨架上寫咩，只係岩價錢，揀岩尺碼就走去更衣室試試。一係唔著，一試就出事，單腳都穿唔落。放心，唔係因為我肥，睇真d，原來係一條修身窄腳褲。

女仔著都還可以，完全唔敢想像，一個大男人，點可以著得落。尤其係我呢D，跑慣步，踢開波既，身體發肉唔合比例。上身鬼咁瘦，雙腳又一舊舊。如果迫我著一日修身褲返工，真係大吉利使.....。

相比起聖誕，農歷新年就開心好多。唔係因為鬼佬節日唔吃香，而係新年著重一家大細團團圓圓，感覺溫暖好多。尤其而家過年，鋪頭照常營業，唔買睇下都無咁悶。睇住周街都一袋二袋，香港人無有怕啦!

計計下，自己今年都買左少少野。不過如果要我幾千銀買件衫，真係唔捨得。其實四、五百蚊已經覺得好貴。除非真係好急切需要，否則都係隨緣，話唔定過年個幾日，所有鋪頭減完再減，減下又減，又減勁減，由六折睇到3析，應該好快1折，咁就係時候入貨啦，呵呵呵!!!

祝 牛年人人都身體健康，事事順利，大吉大利。男既有錢有女，女既樣靚身材正，小朋友就唔讀書都一樣成績好，老人家當然係兒孫滿堂，聚首一堂。恭起恭起。

訓練

寒冷天氣警告之下，仍然有個傻仔，短褲衛衣，渣支水就跑落街。周街都係一家大細趕辦年貨，自己就趕住跑埋呢課。計計下離渣打既日子唔係好多，可能跑多一課就會休息等比賽。

今年新年算幾凍，一路跑一路吹住海風，如果唔係無所事事，斷估都無人會同我一樣癲。大會今年安排左係星期六、日攞比賽衫。其實都有d煩，要特登出去一趟。唔知今年又會遇到邊個呢?

積穀防飢

高官日日做show叫市民消費。星期六、日行出銅鑼灣你就知，唔洗高官開口，市民都買到無停手。可能過完聖誕，又到新年，大時大節人人都想對自己好吧。自己都有心郁郁，好想換番部iphone。


不過上網查下，閒閒地都要五千幾。最弊係自己部PDA phone賣番出去都唔值錢。要大筆錢攞出來，始終有d赤。雖然公司像徵式有小小花紅，不過今日唔知聽日事，思前想後都係決定留番個錢傍身。

睇過唔少風水大師牛年既批文，自己運氣唔多好。其中一句『辛苦得財年，無桃花無吉星』看來真係有排捱。唯有自己鼓勵自己，望事事順利。

聚舊

昨晚同左班舊同學食飯，其實大家都係一年見一兩次。通常朋友既野唔見唔見，就會開始不相往來。間中既飯局，算係為友誼吊下鹽水。不過可能真係變化太多，昔日浩浩盪盪一大班人，現在只得三五成群。

計計下自己重有來住既朋友，越數越少。初中得番5個，高中得番3個，大專算係較多，新相識既朋友始終都要時間積累友情。

唔知呢類結黨朋友，可以維繫到幾多年? 舊時我相信，好朋友係做一世，今日我會話『相識滿天下，知音有幾人』!!!

唔覺唔覺

成日都話跑步既野好奇怪，明明落街開始跑個下，好鬼累又天氣熱，知自己無咩態。但跑跑下，唔覺唔覺咁又加程完成。

記得四、五年前開始練跑。由初初一星期半個鐘，到今日跑左一個鐘頭四十五分鐘。由跑公園仔到現在次次跑街，真係唔覺唔覺咁成長。

唔覺唔覺咁，可能又會完成左今年既渣打。不過只係短期目標，如果好彩應該可以長跑長有吧。

做人有時就係咁，明明想有d攪作，但又唔知可以做d乜，唔覺唔覺咁又過左咁多年。

--------------------------------------------------------------------------

另一樣唔覺唔覺既野係價錢。

話說臨近過年，趁超市有折扣都快快手掃下糖果零食。買既野唔算太多，價錢都心中有數。平日可能比完八達通，do兩聲就連單都唔攞就走人。今日出奇地細心，走出門口唔夠兩步，已經心血來潮check下張單，發覺無啦啦貴左HK$9.8。

當然作為消費者，加上自己又最憎比人搵笨，第一時間折返超市。見過唔少人同收銀阿姐爭拗既情況。自己無咁蠢，口講無憑。走入貨架，折埋個價錢牌先去對質。

初頭個阿姐都死口話無錯，不過我一句『唔理你呀，你地司攪錯，係你地問題』，佢都無野好講。其實自己都預左退貨回水就算，不過可能條龍實在太多人，阿姐都費鬼事同我嘈，索性用鎖匙人手改機退錢算。

講真金額唔係多，不過諗心一層。超市用折扣引客速售，人人都一車滿貨。唔理佢係電腦問題，定係人手出錯，又有幾多人會遂件數下有無計錯。比少少折扣你，但又打貴番你一兩件貨，除笨有精，可能你重要蝕番比佢。

住慣左

自從搬家後，初頭都有d驚。無他既，一年都唔病下，新居入伙就病到要睇醫生，初頭真係以為屋企有污漕野。但諗心一層，咁大個人，都無咩好怕。

『本來無一物，何處惹塵埃』!!!

其實都唔係第一次搬開住。讀書既時候都試過住宿舍，同一大班同學仔住左三年。當年一條走廊一呼百應，夜夜都唔願訓，訓醒已經日上三干。反觀現在，連隔離屋係邊個都未知。

不過搬出來住都有好處。就係生活空間多左，家俱擺設又可以自已決定。最重要係，同家人感覺都好似唔同左。可能少見左，更加珍惜一家人一齊食飯既感覺。

買鞋的一天

由細到大，阿媽都教落好多習俗。其中新年著新鞋，就咁多年都無改變過。

記得細過，每逄年三十晚，食過團年飯，就一定會一家人先回家換過新鞋，再一齊落街行過大運。小朋友重要一路行，一路諗諗有詞:-『賣懶，賣懶，賣到年三十晚，人懶我唔懶』。不過賣左咁多年，都唔見自己有點勤力過，哈哈!!

由『也沙kee』、『add-in』到人生第一對有牌子既『Puma』波鞋。當期時真係好開心，著住對新鞋拜年，硬係覺得人人都會望住，特別醒神。諗深一層，呢d咪叫虛榮心囉!!

近年咩都從簡，自己平日更加唔會無啦啦買鞋，但過年著新鞋既習慣就一直繼續。

而自己買鞋，其實都幾講第一感覺。明明一開始睇中左對鞋，硬係要行足幾條街，睇晒所有款式，到頭來都係買番一早睇中個一對。

記得有年，想買既鞋斷晒碼。試過由銅鑼灣掃到落灣仔，問晒所有鞋鋪，再搭車落旺角波鞋街搵鞋。

呢幾年，人越來越懶，好多時係屋企附近既鋪頭攪掂就算。不過唔知係自己太無眼光定有唔少同道中人。成日睇中既款式，唔係無晒貨，就係無我碼。結果都係要特登搭兩蚊丁丁落銅鑼灣搵鞋。

其實我0只係買左一對好普通，$439既nike 波鞋........!



--------------------------------------------------------------------------

渣打越來越近，雖然跑咩時間，自己係無咩壓力。當然目標時間就年年都心中有數，做唔做到又係另一回事。

今日天氣雖然好凍，但落街跑步個陣，迎面都見到唔少渣打跑手。有好多短袖衫連水都無支就起跑。

自己呢?

差唔多包到好似隻粽咁，不過可能天氣凍左，流汗少左，今日狀態都唔錯，輕鬆跑完約15公里。雙腳都唔算太累，最希望自己同各位跑手，都保重身體，新年後就係尖咀起步。

改變

新一年話左要變，第一樣要改變係要大胆d。尤其係約下女女，就更加要主動啦。不過要周街去識人，又好似唔知點咁，可能電話都未攞到，人地已經打左999。

好彩科技進步，有facebook可以周圍add人，魚翁撒網願者上吊。呢幾年真係好大變化。由早期既ICQ到網上討論區，人人都好似變晒分身咁。返工一個人，放工又係一個人。平日可以係衰人，上網扮晒大好人。況且人人無樣睇，單靠文字又真係厄到唔少人。

物極必反

結果攪到網上世界，周不時都會有大新聞。人人以為唔洗上身，鐘意又攪下人。現在返樸歸真，唔理好人壞人，用真樣視人，岩傾既咪一齊傾，唔采既咪add過第二個。睇見d朋友，個friends list 成串咁長，幾百人、甚至過千人，又有幾多個真係認識。離唔開都係亂咁add，望兩眼見唔多順，咪擺埋一、二邊。

不過都有好既，能夠搵番失散左好多年既同學仔，又真係幾盞鬼。

其實睇番日本，鬼咁多隱閉青年、中年或老年。完全唔敢想像，一個人可以一年365日都唔出街，日日沉醉係互聯網個世界。

根本同活死人無分別!!!

新生活

距離渣打既日子越來越近，但狀態無咩點提升過。一來真係懶左好多，二來呢幾年好似到左樽頸位，再跑唔番上去。

睇見其它網友，前前後後報左好多不同比賽。自己呢? 年年都只係得一個渣打，今年希望會有少少改變，試下不同路線，可能會迫番出個鬥心。

PS 有無人知，其它比賽既資料呀?

----------------------------------------------------------------------------

呢一個月飲左幾餐酒，見到身邊既同學都成立室。自己重好似長唔大咁，有時都有d汗顏。大家坐埋一圍，感覺好格格不入。一大班人既活動，離唔開飲酒，下下都話飲。邊會話一大班人去練跑咁傻仔。

但要我晚晚玩天光，我又唔鐘意。就算明知第二朝無野做，都唔希望訓醒已經又天黑。其實星期六、日可以早少少起身，同家人飲下茶 (其實係厄飯食!!!)。中午再跑下步，都重有好多時間用。如果飲完一晚，第二日真係腳仔都軟埋。

不過生活越有規律，咪越同人玩唔埋。自己一向都相信，世界咁大，總有同自己岩傾既人既。阿Q左好多年，希望09會搵到『新生活』啦。

新年第一課!

一早預備左一月一去操番一課。咁岩天氣鬼咁好，食完午餐，即刻換衫跑落街。雖然狀態唔太好，不過感覺幾好。

捱過左艱辛既零八年，人人都話零九更衰‧我就話希望今年同跑步一樣，有咩難關都大大步跑過。

正式進入渣打半馬既倒數日誌.......

同祝大家 ........

再見2008

08年真係過得好快，轉眼又到年尾。更加唔覺自己做左d咩大事，想回顧都無野好寫。其實一路都明，好多時係自己收埋自己，多過人地唔去理你。← 只不過真係唔知點解，自己全年都想冬眠咁。

新一年就到，年年都會寫下來年展望，有幾多做唔到，又幾多無諗到。舊既野無謂再寫咁多，過去既就等佢自動慢慢從記憶消失。← 我成日都話自己係RAM，轉數快，但一熄機就咩都無晒!!!

09年應該會係辛苦既一年，好多紅假都係星期六，結果好似個個月都無咩假放。← 唔好話我懶，打工仔係咁。

年年都話想搵野學下，返學既日子係好似好充實，但交完學費，上完晒堂，其實又唔係好知學過d乜。← 我諗最大問題係，自己一直都唔知自己想學乜。

轉左新居所，比預期中快適應，可能自己一向都自我中心，一個人既日子，其實生活都係咁過。最慘係電話渣起手，連一個可以打出既號碼都無，咁你話灰唔灰!!!← 放心我未有自殺傾向，亦都唔鼓勵自殘身體。

成日都講同一番說話安慰人地、安慰自己:-

『生活上有太多唔開心既事情，亦正正係有咁多唔開心既事發生，先讓人學懂珍惜開心既日子。如果日日都開心，根本唔知咩叫開心。』

公司走左太多朋友，現在真係為左返工而返工。好羨慕別人可以有一大班同事開開心心，組織下公司足球隊，節日出來蒲蒲。雖則自己曾經都試做過一間開心既公司，但前途有限，為左有野學，人生總要取捨。

聖誕過後

話說終於都過左呢四日假期，快樂不知時日過，但唔快樂，日子都係咁過。全年咁多個節日，其實最唔鐘意首選聖誕。

話咁快又除夕，不過一日半日訓醒已經又一日。

呢個假期，最大變化係想學飲紅酒。經過超市，望見幾十款酒，真係唔多識揀。鬼唔知越貴越好，不過作為新手，無理由買支幾百蚊咁晒。結果上網查左一查，見有人介紹d超市平價貨，都即刻入番支。

昨晚試開左，個木塞鬼咁實，攪左五分鐘先開到個樽。最閉係一個人又飲唔晒，成日下下擺幾日，想唔變味都難。

衰經濟，照消費，香港人，無閉翳。如果有經過商場，根本唔覺市道差，人人都一袋二袋。不過咁都好，寧可自己買唔到，總好過個個收埋等運到。

"敢於愛與被愛" by 巴林 (聖誕交叉blog)

倪生同周小姐由分手到決定結婚真係好睇過電影，

劇情發展真係估佢唔到，

同期加映某電視台高層極速分手再復合(雖然貌合神離)，

倪周兩人感情發展係大部分人餸飯必選，

但係去到7記見到所有雜誌都用佢地做封面真係飽到嘔。

倪生結婚復合宣言都幾情深，

但係周小姐受玉女掌門人之名所害而被認為犯濺，

現實中既愛情好多時都係互相諒解，

既然周小姐因為愛而同倪生走在一起，

我傾向祝福多於批評佢地。

錯真的不可原諒嗎?

其實原諒一個人可以好簡單但又可以好困難，

既然當事人願意去原諒佢愛既人，

就讓他們去愛吧！

聖誕佳節，Merry Christmas !

學習愛與被愛，

忘卻海嘨慶祝聖誕 !

by 巴林

----------------------------------------------------------------------


補貼番自己篇爛文


我叫阿『鞋』，個名其實幾老土，一向唔走時款路，無一tick，無三間。滿身泥濘與傷疤，腳配狗牙既行山一族。

記得早年『非典』，大家都忽然熱愛郊遊。以為郊區空氣好，遠離閙市無人到，無需扮醫生，口罩不離身。

人云亦云好，唔跟就老土。一時間郊區旺過市區，人人放假仆到去。時勢做英雄，小鞋在那刻與主人相遇‧還有死黨『襪仔』。平日足不出戶，但為左健康，都希望練好身體。

時移世易，縱然走過五百公里，今日落得默守家門。生活轉變，股市日日升，唔好話出門，『踢拖』都要望住個市。連最佳拍擋『襪仔』，呢幾年都索性轉型，一身紅衣打扮，由昔日辛勤勞碌，保護雙足。到今日掛在窗邊，盼望聖誕老人拋下黃金，從此享受餘生。

結果又係自欺欺人!

物極必反，金融海嘯。有錢唔敢洗，有病敢睇。唔怕自己抄濃，最怕老闆抄輸。

踏破鐵鞋無覓處，要解危解困，從歷史中學習，從經驗中成長。曾經陪主人大步上山，緩步下山，今時仍可走出谷底。

正所謂『家有一老，如有一寶。家中重有一對陪你走過荊棘滿途既鞋仔』。

祝願各位:-

『聖誕快樂，同步過冬，明年一同上山鬆一鬆』。

聖誕前倒數

已經收到鎚兄送來既交叉文，再去番原作者既網誌望過兩眼。完全覺得係一個專業股評人既網站。咁都好既，籍著呢次交流，讓自己又認識多一個好網站。

明天會依時登出作品......唔知自己篇爛文又會登左去邊呢?



------------------------------------------------------------------------------------


後記:-

晚上約左班中學同學食飯，大家都差唔多有一年多無見。平日唔見既原因，可能係因為自己唔敢見佢地吧。相比起以前，自己其實一路都比下去。幾十歲人一事無成既感覺，每次見面都會提番起。

不過最估唔到係，今次連一眾男人老狗，出來飯局既話題都係講結婚同點搵錢擺酒。唔通真係，人到左某個年紀，唔結婚唔得?

酒入愁腸

可能年紀大，但思想同行為，完全唔成正比。

細過打死都話唔會著恤衫西褲出街，結果現在一星期著足五日。

細過成日覺得食煙好型，現在後悔自己做咩浪費左咁多生命資源。

細過話飲啤酒要大大箱咁先勁，現在覺得要開始學識嘆紅酒。

--------------------------------------------------------------------------

話說公司抽獎，今年又抽中支紅酒。呢幾年時不時都有抽中，但一次都未正式飲過。今日放工，都即刻走去買番幾個紅酒杯。期待放假既日子，要飲番兩杯先。

相識於微時

今朝早出席左個朋友個就職慶典，朋友仔經過多年努力，終於榮升專業人士。其實個儀式只係廿分鐘，莊嚴又不乏笑位。同朋友仔算係相識於微時，唔覺唔覺又多左個十年朋友。

最攪鬼係，自己到會場準備上前同朋友仔打招呼之際，竟然有吧女人聲叫停我。回頭一望，原來係阿嫂，不過就點都記唔起佢叫咩名，甚至活動完左回程歸家，都係諗唔起。唔知係我善忘，定係阿嫂變化太大。由昔日既掃雷車，今日都變成 Lady。

----------------------------------------------------------------------------

其實唔只一次失憶，之前日記都有提及過，自己成日出席D同學活動，大家傾開既昔日往事，自己都好似一片空白咁。(唔通我真係曾經被外星人洗腦 /0..0\ !!!!)

可能係自己唔敢面對舊日既自己，所以腦神經自我產生刪除功能，否則無理由廿幾歲仔，咁快喪失記憶能力。

所以我咁多年都 keep 住寫日記係岩既!!

-----------------------------------------------------------------------------



其實想買呢個『車軚鐘』好耐，一路都唔捨得。咁岩呢期屋企又有需要，終於都用左廿蚊帶佢回家。不過年尾流流先買鐘，好似唔係幾好咁。

----------------------------------------------------------------------------

咁唔知聖誕鐘、買匯豐，又會唔會好d呢?

百三蚊都夠胆入市，反而星期五收市報 HK$77，自己會考慮咁耐。不過自從雷曼事件，硬係覺得唔應該將所有雞蛋放晒係同一個籃。幾穩陣既公司，都會有貪心既員工，都會有失策既時候。結果一直都係十五、十六，唔買唔舒服，買左又怕輸獲熟。

十一月初，明明計劃好年尾買番兩手 2800盈富基金比自己當聖誕禮物，唔知下星期有無入市機會呢?

殺價超人倒下來

亞視都算攪鬼，個頭搵兩個高層回來改變，轉頭又四分五裂。無人知個實際情況係點，更唔知個結果係點。好有可能係某d人相變，某d人唔肯變，結果變成泰國兵變。

其實黃生比我感覺唔差，話晒我都幫過佢打工，當年都用過CTI 56k modem dial up上網。記得CTI總部係荃灣附近既工業大廈。咁岩重要同黃生同層工作，佢間房話大唔大，但全落地玻璃開放式既設計，確實感覺良好。起碼唔似d老闆，好鐘意間房幾十樣野遮住，方死比員工知你係入面做緊咩咁。

對自己既工作室都有咁既安排，就會明白點解佢話要改革，要將冷冰冰既寫字樓重新裝置。

其實作為打工仔，一生人大部份時間都係公司過。如果返工唔開心，其實都幾影響情緒同工作。自己算係一個識自我調節既人，真係比一部電腦同互聯網就夠我過活。差d試過全日都唔講一句野。

無他既，同d同事有代溝，自己又硬頸。成日覺得值得識既朋友先去傾下計，其他人無咩必要去打交道。

加上近年搬左個好位，平日可以話自成一角，山高皇帝遠。

-----------------------------------------------------------------------------------

消費模式

基本生活開支
衝動性購買
日常娛樂雜費
大時大節洗費
突如其來破費

個人覺得大致可以分為呢五種，好多都無可避免。尤其係過時過節，幾唔願意都好，都會有好多洗費。見到報紙雜誌日日宣傳，處處商場都減價爭客，d人好自然有錢就身痕。

自己呢?

成日都話跟住我，都幾淒慘。一定食唔好，住唔好，連買少少野都托手爭既人。已經好耐無買過貴野比自己，可能生活無咩特別不足，有其它消費可以算係bonus。

聖誕又就到，呢期最煩惱係好唔好隻身參加party。其實自己都唔只一次參加新節目，so far結果都唔差，重要成功識到一班好朋友。唔明今次做咩要考慮咁耐。

聖誕交叉blog 2008

其實上年已經知有呢個活動。不過自知自己文筆差，又成日寫白字，又無咩創作技巧。怕會出醜在人前，結果都係決定做旁觀者。

不過睇番個活動，真係好得意。唔少高手既文筆同故事性都一流。尤其係d出名網誌，可以用精采來形容。

今年活動仍是繼續，自己都諗左好耐，計劃會寫乜，連稿都準備好晒，先夠胆報名。其實大家都唔識大家，又未見個真人，何必咁愁。

如果一個好彩，自己篇爛文，可以係d大哥輩網誌登出，就更加可以話開心死人。唔係話會多人欣賞，而係好似帶壞一個學生咁，好好一個網站，從未如此爛文過，諗起都過癮。

詳情可見 聖誕交叉blog

睇下個lists 咁長就知正!

* 窮媽媽富媽媽
* bacakara
* 許港生
* 魔少
* doodoodoochang
* 學霖
* Karen
* 小小CPA
* 簡單田
* 湯記
* ClubEddy
* 尹思哲
* 悟樂
* 巴林
* 大口仔
* 卡臣
* Desertfox
* the8
* 小石頭
* Enigma
* 五師兄
* Justin
* C.M.
* 孖瑩
* 黛
* skyx
* Zoe 豬
* 火鶴
* 李小龍
* Hana
* 億利
* Miss D
* 市場維京人
* Genius Leung
* 南區肥龍
* 石先生
* 數奇門
* CK
* 馬沙
* 野蠻郡主
* 渣估
* BabyMonster
* Marshmallow
* 小鎚

有強姦無侷賭

近日有藝員於澳門欠下80萬元賭債，連累電視城外牆、家人寓所外及經營的咖啡店被人淋紅油警告。

----------------------------------------------------------------------------

欠債還錢，天經地義。年青人誤入騙局，輸掉血汗錢，錢可以賺番，但影響家人同朋友先係最大問題。

記得細過識得一個人同藝員咁岩又係同名同姓，唔知係唔係同一人。從來都話『輸錢皆因贏錢起』，咁大個人有時真係要學識『say no』，三思而後行。

記得自己未夠18歲已經試過賭馬仔，初頭實有少少甜頭，結果都係輸番晒。從此明白自己無咩賭運，穩穩陣陣先係生存之道。

經一事，長一智。

年尾小結

踏入12月，又係一個總結。咁又一年，轉眼又過左廿幾年，都咪話唔灰。

記唔晒呢年定左咩目標，只係知有好多都唔達標。

話詳要儲錢買多幾手大笨象。呢刻HK$8X都唔敢亂買。唔係唔知大笨象出名穩陣，但幾穩陣都會有風險，無理由將所有蛋放晒係一個籃。最慘係呢期，有錢都唔敢亂投籃。

今年無詳學過新野，只係叫學識左玩 3 X 3扭計骰，完全係零成長，又話者開始明白，學埋咁多無謂野，但又唔係有專業資格，結果等同晒錢。

工作上叫做穩穩陣陣，餓我唔死，發我唔起。工作量同外界相比，已經係超級舒服，嘆慣世界，自然令自己懼怕轉變，轉得好就好，轉差左都唔知可以點。公司走左好多朋友，好多入職時相識既都走得七七八八。現在返工真係望住個Mon過活。

家庭既最大轉變，就係估唔到會上左車。由年中開始攪，年尾由裝修到入伙，只一舜間既事。不過放工回家一片漆黑，再望住四面牆，都咪話唔悶。開支又係另一個問題。昔日食住屋企，今日咩都要靠自己。一個金融危機，令到自己都充滿危機，畢左業咁耐，除左叫做有少少工作經驗，其實都無咩渣係手。一個唔好彩被裁，出到勞動市場，真係無乜競爭力。

朋友圈開始停滯不前，舊有既開始少見左，新相識既又硬係好似唔係幾投契。今年重要特別多朋友結婚，或者宣報準備結婚，個個都開始進入搶閘既日子。不過出席某某既婚禮，就係最好既聚舊飯局。平日無咩點見，去飲就大家都有得見。

呢幾年唯一無改變既，係跑步既日子，仍然努力維持。記得初期，跑步係為左訓練體能，為左參加毅行者。現在開始慢慢變為生活習慣，開始享受每次跑步既機會。不過人總係懶散，總係會比籍口自己。

-----------------------------------------------------------------------------------



深水埗電腦節繼續逆市刷新銷售紀錄，隨着周日再有12萬人入場掃貨，豪花5800萬元，銷售額累計3天已達1.7億元，「肯定大破去年4日1.8億紀錄」。

-----------------------------------------------------------------------------------

電腦節勁賺，証明左香港人其實大把錢，只係你引唔引到佢洗錢。講真有用開科技產品既人，正常屋企都已經有Mon、有電視。返到屋企無得上網，重慘過叫佢去死。根本唔會等到電腦節先來入貨。

幾十蚊有一隻USB手指，幾百蚊有相片打印機，幾千蚊已經乜都買到。呢一種富豪走入名店掃貨既感覺，呢幾日係深水步就可以享受到。

不過話分兩頭，能夠係大時大節，買少少野乙水下自己，都不失為逆景中，少少既自我鼓勵。

小狗的執著

搬家後，小狗出奇地硬頸。雖然飯照食，水照飲，但就係一直唔肯安定下來。時不時隔離左右有咩風吹草動，開門開閘，都一定要去門口視察下。昔日都未試過咁勤力，估唔到家下先來個資源增值。

其實小狗同人一樣都係怕被遺棄，但又無力反抗。日日唔係食同訓，其實就係等家庭成員出現。

搬家第二階段

搬遷工程進入第二期，今次主角係老狗。記得小狗細細過已經跟住老爸，真係老爸咳一聲都會仆過去望下。現在老狗要搬家，家人當然唔會怕，因為明知距離不遠，成日都可以再見。

最煩係老狗根本唔會明，明明好好地住大屋，有人照顧、有人畏飯。現在要開始轉換環境，都唔知慣唔慣。有D似狗到中年先來折墮，又無力反抗，又無得爭取，只有默默承受。不過換左新環境，可能生活圈子會好左，又可能有機會識到其它狗女，焉知非福呢!

--------------------------------------------------------------------------------

不過呢期可能頻頻樸樸太多，昨晚跑完步沖過涼又要仆回老家吃晚飯。初期都無乜野，但坐多陣開始覺得唔係幾妥，開始有d作嘔作悶，差d以為自己有左! 結果返到屋企，即時做好準備，擺定杯水係書枱，放定個盤係床頭，有咩唔對路，都唔會嘔到周屋都係。十點已經爬上床，一路聽收音機，一路wing wing 地。不過好彩今朝起身，又回復狀態^^。

---------------------------------------------------------------------------------

呢期好似唔係幾順咁，又收到個壞消息，有同事家中有大吉利使野。自己也即時反思下，如果有朝一日輪到自己，有無能力去面對。平日家人幫自己就好似老逢，自己幫屋企少少就話唔好。

朋友就是治病良方

病向淺中醫

昨日喉嚨痛到連吞口水都痛，根本無晒食慾，訓又訓唔到。結果今朝都係偷偷地係辦公時間鼠去睇醫生。連醫生都奇怪點解會發炎到咁紅，以為我有咩暗病。

就係咁醫生比左兩日藥同一樽咳水。唔食又只何，一食即時『睡魔』上身，差d失去知覺。最慘係今晚重有野要做，呢刻都唔敢再食d藥住，怕真係暈左係馬路中心都唔奇。

-------------------------------------------------------------------------

話說晚上係朋友仔既大日子，幾唔舒服都要比面。為左做好準備，到場前已經走左去『海皇粥店』食碗白粥、食碟齊腸填下肚(無法子啦，病到咁，唔戒口掂得)。不過一路食就一路呻救命，個喉嚨好似就快爆咁。

差唔多夠鐘，點都要頂硬上。去到見到好多舊朋友，明明唔飲得，都要飲番少少紅酒過下癮。出奇地身體放鬆左，病都好似好左D。

睇見身邊既朋友，一個二個都過得幸福，有時都幾羨幕。

祝 朋友仔身體健康，白頭到老。

大吉利使

都係自己胃食，昨日忍唔到口，一個人食左十幾粒牛肉乾。食完飯都未落格，又嘆左份百福凍豆花，之後重要食埋個凍雪梨作宵夜。

結果訓訓下覺已經知出事，個喉龍鬼咁乾，吞口水都痛。結果成晚就係咁過，第二朝起身好彩未見有傷風同肚痛。如果唔係真係有排煩。

唔知係呢排操得太行，跑步凍親加埋食生冷野問題。定係新屋問題，搬左入去都唔夠一個星期已經作病。不過呢，凡事應該要向好既方面諗，係自己唔戒口，無得怨天尤人，話鬼閙神。

聖誕同新年呢d大日子，就算點唔玩，都避唔到會食下自助餐，打下邊爐仔。希望腸胃生生性性，唔好成日扭計。

拖著紙皮的日子

為左執屋請左假無返工，呢個市勢請假都要抱好大決心，真係唔知遲下重有無工開。

呢一輪，尤其係放工時段，睇住男士西裝骨骨，女士短裙飄飄。自己就差唔多日日都係拖著紙皮同膠箱往來。唔知情既人，可能真係會估，加下後生世仔都要同阿婆爭飯食。

最弊係，市道幾唔好，紅色炸彈一樣日日有驚喜。數數手指，兩個月都唔夠，已經要飲三餐。就算係公價五舊，都唔左大大隻金牛，都咪話唔赤!

柴米油盬醬醋茶

終於都正式搬家，一架貨車，廿箱雜物，一陣風咁就又街口搬到另一個街口。

老媽子教路，食過燒肉，拜過四方，新屋入伙，但求身體健康，事事順利，大吉大利。

自己都有自己個方法，就係即係走落街，跑番課步，但願日日好腳頭，一路順風。

---------------------------------------------------------------------------

不過搬開左，都有煩惱架。間屋鬼咁靜，唔開電腦既話，真係靜個自修室。空間多左，但開支都大左。所有家居用品，上至食物，下至潔手液，都要自己一手包晒。小數怕長計，看來我都要化身『C 9』，周圍格下價，做個無錢既消費者。

---------------------------------------------------------------------------

不過所謂大屋搬細屋，唔見一籮穀。一日都未過，就發現唔見左，平日用來跑步既計時錶。話晒隻錶都跟左我超過十年，今次已經係第二失蹤，希望可以搵得番啦!


半小時後................

真係唔到你唔信邪，明明搵過幾次都唔見係個袋入面。但過多一陣，佢又會自然出現，呢d咪叫『百厭』law。

讓我們認識更多朋友

日本漫畫足球少將出左幾十年，真係由細睇到大。

記得由中學開，已經唔鐘意打籃球。可能自己生得矮，無謂自暴其短。踢波就唔怕，你睇老馬同美斯咪一樣咁威。

結果細細過已經落維園踢波，最遺憾係唔可以有一班由細踢到大既波友。年紀大左，更加珍惜有波既既日子。無天份，無技術，呢刻都可以用體力搭夠。他朝老左，唔通要好似d維園阿怕咁，圍圈搓波咩!

呢大半年，好彩又識番個波友，間中都可以有波鬥。雖然場場唔同隊友，無咩默契可言，但有得鬥重好過坐係屋企打Winning啦。

坦白講一向都相信男仔普遍都係好勝動物。乜都鐘意鬥，單打獨鬥，團體群鬥。讀書時代比d朋友當係垃圾球員，踢垃圾時間。今時今日都好想可踢番場爭氣波。通常倒弋相向既，都會有好表現架。

唔知幾時有呢個機會?

其實除左希望踢場好波外，踢完波可以一大班朋友，坐埋食杯汽水吹下水，食餐便飯串下嘴，比你去一田瘋狂購物更開心啦。

『傻客』刺激經濟

如果真係相信，明年經濟會更差，失業率上升，大公司日日裁員。呢兩日放完假，明天返工可能連個位都無埋‧咁係咪應該要減少消費呢?

呢兩日游完水都經過SOGO，照舊上去打個白鴿轉。層層都減價，但無樣野係想買，同真係要買。淨睇唔買既叫『遊客』，攪攪陣唔幫襯叫『衰客』，真金白銀出手先係『顧客』。唔少重係一袋二袋，係唔係真係咁抵?

記得SARS年期，周街都平貨，越遲買越抵。如果照咁推論，明年都未到，就洗晒明年既quota，咁係咪叫『傻客』呢?

人肉搬運公司

成日口口聲聲話，唔好太辛苦啦，等正日先搵師傳搬啦。

結果呢?

差唔多個個星期都人肉送貨機。好多怕打爛，但又一d都唔值錢既，都係人手搬運。最衰自己無車，同埋唔識裝櫃。如果唔係真係可係call架雞記，一箱箱紙盒車走咪得。

除左新屋，舊屋呢邊都要大翻新。好多家俱都要移位。一家人假日既節目，就係執野同搬野。最犀利係連兩張床同兩個大櫃都係靠自己。

要走既野都執得七七八八，欠既都係電腦。不過電腦一向都係最後防線，臨走前一晚先入盒都唔遲啦，如果唔係呢幾日點過，哈哈。

尚有十一天

唔經唔覺六月開始到十一月，好似轉眼就過左。中間發生左一件可能改變一生既大事。有邊個估到年初明明歌舞昇平，年尾會爆全球股災。一個唔覺意，如果市道再差，小弟隨時由上車客變負資產。真係未搵到第一桶金，已經比市場打你一獲甘。

年初一直埋怨工作不如意，大不了轉個份工，今日慶幸每朝仍然要返工。細過一直想過私人生活，呢刻反而陪多左家人。

所謂迫上樑山，做唔做英雄好閒，保住收支平衡先至煩。

------------------------------------------------------------------------------------------

執執下野，先知自己一個人都執左廿個紙皮箱(重未計衫褲鞋襪)。唔知男仔來講，算唔算有點兒過份?

搬走左，生活上好多細節都會有所改變，不過懶散既性格不變。可能好快新居都變戰亂區。哈哈。

-------------------------------------------------------------------------------------

前日聽完架勢堂，講開享樂主義。森美話60年代、70年代、80年代同90年代出生既人都好唔同。

60年代未出世唔知生活點。自己算係70、80年代既中年人，算係未捱過最辛苦既日子，又未試過90年代普遍豐衣足食，要乜有乜既歲月。

成日有人話90年代既年青一輩，過份貪求享樂。日日追名牌，季季換新裝，年年去旅行。學老爸成日嬲:-『飯來張口，錢來伸手』。

其實現實係唔係咁，自己真係唔知(皆因我唔係90年代既人)。不過眼見好多年青人，真係好鬼有米。記得細細過自己好想有架搖控車，真係恨左好耐都無。誰不知某年表哥生日，老爸竟然買左架車送比表哥。個刻真係好唔開心，唔明點解，自己個仔想要就唔買，送比人地個仔就貴一貴都唔怕。結果成為左一個童年遺憾。

不過人生總需要一點遺憾，先會讓你記得。講真好多細過既野，我真係唔記得。唔知係咪失左憶，有時感覺真係一片空白，可能好似MIB咁，自己比人洗左腦都奇。

反而呢，好多唔開心既事，反而會令人回味。昔日既失落，今日睇番，其實好閒事。唔好話搖控車，衰衰地真既都可以租架來玩下。只係感覺唔同左，呢D就係點點童真。

森美又提到，年青一輩完全無儲蓄習慣。出糧唔係個個月清，都見得有錢帶落袋。其實有D似美國式生活。一味鼓勵消費，有咩事政付會出手。同樣地自己既老爸老媽捱過艱苦既歲月，將心比已，無咩邊個會想自己既兒女同樣受苦。自自然小朋友一出世，爸媽唔食都盡量滿足佢地。咁又算唔算係一個社會問題?

當然唔係話人人要過『苦行憎』既生活，但間中一個反思，未常唔係一件好事。

加操!

昨晚查到朋友再一次成功完成100公里，自己都要比心機。今日見天氣咁好，又小小涼意，即時加緊操練。

大約跑左15公里，時間同體能有待提升，但鬥志明顯係比友人既毅力感染。

『不退縮，因為有信念』

「100km毅行100%扶貧」

今日又係2008樂施毅行者既大日子，自己雖然退左役，但都會繼續支持同鼓勵所有上山既毅行者。

自己同自己比

兜兜轉轉，呢幾年都學過唔少課程，有d 係貪得意，有d係見有政府比錢，所以唔志在。不過望翻轉頭，其實好多都無詳專業資格。唔只係晒錢晒時間，甚至乎可以講係可有可無。十幾歲就望早d畢業，廿幾歲就望搵份好工，快到三十歲，反而唔覺有咩大成就。養妻活兒未有本事，考順父母都係得過且過。尊重朋友等於見到唔見，行街唔買野，假日唔想出街。遲下搬埋屋，可以宣怖正式歸隱山森都似。

不同生活背景，有不同生活壓力，擔心源自比較。人同人既比較，朋友同朋友既比較，甚至家人之間既比較。到外國旅遊既日子，曾經好羨慕農村既生活。十幾日旅行既日子，無得上網，無得打機，唔會日日追劇集。日日都係自給自足，生活簡單到無得再簡單，因為根本手停口停，但反而無咩比較。因為當人人都窮，打開晒大門都無野比人偷時，重點洗比。

反而返到香港，忽然覺得生活好緊迫。好似自己唔學埋人地咁急，就係浪費左時間，浪費左青春。有機會早放工，靜靜地一個人係屋企上下網，聽下收音機，其實都唔係咩問題姐? 做乜攪到好似要自已怪自己，呢d咪叫『心魔』。

正所謂各有前因莫羨人，食幾多著幾多，除左整定外，自己都勉強有得揀吧?

生日會

今日晚上食左餐生日飯，不過唔係同朋友慶祝生日，今次係老鎷子60大壽。估唔到日子真係過得咁快。祝願家人同自己都身體健康，幸福快樂。

手機、上網月費

由中學離開用『call機』既日子開始，手機上台由和記→Sunday→新世界→數碼通。電話款式都轉過幾次，唯獨電話號碼算係與我常在。

一路都以為交唔足一舊水月費已經算好抵。誰不知一問之下，身邊有唔少朋友、同事都係交緊幾十蚊一個月，有D誇到$38乜叉都包晒。自己交一個月等月佢交三個月，重要自己D分鐘長期係用唔晒，你話死唔死。

經濟不景，節省開支既其中一個方法，除左減少不必要既娛樂，即時都那那淋周圍格下價，盡量減少埋基本生活開支，俗稱fixed costs。不過自己都係怕事同怕煩，最後都係打番上台自己cut 分鐘同爭取每月減多廿蚊就收貨。簽多15個月，每月$60，但無左好多分鐘。雖則我都唔會點用，但感覺好似比人厄左咁。

------------------------------------------------------------------------

攪完電話費，又到上網月費。返到屋企無得上網，真係等同叫我去死。最好既計劃，當然係一搬屋個日就有網上。自己都計足時間，今日落街問下sales報下價。唔知係唔係自己口材唔好，定真係唔夠煩，硬係覺得攞唔到D咩好offer。重要比個sales坤左我簽足30個月，兩年半後都唔知係個咩世界了。

網上爬 6M

寬頻電視 2 個台 (新聞 & 電影台)

一個月試用XX，兩個月室內wifi，6個月室外wifi，

超市 $100現金卷，4G USB手指，2年使用F-XXX防毒軟件

其實諗諗下，佢送既野好多都無咩用，都唔知做乜會比佢厄簽多6個月約。

執玩具先

終於都進入執屋既階段，自己性格一向都唔鐘意臨急臨忙。雖然有排都未搬，但一早已經想快快手執好晒D野先，攪到間屋鬼咁多膠箱同紙皮，行兩步都無位咁就岩晒。

尤其係星期六、日，無咩街去，最好都係慢慢執下野。其實搬屋都有一個好處，可以搵番好多年都無拎過出來既野，再掉左佢。平日見佢唔到，咪比佢繼續安穩渡日，今時唔同往日，一唔順眼就預左無得留底。

不過咁多野唔執，我竟然都係先執左D玩具先。可能對我來講，呢D先係最重要既財產。

雖然D玩具無一樣係值錢，無一樣係特別版，但就係記錄左自己咁多年既回憶。當年一件件咁帶回家，拆開包裝，就代表左一個生命的開始。

練跑過程

睇左肥龍兄話

At least he never walked

我自己補多句

At least I never stop

-------------------------------------------------------------------

自己都寫底自己個練跑經過，等第日老左都可以回味下。

其實自己個方法都幾蠢:-

方法

1. 首先唔好理幾長，重之每星期keep住跑 45mins，幾慢都keep 住跑...。

2. 當 45mins 唔再係問題後，就開始比target自己，例如45mins要跑兩個公園...etc....。

3. 忽然間有一日，你會發現每次跑45mins都唔係幾夠喉。咁就加到上1hr。

4. 如事者又重複 1至3。

5. 當1hr重有貨賣時，又加多15mins，每15mins咁加上去。

唔好睇少個15mins，我自己可能天份所限，足足用左大半年，先由1hr加到上1hr15mins。

PS 重點係一加左時間，就點都唔可以減。幾辛苦，都要跑埋佢....。

每15mins加上去，就可以等自己個身体漫漫適應同練出耐力。

----------------------------------------------------------------------

痛左一個星期既腳患，今日踢下波，跑番鬆D筋。呢家又出奇地舒服。人體有時真係好奇妙，自己越係擔心越係難康復。心理療比藥物治療重要，可能就係咁解。

----------------------------------------------------------------------

腳患纏身!

唔知由幾時開始，雙腳間中都會赤赤痛。有時係擦損既痛，有時係扭傷既痛，最難攪係雙膝軟組織既痛。

其實自己知自己事，好多都係舊患。唔知第日老左行動唔方便時，可能痛到叫救命都似。最高峰期，自己真係準過天文台，未落雨前雙膝已經有預知能力。咁後生就『風濕』，幾時先捱到老呀?

不過做人有事就係咁，明知不何為以為之。鬼唔知唔郁唔成，日日坐定定咪會少D傷囉。但就係腳痕，早幾年唔係去跑步，就係去行山。重要唔係行一陣，加加埋埋成四、五百公里。呢幾年收歛左(最主要係懶左)，無再咁摶。間中都係踢下波，結果雙腳都好左。

運動員生涯好短暫，能夠係有心有力既時候，應自己既興趣去好好做下運動，比買多多野更有意義(當然我係無錢買名牌先咁講)。

自己好佩服尹約基先生同佢個領跑員。可能一時間你唔知佢係邊過，但一講到『看不見的跑手』，你就點都會知。

三十幾歲人，咩運動員黃金時間都過晒。不過尹生都講過，知自己既行動，可以鼓勵同幫助更多有需要既人，咁已經係佢繼續跑既動力。

跑完步出番身汗，再慢慢行番屋企，嘆杯冰水，其實真係爽過"隊"『孖啡』。

黃毅力 CEO實戰手記：十大重要技能

一向都好鐘意睇CEO黃毅力實戰手記，難得有一個有錢但思想正面既商人。發財立品係人都識，不過如果唔係真係發自內心，其實好難厄到人。每星期簡簡單單四、五百字話易唔易，但要寫得好真係幾蝦人。

--------------------------------------------------------------------------------

今日都市篇文，十大重要的技能，自己又做到幾多呢?

完文節錄:-

---------------------------------------------------------------------------------

(一) 關愛的心，我們需要極盡自己之所能，不計較地去幫助別人。

阿里路也! 阿里路也! 要成為正義既朋友真係唔易，尤其是對隱閉青年來說。

(二) 常懷感恩心，不僅憐惜身邊事物，還能平撫欲望和爭鬥

知足常樂，平凡是福。有時唔到你唔知足，又唔到你唔奮鬥。命運總會推動你向前走，不論走岩路，同走錯頭，結果總在未來等候。

(三) 學懂化解兩種苦，得不到的苦，鍾情的苦。

好似買股票咁，越溝越化。

(四) 學會忘記，經過一次挫敗，就長出一次智慧的種子。有些苦痛和煩惱得要默默地承受。

Learn from mistake 係千古不變。但要記住mistake(s)係無(s)，即係唔可以錯得太多。

(五) 學懂放手，當你無力把握命運，就要學會放手，給自己全新的開始。

唔識答

(六) 習慣儲蓄，要培養出儲蓄的習慣，在逆境時置業，在順境時不要過度消費」。

初頭睇有d矛盾，不過諗深一層又幾似自己既處景。

(七) 樂在工作

要在工作中尋快樂，先要唔好『沉』，咁先有機會研究點『尋』!

(八) 愛在學習，讀書和學習都是我們智慧累積的點滴。

每日返工放工搭車睇都市同AM730算唔算，上網睇人寫Blog 又算唔算?

(九) 懂得音樂，從小學懂一種樂器。

連唱K 都唔鐘意既人，真係無咩音樂天份!

(十) 習慣運動，善用時間去運動、從而保持青春，活力及健康。

呢點算係做得最好，起碼暫時都無放棄自己。

球迷奇遇記

細細過踢波，短衫，短褲，白飯魚，加樽水就飛去球場。如果著到成身波衫，但又無技術，實會比人笑扮野。

但唔知由幾時開始，波衫變左唔再係球員先著。甚至乎我覺得球迷著波衫重多過球員著。各大球會都好醒目，年年轉款，年年加D減D，換下色，就可以賣過滿堂紅。

記得細過，間中都會係D運動鋪，執到平野。又唔知由幾時開始，變到清一色公價HK$459或以上。咩球會，咩國家，都有貴無平。如果要印埋號碼，印埋球員名同聯賽章，一件衫可以去到九舊水都大把人買。一年四季，不論好波同唔踢波既波衫都係日日照著。

當然有某D波衫，就算平一平比我，我都誓死不會著。

無他既!

球迷情義結吧!

--------------------------------------------------------------------

自己鐘意左『紅魔鬼』好多年，由細到大都好恨有一件自己球會既波衫。硬係覺得，無番一兩件，好對唔住自己咁。可借四百幾一件，真係買唔落手。買左唔印字，又唔型。印字呢? 又唔知印邊個好，自己鐘意既球員都差唔多退晒休，一係離晒隊。

計計條數印齊晒野，HK$799埋單。踢一場衛生波都要七百蚊，香港人幾時變得咁富有?

看來自己件波衫，都係繼續等，可能到老左，無氣無力無波踢時，先買番件同D波友仔鬧下氣，串下嘴。

----------------------------------------------------------------------

好羨幕人地有一班由細踢到大既波友。由屋村仔街場，踢到有埋仔女，有家庭。

自己中學時代開始踢波，由三五成群，到大學又識到另一班波友。可惜係今時今日重有踢開既，真係二隻手指數得晒。

現在踢衛生波，離唔開都係朋友帶朋友，落場可以好夾，但完左場其實大家無咩交流。

不過次次同唔同人踢，都訓練到自己既適應性。自己唔係技術型球員，簡簡單單一腳波就算，所以都唔算難夾吧。不過都曾經幻想過，如果細過有球朋友，一路夾十幾廿年，真係唔出聲都識走位，其實真係一種福份。

人到中年，希望而家踢開波既一兩個朋友，繼續係好朋友，第日老左，著住不同既球會衫，都可以出來聚一聚。

鰂魚涌公園

嘆完個下午茶，見個天停左雨，第一時間仆番屋企換跑鞋落街操番課。涼風陣陣又唔曬，唔算太熱又唔凍。其實係幾好跑，不過如果可以再涼多少少，咁成績一定會再好D。

自己無咩點去計時或有咩儀器check心跳或跑速，次次都只係一支水上路。同平日差唔多都係跑十公里左右，無飲個水(當然有帶水)。可能真係天公造美，一跑完先落雨。

唔知由幾時開始愛上左跑『鰂魚涌公園』，由消房船搬來到今日，『葛量洪號滅火輪展覽館』，真係唔知跑過幾多個晚上。間中會遇到好多熟口熟面，但又無傾過計既跑手。可能大家目標都唔同，不過感覺就好似一齊練習咁。

熟客仔

新買個部 Notebook，用1G Ram 行 Vista真係有點吃力。不過睇暈晒成本說明書，上網查埋，都唔知自己部機個配置係點! 可能呢樣就係大陸野，被其它牌子比下去既地方。

最後自己都係拆開機底，抄底number上網問人。當然穩陣D，都會去其它門市鋪頭扮下街客，摶個Sales會詳細解釋比我知。

當然點都會靜靜雞走番去買機間鋪望下。不過估唔到個Sales一早已經認得我，連我買左咩型號都講得出。即係一早知我係來攪攪震，無幫襯。好彩佢都算好人，肯幫我問一問，遲下去腦場都唔怕買錯RAM。

渣打馬拉松 2009 開始報名

渣打馬拉松2009，又開始報名啦。10月31日前報名會平D架。

未玩過既朋友，真係要親身試下。跑開既朋友都要快快手決定報咩路程啦。

如無意外今年自己會繼續跑『半馬拉松』，希望做番好個成績。

不過今年，自己都未開始加緊操練，反而踢多左波，一星期三場，呢期狀態真係提升左唔少。希望keep 住個態，同唔好受傷。當然最希望有朋友陪跑啦!

不過我相信:- 『渣打路上，總會遇上』

----------------------------------------------------------------------------

記記下

2005 Feb 27 開始第一次跑 10K 1hrs 15mins

2006 Feb 16 跑半馬 2hrs 13mins 42sec

2007 Mar 04 走左去摶全馬 5hrs 31mins 06sec

2008 Feb 17 跑半馬 2hrs 20mins 17sec

2009 Feb 08 目標係兩小時內完成!


不過唔知有無朋友知，點先可以克服比賽前一晚訓唔好既壞習慣。咁多年都無變過，無論係渣打，無論係毅行者，都係咁。反而細過考會考、高考，又唔見我咁緊張。

----------------------------------------------------------------------------

Blog 上的跑步友:-

On Dog 兄

肥龍 兄

Lenovo

老爸媽又打殘左部電腦，今日去左好多地方格價同睇機。原本明明想買件曼聯波衫比自己，結果反而買左部手提電腦比家人。

講開電腦，屋企咁多年都唔知換左幾多部機，細細過阿爸用成皮野買比我學，估唔到今日到我用四千幾回贈番比佢。其實手提機當家庭機用都係第一次，不過長遠計自己第日回家都可以有機用，咁都ok既。

由 Dos→ window 3.0 → 98 → 2000 → ME→ XP →VISTA。估唔到老爸學用VISTA重快過我。

給你1萬元你會買什麼？

名校刁鑽小一面試題 網上熱傳 「clinic與hospital分別？」 「給你1萬元會買什麼？」
-----------------------------------------------------------------------

唔好話D小學雞，你呢刻問我，我都要再三考慮。

一萬蚊話多唔多，但要買野又唔係可以買到好多，起碼中人壽，中移動，都買唔起。用來買錶、買袋明顯又係有個樣買個樣。

如果真係比我揀，我會考慮(HK$3500)買部手提電腦比阿媽，細細部又慳位。不過我爸媽長期電腦病毒上身，明明都係上下網，check下email，咁簡單。但唔知點解硬係可以成日整壞部機，唔通真係天生同電腦八字唔夾?

餘下既錢，我想用來買個櫃。睇中左一個書櫃(HK$1,580)，如果唔係有免費錢，真係唔多捨得買。

重有四千蚊，離唔開都係同家人食餐甘，同買下小家電。

數數下，自己真係好似變左個阿叔咁，年青玩物，唔好話唔想買，連一個似樣既袋都無個。漸漸開始只係想買D好野回家，整靚自己未來個家。

總結一句，如果面試真係有人咁問我，有一萬蚊你會買什麼?

我會話，買個靚屋企回家啦!

中學波友

由細到大都鐘意踢波，雖然細過係接觸籃球先，不過好快就知自己唔岩打波。

而家好好彩，識到一兩個朋友仔。間中都會有衛生波踢下，一兩個星期有一次，當係做下運動。記得自己細過踢波好屎，而家都唔見得好。不過呢幾年，體力係好左，球路都好左，開始學踢老鬼波。

踢完波，最開心都係一大班波友去茶餐廳飲杯野，吹下水，講下邊球邊腳有幾好、點樣點扭必入波。

今日都係同朋友仔坐底飲杯野，傾下近況，講下家庭同事業既事。有時簡簡單單既一陣，已經比去飲多多次酒好好多。咁當然去飲野，有機會識到女女，去街場來來去去都係識波牛。

三聚氰胺

由『伊利』、『蒙牛』開始，估唔到今日發現『樂天熊仔餅』都有事。尤其係特濃朱古力味，實為本人至愛之一。大吉利使講句，如果連『維他奶』都有事，就真係大檸樂啦!

講開熊仔餅，最記得係六角形包裝，一望就認得。

記得小學時期某年聖誔節，學校有party，包括有交換禮物既環節。唔係好記得當時既人同事，只係知自己買左盒BB戰士。返到學校，老師無話點安排交換，最後都無安排過。

臨差唔多放學，其中一個朋友仔提議用佢手上既野同我交換。一睇個六角外形就知係乜。自己當時第一個反應係，唔換呀，>_<"，點會肯用我盒玩具換你盒朱古力，唔抵呀!

唔知當期時個同學仔有咩感受，只係依希記得佢當場拆包裝紙食左佢。如果換轉番係今時今日，如果同樣事情發生，我又會唔會有同樣反應，同樣唔肯換呢?

-----------------------------------------------------------------------------------

溫總話 - 『企業家要流著道德的血』

記得讀過好多管理課程，尾尾總會有個topic 叫Ethical。點解要放係尾尾，唔係因為重要，感覺只係草草講過就算。攪商業既，有幾多真係講道德唔講收入呀!尤其係大企業，上邊幾咁發財立品，下邊既人都未搵夠，點會同你講道德。

不過估唔到衰到要攪出毒奶粉事件，重要唔只一次，唔通真係唔信舉頭三尺有神靈、善惡到頭終有報?

下一個世紀，可能人類係比自己攪誇。無可信既食物，無可住既環境，無可生存既空間。

『天作蘗，尤可恕。自作蘗，不可活』!

樂極生悲

深圳發生當地15年來死傷最慘重的火警，一間無牌經營的歌舞廳突然起火，現場窗戶密封，逾千人擠在狹窄通道人踩人逃生，至少有43人死亡.....

---------------------------------------------------------------------------------

一向都好怕呢D新聞，好怕有一日會發生係自己同身邊既人身上。其實開開心心慶祝，點解要攪到無命返屋企。

細過都試過玩通宵係咁飲，不過自己多數笠水，盡量可以唔飲都唔飲，不過有時比人局飲真係幾慘。睇住某D朋友飲到嘔，飲到大肚腩，飲到胃出血，飲到唔知自己發癲係街咬人都有。

唔知又由幾時開始，興左返大陸浦，可能宵費平D，女又開放D，最主要係離家遠D吧。自己就無上過去見識過，甚至係香港都無正式落過Disco。

離開左校園，接觸既又係新一批朋友。層面唔同左，局限性同選擇性都大左。唔需要因為怕得失邊個而更硬出現。而家唔想出就唔想出，甚至長期唔浦頭，足不出戶，點約我都唔出，正式成為自閉一族。感覺生活攸閒左，健康左、同家人溝通多左d d。

-------------------------------------------------------------------------------



因為有電影上關係，令我認識左套漫畫叫『20世紀少年』。畫功唔多得，但故事性幾高。兒時一大班人既吹水預言，竟然會係日後毀滅世界既開始。

鐘意既唔只係故事得意，而係故事入面一大班兒時活動既一事一物。細過其實好恨有班住係左右既朋友，可以成日走落街傾下計，踢下波，打下機，簡簡單單‧可惜往事不可追。

雞脾打人牙骹軟

今日中午，靜靜雞走左去茶樓攞位同叫定野食。請左三個同事食番餐。其實一來係為左開心，二來人地都請過我唔只一、兩次，自己點都要做下主。記得細過讀書，有篇課文叫『請客』。大家都係有目的，都係以小摶大?

咁又唔好講到咁衰，大家都係同事仔，間中請下幫過自己手既人食餐飯仔，其實都係答謝之一。

勤力做野無回報，閒時偷懶人工高。

打工仔心態 第二回

1. 頭三個月返工，無野做會搵野做，第一個月比家用屋企，竟然都要閃閃縮縮，其實都唔知驚乜?
2. 過左試用期，好開心咁請家人吃飯，一心諗住可以創一番好事業。
3. 日子耐左，做熟左，明白公司邊D係人，邊D係鬼，自己要學好定位。老闆都開口叫我講多兩句，自己仍選擇做自閉仔。
4. 唔經唔覺就過左四、五年。由金融風暴既影響，到經歷SARS日日擔心返工，起薪點比人底，點加都唔及其他朋友仔係出面三日唔埋五日轉份工。
5. 好多舊同事，都決定走人。有D做左超過十年，可以話有得有失，佢地既離去，又間接造就左我既升調機會。唔係話黑心，只係唔明點解公司高層唔識留人，好既由佢走，衰既日日留。
6. 呢期有美國金融大危機，越大間越大鑊。反而中型公司仔，按份守己，可能可以避過一劫。
7. 其實無人唔想做大公司，不過公司大，自然歷史問題多，根本無得點改變。除非爆一單大鑊野，如果唔係邊有人有能力連根拔起。
8. 加左人工，加幅比預期多，當然無得同轉工比。但總算叫有得加，好過無得加。呢幾日心情係好左，不過希望呢種積極既態度，可以繼續維持。

請人

自己唔係老闆，又唔係HR出身，更加無請人經驗。不過公司請人，係唔係真係千遍一律，永不改變呢?

有D老闆好鐘意請靚女，全公司都係靚女。就好似銅鑼灣時代一間賣女性裝飾用品既鋪頭仔，可以話美女如雲，有時行過都覺醒神。

反觀有D古板老闆呢，尤其係女BOSS (唔好話我偏見)，硬係鐘意請D有幾怪得幾怪，差唔多個個女員工都一個餅印咁，你唔講我重以為係一家人。

其實呢D係咩心態呢? 唔通怕請個靚女回公司，D男同事就會唔專心返工? 就會日日為女死、為女亡? 又話者公司清一式一個系列，員工就會專心工作?

老闆，唔好咁天真啦!

其實男人都係衰，呢樣我認。靚女叫我幫手，我幾忙都會盡力幫下手。公司多番一兩個靚女，員工返工又開心D，工作效率都快D啦。有邊個想係靚女面前認無用架，點死都死掂佢啦。反觀一返工已經死氣沉沉，真係望個Mon都好過望人時，又點會做得好呢!

我認我腐淺! 之旦係我返工除左為左份糧，都想有一個好既工作環境。就算唔係全層都係酒池肉淋，起碼都唔好個個街市賣菜咁款。

好同意一句說話:- 『世上沒有真係好醜的女人，但實在有太多懶既女人』。

我實在太衰，完全唔識欣賞，一個三十歲都未到既女人，可以著到八十歲阿婆咁款返工。返工唔係手執市款公事包，而係一袋二袋百佳、惠康，牛肉、豬肉、生菜、生果。更加可以大模斯樣一份份，咁放晒係枱面，話要吸收新鮮空氣wow。

頂 !頂！頂！

點解我會入左間咁既公司，係唔係我真係咁天煞孤星，唉!　

月餅

越大個越少食傳統月餅，單黃，雙黃，甚至四黃都好，對我都唔多吸引。因為由細到大我都唔多鐘意食黃。咁多年都係食蓮容多個食黃。

呢一兩年，可以話係冰皮既世界。無他既! 今日天文台話有成33度，史上最熱既中秋節，再係咁落去，真係人都溶。

記得中學時代，中秋會同D同學仔出下街‧唔知有幾時開始，都係留在家過日晨。今日同阿爸媽飲完早茶，去左幫阿爸個朋友排隊等籌。雖然唔係等左好耐，不過幫人擺枱飲茶，都算係第一。

期間見到對面有個靚女，好鬼sharp。一望就認得佢係同大廈既，不過咁多年，招呼都無打過。可能佢知我係咁望住佢啦，佢都唔好意思，又睇下報紙，又間中bear番我。

無法子啦，一個人無野做，又唔可以叫野食，連水都無得飲，咁唔周圍望下，想唔望都唔得啦。重要難得係有個靚女，點都會偷望多兩眼。

----------------------------------------------------------------------

中秋節既節目係咩?

見一家大細出街食飯，又見有一雙一對晚步海傍，又有人渣住部相機影日落。

自己呢?

大熱天時都等到黃昏時份，落左街跑步，出番身汗，消化番呢一兩日食過既雪糕月餅、冰皮月飯、蘇皮月餅.....等等。

祝 自己同家人中秋節快樂!

愛屋及烏

自己遲下搬新屋，今日都幫『老比』購入大屋。

形容下架屋先‧其實真係搵左好耐，一路都搵唔岩‧無他既! 鬼叫我家隻肥狗真係好肥，一般狗屋根本唔岩佢。平時我地要用一個裝42吋大LCD電視既紙箱比佢當屋企。

不過咁岩有日經過IKEA，竟然見到一個比小朋友玩既脹幕。都係百二蚊，價錢唔夠，Size又岩，結果真把心一橫買回家試試。

其實狗仔好叻架‧岩岩開脹幕時，佢唔會即刻仆入去，點都會係四圍聞下咬下咁。當你引左佢入去，佢又意識到間屋係送比佢時，佢就會好好咁看守住自己個家園。

記得有一我想收番埋個脹幕，肥狗真係9秒9咁仆入去坐鎮住，唔比我收。

一時一樣

新屋既設計一早已經決定左，但呢期周圍出去睇傢俬時，真係咩都睇唔岩。唔係價錢問題，而係屋企地方細，好多市面傢俱都唔岩Size。更加無理由，下下度身訂做咁重皮架。

再同家人從新考慮，其實有無必要兩間房呢? 日後要改動時又麻煩，空間又細左好多。結果決定取消原有設計，一廳、一房、一廁所、一廚房，簡單又多空間‧

重未開始執野，不過初步估計都有唔少野要搬。尤其係D玩具，唔包好點敢拎出門口，一唔小心整爛左，真係喊都無謂。

不過講開執野，前幾日先發現左自己唔見晒D會考、高考証書。真係唔明，明明放得好好地，竟然消失晒。自己都唔算係一個無手尾既人，呢鋪只可以講句神推鬼擁，唉!

-----------------------------------------------------------------------------------

呢幾日忽然發奮，周圍問人讀書既資料。甚至夠胆死send email 比都市日報 黃先生問佢意見。雖然唔知會唔會有回覆，不過睇左 黃生咁多篇文章，佢都算係一個積極既人。


後記 10-9-08

估唔到 黃生真係有回覆我，雖然都係一兩句字，不過總好過石沉大海。其實佢講得無錯既，做人最重要係能力，無能力有咩學歷都係高分底能，咁又有咩用呢!


-----------------------------------------------------------------------------------



睇左林海峰求其大合唱 Part 2，唱歌加跳舞，講故又講笑都又算有新意。加上阿Jan唱歌算唔錯。雖則首首都係改人歌詞既作品，不過配合埋篤棟笑，都一樣令人開懷大笑。

香港地真係太多負面消息，太多唔開心既事。唔怪得有兩成學生話想死啦! 做人日日死捱爛捱都唔係辦法，間中真係需要點點歡樂，人生才不致太寂莫。

辭職

今日臨放工得知，其中一個同事又唔撈。數數手指，同自己 friend既都差唔多走得七七八八。出邊市道真係咁好咩?

聽同事仔講，出左去人工大幅加 40% 以上，起碼叫做市價。而家留係公司，屈屈埋埋都唔見有職升，有人工加。成日話有得加，年頭講到年尾，都唔知加咩!

可能真係比左一個好好既警號自己，唔好再浪費光陰。但自己知自己事，剛剛先話上左會，欠銀行一大筆錢，如果而家臨時無左份糧，真係申請破產都唔掂。邊似得早幾年，夠雷氣話走就可以走。

不過今日回家都立即update 番個 JobDB A/C，又攪番新份CV。最攪鬼係自己份舊CV，唔記得左個密碼，咩都要從新打過。

就係短短個半小時，好快就寫完。無他既!自己根本無咩好野可以寫落去。咩MBA，CFP，CPA .....可以話百無。真係轉工既籌碼都非常有限。

大人玩具

由細到大都好鐘意行玩具街，玩具鋪。灣仔春園街，旺角兆萬，同反嘔城都係長期至愛。

不過人大左，洗錢孤寒左。現在見到好多心頭好，大大件又平都唔捨得買。更少行左玩具街。換來既，係開始行傢俬鋪。昨日去左 IKEA，足足行左成個鐘，不過完全無悶場，感覺就好似係好多好多不同款式，不同傢俱中，搵出與自己有緣之物。原來行傢俬鋪都可以咁開心。

第二樣既係，真係有好多人都好有心配設屋企。睇下『住好D』有幾旺就知。最羡幕見到一雙一對，無論係情侣定兩公婆，甚至一家大細揀家俬，鬼死咁幸福。如果身個位重要係靚女，咁就真係恨死隔離。

唔知過多幾年，會唔會變左鐘意行街市呢?

黃子華 - 兒童不宜

無法子，真係唔同級數。唔到佢唔囂，因為真係好好笑。有頭有尾，有笑位。

其中男人有三不: -

1. 不主動 ← 其實鬼咁主動
2. 不抗拒 ← 根本係無能力反抗
3. 不負責 ← 唯一做到既野!

真係笑到嘔泡.....!

人工美化

今日睇CK 大介紹 呢個自制面相網，立即手多多玩下。以下係小弟個自制圖，明顯係美化左自己唔少，哈哈!



不過睇番個網，實際選擇真係唔多，可能係免費功能，如果肯比錢，應該有更多選擇吧?

有玩過日本 H-Game既朋友都知，當中你可以自制你個女女，要幾靚有幾靚，不論樣貌、身材、高度、衣著都任君選擇，務求滿足一眾男玩家喜好。

結果呢? 就會出現在好多唔岩比例，胸大廋腰長腿短裙美女周街走。

如果現實真係咁，都幾可怕，當周街都係人工自制美少女，個個都咁靚，個個都完美，結果只會係一個個模型，有軀體無思想，無靈魂。

不過又好鬼誘人........ 罪過!罪過!

雌線代言人

無啦啦上網搵到套何河篤棟笑，睇完先知原來佢係達明老婆。雖則成個show笑位唔多，不過間中都有一兩句精景金句。

不過換個角度諗下，如果兩公婆都係熱愛演出，兩個都係演出者，同聲同氣，其實都幾幸福。做人有時就係咁，唔一定要靚爆鏡，但夾岩路既，真係唔係咁易，始終都係人夾人。

烈日當空，拉西入波

酷 熱 下 折 「 鷹 」 復 仇 　 阿 根 廷 封 王

打 鐵 趁 熱 ， 但 踢 波 最 好 不 要 太 熱 ， 惟 昨 日 京 奧 男 足 決 賽 卻 在 攝 氏 42 度 高 溫 下 進 行， 戰 至 30 分 鐘 更 需 中 途 停 頓 ， 讓 球 員 降 溫 。 最 後 頂 頭 大 熱 阿 根 廷 ， 以 1:0 險 勝 「超 霸 鷹 」 尼 日 利 亞 ， 雙 重 「 熱 」 力 成 功 衞 冕 ， 別 具 一 番 滋 味 ！

-----------------------------------------------------------

自己都係，好日唔踢波，今日一出門口原先好好天。

去到球場門口先來落雨，不過等左一陣又出番太陽。

十一點半開波，烈日當空，同阿根廷一樣，曬到變燒賣，。

結果上半場已經輪左三蛋，下半場見大家都無咩氣，自己又休息左一陣。

由左閘邊位湧上去摶一摶，同隊友一個one two，再係籠門出迎前，腳指尾拉西，拉番個波去死角入網，追番一球。

之後再來一個反擊三打二，隊友左腳剃刀射球，又係一個死角。

結果三比二，無咁難睇。

--------------------------------------------------------

又唔知係唔係咁岩，今日行商場執左件$150 阿根廷 & $150 法國 adidas波衫

裝修用料

今日同家人去左灣仔睇裝修用品，真係成條街間間鋪都係，五花百門。

唔覺唔覺，原來小小地一間屋仔都可以咁講究。上至牆身電線，下至地磚床櫃水龍頭都要煩。最難攪係點配色，自己睇色板以為好岩，但實物出場未必咁好。又要預價錢，又要睇質料。藍配橙，米黃鬥木色，各花入各眼，希望日後出來效果唔錯啦!

打9 號風

昨晚訓前都係風平波靜，無咩惡劣環境。今朝都打定輸數，無奈返工。誰不知一起身，已已經8 號風球。『鸚鵡』果然做到野，抵讚!

打大風對打工仔來講，算係一個額外假期。平日各有各忙，打大風好應該一家人留係屋企食下飯，而家又有奧運睇，更加唔會悶啦。

打工仔心聲2008

睇左鐵鎚兄篇打工仔心聲，其實自己都想講，好多人好多時都係處於兩難。

記得自己初初畢業，好好彩搵左一星期就有工開。不過估唔到係做接線生，日日返唔同更，星期六日唔一定有得放。只係叫做有工開，同工作日日清。因為根本唔會有野帶落第二天。D 同事又係唔錯，大家會好開心間中開下party，唱下K，飲下酒。公司重要有幾個靚女，識唔到都可以間中偷望下。

不過自己知，係呢個環境，根本係學唔到野。結果一早把心一橫靜靜雞搵工。又咁岩搵到現在呢份工，當期時真係無咩點考慮就接受左，大家都係沙士年期既搵工仔，人工同待遇有幾好，大家都心裏有數。不過當期時無負擔，又見後生，當然唔怕摶啦。加上份工，表面又真係有野學咁。

一做就好幾年，今日諗番，當年選擇既都無錯。不過到左今日呢刻，又再浮現係唔係要轉下工?唔係話自己對公司唔忠心，無責任心，唔投入...等等。但真係同同期既朋友相比，自己真係明顯落後於人。一個人既際遇，好難過。月薪幾萬銀既畢業生都有，人地叻人地本事，自己唔可以怨天尤人，不過自己都唔係差到年新人都不如吧?

公司立場呢，理鬼你。請左你返來，有本事你咪走，唔走就繼續坐係度，人工就唔會加，就算加都係全公司畫一人人加幾舊。(當然高層同有勢力人士另計啦)

其實係唔係轉工最大因素係咩?

1. 錢 ! ← 唔係話現實，但無錢點交租呀，水電煤都要錢架!
2. 公司規模 ← 唔理大與小，每個月出得份糧比你既都係你老闆。
3. 工作地點 ← 人人要求唔同，不過有d人明明就住係隔離都可以日日遲到.....!
4. 職位← 呢個似係最誤導人………..!
3. 前景? ← 多數人入職前都有有無限幻想，不過現實就……!
4. 有無野學 ← 呢個算係自己繼續留係度捱既最大原因，不過野係無可學晒既一日，咁係咪即係永無轉工既一天，哈哈!
5. 準時收工← 幾點算準時? 6點、7點、8點、定零晨?

以上要求，人人唔同，不過感覺隨年歲增長，點都會漫漫放底自己既要求。

不過最同意係，今時唔同往日，唔可以咩都同公司或同事講? 人都係偏向自私，唔係話要去害人，但有利益自己既，無人唔想要。要供樓，要養妻活兒，要交學費….等等都成為左打工仔爭取更好待遇既大考慮，亦都係人生不能避免。

坐下坐下又大半年，就到年尾又話費事大改變，年頭又話市淡人人等過年。年中又話睇定d先，結果咁就六、七年。

願幸運與大家同在，一起發奮有個好未來，阿們!

信唔信邪

係讀書年代，一直都有掛住個骷髏公仔係門口。到搬返屋企住都一直有帶住。差唔多叫做跟左我六、七年。今日都決定掉左佢，一來想轉下運，二來骷髏又真係唔係幾好意頭咁。

其實有時人就係咁，好運時咩都當係寶。一衰起上來就話要改運睇風水。靈可信其有，不可信其無。唔好怕老土，唔掂就要識睇路數。

加班 2

講番句公道說話，今日返公司加班，老闆們有安排番餐午飯比員工食。好唔好食，貴唔貴，飽唔飽都係其次，重要係有得食。

其實好多公司都係五天工作，星期六返工其實真係好靜，好多平日既煩電話都唔會响，因為無人知你返左工，就自然無人攪你。感覺真係可以專心做d平日想專心做既野。

所謂吊頸都要透氣，呢刻我就係身處公司，做左大半日野，下午靜靜雞透下氣。

鬥氣定係唔反省?

記得初入職工作，日日放左工都唔肯走，唔到D人走得七七八八都唔走。現在未放工都準備急急腳走。早期一星期返五日半工，現在公司叫你加一日OT都嘈晒咁。係唔係應讓檢討下呢?

呢期公司上新系統，好多野將會好亂。平日有平日野做，咁自自然會想D員工假期返公司幫下手。結果呢? 員工們又唔憤氣，又要揀返上午放下午，返一陣唔返一陣咁。

自己認真咁諗左下......

公司有需要，自己返工唔算係大問題。不過係唔係應該計番足錢呢?講真香港地你估真係為公司死、為公司亡咩?公司均均真真，員工自然做得開心。其實都好公道，你返工時間多左，收入多左，呢個係天經地義，唔洗拗。

但你個頭話自願返，轉頭又話強制返，連飯盒都無過，好似唔係咁好囉。唔知D老闆自己識唔識做，請下午荼餐啦!

第二係返工做咩先? 話要測試系統，但個系統三日唔埋兩日就唔郁，攪少少野都要成粒鐘，咁你Call晒成村人返去白坐咩? 又唔合乎經濟原則，又影響員工士氣。

咁做人要公道D，話人之時，自己都要反省下。

呢幾年個人真係懶左，重要呢期運氣麻麻，成日出錯，又成日發白日夢轉左另一份好工，可以係舊公司游游下。

其實如果真係有後路，咁又唔怕串，如果唔係邊串得起? 轉左工都唔一定好，尤其大家心裏有數出面既公司有幾多野做。相比起呢度，算係打緊風流工。

又係時候冷靜下，同調節下自己個思維了......!

投入感

一向都唔睇奧運，未開始播前自己都係咁同自己講。記得細過邊會有心機睇d咩跳水、體操、舉重呀。就算日日播足球，唔係強隊大戰都唔會望多兩眼啦!

但人大左，可能明白左。識得欣賞運動員背後付出既努力。台上一分鐘，台下十年功。金銀牌只差一線，如果大熱出局，真係唔知點面對鄉親父母。

何惜冠軍總係得一個，係自己友上台攞金牌，故然開心，但如果不幸失金，真係唔敢想像，會比多少國民睇唔起。運動生涯好有限，廿幾歲到三字頭，原來轉眼就過，有時真係唔到你話重頭來過。

所謂一將功成萬骨骷，中國每多一金，其實背後就會有無數咁多個失落既運動員。佢地都值得勝得尊重。

Beijing 2008

自己無睇開奧運，昨晚都無現場睇開幕，不過能夠見到中國攪得好，國歌成日係頒獎台播，都係件開心既事。

再見『鞋仔』

打完風既日子，唔再比籍口自己，一放工就仆左落街跑步。不過跑跑下感覺唔對路，做乜隻右腳唔多順咁，原來個鞋底爛左。

話晒『鞋仔』都跟左我兩三年，真係算係風雨不改，一齊完成個全馬拉松，跑超過三四百公里。今日正式退役了...........!

打好風

會考放榜必落大雨既魔咒差唔多年年都係，今年叫做遲左兩日。

不過呢個熱帶氣旋『北冕』對我地呢D返工人士，有多日假真係打得好。但對於未有學校收既會考生，就再多日辛苦。大雨搵學校既折墮真係畢生難忘。

陌生環境

自己怕轉工，一來怕外邊好多野都做唔掂，二來怕又要重新認識新環境。人都會係咁，何況係動物。

今日帶左小狗去新屋，結果一去到小狗好似瘋狂咁亂走亂叫，又怕主人唔要求，行一步跟一步，廁所都唔敢去。乜都未有已經係咁，年底正式入伙時，咁佢點算?

小狗住慣大屋，家陣要搬細屋，活動空間細左，但相信日後落街散步都方便左。

一字記之若 等!

有好多時返工做野，唔一定即時有結果。好事當然唔怕等，但如果明知自己做錯野，而事件有好快比上司知道，係等結果既過程中，係最難受。因為唔知上司會有咩反應，唔知錯事件有幾大影響。係太多太多不知明既因素下，呢D就係所謂無形壓力。

小錯事，自然少壓力。大問題，會令人焦慮不安，試過影響睡眠。咁當然人生總唔可能日日風平浪靜，豪無壓力。但作為打工仔，只求三餐一宿，鬼叫你窮頂硬上。

小改變唔等於大改善

唔知係唔係性格問題，間中個人就成日有D 想改變。不過多數都係腦內改變，行動同現實中係完全無點變，最多都係改少少，真係好少好少。

自從上左會後，成個人既感覺唔同左。一來欠銀行一身債，二來好多家頭細務，裝修設計都要花下精神。不過講真好多都係靠家人諗，自己好似坐係度等入伙咁。

其實都唔係未試過搬出去住，係讀大學既年代就試過寄宿。當年都話有好多宿友，除非係D大時大節，否則點都會有D左鄰右里。但第日既日子就未必會係咁，一來你唔熟識個環境，二來幾何會無啦啦同隔離屋傾計。石屎森林之下，真係各家自掃門前雪。

話說呢期自己最大既改變係，生活再節儉左。應該話洗埋呢一個月，下個月開始已經要還錢比銀行，每個月既開支會大得好可怕。報紙好多專欄分析員都話，經濟通脹，唔能夠開源，唯有好好節流。

自己呢?一向都唔點捨得洗，現在百上加斤，更加降底生活娛樂。雖則自己一向都係宅男，都盡少出街消費，現在更加可以正式同娛樂講bye-bye了。

見家長?

今日同家人去左食自助餐，主要唔係因錢多無地方洗，而家人個親密朋友話想大家見下面。尤其係我呢位長期龜隱既中年人。自不然老媽子落格殺令，迫我一定要出現。

其實之前係街都遇見過，不過無打招呼。大家唔熟，都無咩好傾咁。同枱食飯，大家睇望望加傾一兩句計。短短個兩小時，話咁快又過左。其實唔係食得好飽，或者係唔想食太飽，免得自找辛苦。

假如遲下真係結埋婚，便正式變做家人。過時過節一定會見，閒來無事都可能會日日遇上。唔經唔覺，時間真係過得太快。

一分一豪

唔係講錢，係講屋企地方細細，小小位都要計過量過。之前有好多設計，結果現實中好多都唔可行。呢兩晚都有再上去睇下，初部有個新構思，希望效果會好。跟住開始睇下其它家電，環境問題，好多野都唔岩洗。要物盡其用之餘，又要唔好晒位。室內設計真係一門高深既學問。

前日攪左電費，今日又交左水費，遲下又要攪埋煤氣費。住都未開始住，裝修都未開始攪，已經係咁洗費，你話份糧邊夠洗。

室內設計

昨晚正式收左鎖匙入屋量位，結果攪左一晚，原先既設計全部要取消。屋仔細細自自然唔係你想點就可以點。一邊預到位，另一邊又唔夠位。整得張床，又唔見左個櫃。電視制、電話線、插蘇同燈制，樣樣都要從新預計。

唔知進度會係點，不過好大機會年尾前入伙。到時新屋落地，又係另一個世界。

歷史與故事

歷史故事，歷史與故事，歷史好似每每同故事拉上關係。係因為咁樣能讓世人有所共鳴，讓小孩容易記住，讓古人更神化。

睇左吳宇森大遵套『赤壁之戰』上集。先不討論卡士與特技，只係同其它同類三國戲比較，真係有讚有彈。三國一向都被世人神化，加上有羅貫中既演義，更加將人物推上高峰。劉關張趙，打江山打天下。不過如果細心一想，真係咁易單人長板橋哧走八十萬大軍，真係咁易萬軍中藏阿斗。幾好打都好，始終蟻多咬死象，雙拳難敵四手，何況係八十萬對手。

所以都欣賞吳大導既現實拍攝，但同樣否定兩軍撕剎，邊有可能無啦啦大都督出戰擋箭，更不信一國之君單挑老虎，如果真係有咩閃失，邊個負責得起呀?

故事始終都係故事，除非有朝一日真係回到過去，否則根本沒有定案。

Free Lunch

經濟話世上無『免費午餐』，但對自己來講慳左錢就夠，理你係唔係唔岩邏輯。

話說今日去游水，差唔多夠鐘去到摩理臣山泳池門口已經排晒長龍。舊時都無試過係咁，不過可能係新作風吧。唔理啦，照排下隊好快入閘。

一點夠鐘，已經拿拿臨攞定張八達通等比錢。最奇係去到閘口，見人人都係話過就過，唔洗比錢咁。心諗唔會今日係D咩學校水運會，或小學生游泳比賽吧!如果唔係邊會有咁著數架。不過真係唔洗錢，游左次免費水。

抵佢賺!

今日上律師樓正式交尾數同簽埋最後個D文件。講真D文件份份都幾十頁，又鬼咁多英文，有時間都無心睇啦。不過話晒係老爸朋友介紹既律師，又係間大律師行，點都信得過既。不過真係估唔到樓宇買賣咁鬼多野要攪。現在都只係攪左前期，後期既野都未開始。

作為律師，收得客人錢就要負上專業責任。客人簽隻字，律師講兩三句，咁就收左我差唔多一皮野，呢期D錢好似倒水咁倒。

森美做大show - The show must go wrong

唔知係唔係香港太多愁雲慘事，近年越來越多棟篤笑show。睇左森美個單人show，如其話單人show，其實都有好多人友情客串。不過可能始終係新手吧，感覺好多冷場，唔知現場觀眾有無同感?

同其他較出名既棟篤笑演出者相比，真係有待改善。始終唔同演員有唔同風格。詹sir係傾向藝術家feel、子華政治笑匠、海峰有唱有笑、達明形體動作王......等等。

來到森美，個人覺得重未成形，唔係話個show 唔好笑，只係未感覺到個中心思想係想點?